Read ejagham Farimun, echî 1 Bible Online

Farimun, echî 1 - ejagham bible

Farimun, echî 1

¹Nwet nnyí a dʉ mbâ amé, Pol, nnyo n gyée ókúmí ka echî Jisos Krayis, é kpê na ntem-mmon-i-nnyen owəré, Timoti. E séŋe e tûm wâ, Farimun, ntem i ḿbə́ŋé owəré nnyo é yimá obhô-etûm bhə́t.

²E kí kup fə́ne echəme atóbhá Jisos mba á chə́ma ka njû eya. E kí kup Afiya ka ntem-mmon-i-nnyen nnyo nne-nkáé na Achipus nnyo a ri noŋ nne-enok ka etûm Obhasi.

³Deê Obhasi Ńsé owəré na Ńtâ Jisos Krayis á tóŋé ên onobhá-eji, á káre ên fə́ne enare.

⁴Ntem-mmon-i-nnyen omé, Farimun, chénchén ebhú ń gorá Obhasi omé, n kí tirâ wâ n kará yê ekûp ka obhô obhâ.

⁵Echî aŋ? N kí yuk nchot okot mbi o fonê na chénchén ane Obhasi, n yúghá fə́ne nchot i ḿbə́ŋé nnyi o kíi na Ńtâ Jisos.

⁶N kí goré bəre deê ochəma-biji mbi e fonê ka nchot Obhasi ó yîm êt é mə́ŋe mfoné-mfoné enare nji e fonê ka ekpin ejə́ré na Jisos Krayis.

⁷Ntem-mmon-i-nnyen, məŋê se okot obhâ mbí ó kare ə̂m ekpatə́m ogyebhá-ḿbə́ŋé, ó kak ə̂m ikom. Ka nan? Ekpin ejâ é kare ogyebhá-ḿbə́ŋé mbâ chénchén ane Obhasi.

⁸Nâ mân nji é chəm na Jisos Krayis, ḿ bik efonóm ḿbə́ŋé ń sə́ré wâ ó yîm obhô-etûm mbi o fonê eyimím.

⁹Kə́n ń səra wâ áno, ka mme a ri Pol, nnyo nne-nkúí, nnyo mfá-mfá njí ń gye ókúmí ka obhô Jisos Krayis. Kən ka obhô okot, deê ń góre wâ ogoré.

¹⁰Deê ń góre wâ ka echî Onesimus nnyo a ri mmon omé ka mbiŋ i Jisos Krayis, ka ń chəbhe ńsé owe ka mbá Obhasi ńga ka njû ókúmí.

¹¹Ka ebhú áji, Onesimus a ri nne chichi mbâ eya, kən mfá-mfá a chə́bhe obhô-orûm obhámé na obhâ eróŋ.

¹²N kí chəbhé njəm ń túm yê mbâ eya na nsae ka ḿbə́ŋé amé.

¹³Nji mfá-mfá n di áno ka ókúmí ka obhô Otip Ogyebhá-ḿbə́ŋé Obhasi, kə́n n kôt bəre ḿ mághe yê ngá a kó eji ejâ a nyáŋá ə̂m.

¹⁴Kən ḿ bó yim kpe ejûm jə́t təm ó kam na mme. Ń ka wóm é jóe noŋ n kí choe wâ ochóé bəre ó nyáŋé ə̂m. Deê é dʉ̂ wâ ka ḿbə́ŋé.

¹⁵Ebhú etat, Onesimus a maghê wâ ka mkpât ebhú, a chəbhé njəm a bhá joé na we chénchén ebhú.

¹⁶Kən mfá-mfá a kí chəbhé njəm, cháŋ sê ka mbá nnyi osʉ́ŋ obhâ átíŋ, a chə́bhe ntem i ḿbə́ŋé ka mbiŋ nnyi Jisos Krayis. Okot mbi m fonê na yê ó faŋ kpe-eji, kən ń kere bəre tîk o kôt yê o chíŋi ochíŋ. Echî aŋ? A kí joé na we ka ngyím ébháe, noŋ nsʉ́ŋ na noŋ ntem-mmon-i-nnyen ka mbiŋ i Ńtâ Jisos.

¹⁷Ó məŋé mân se mme na we a ri ejûm jə́t, deê ó fî yê ka ekpak nji kə́n o fî ə̂m.

¹⁸Ájoé yê a yîm wâ obhí kpe bhə́t na kpe a fî wâ arə́m, deê ó séŋ ó kâk ka mbiŋ amé.

¹⁹Ka obhámé obhô mme ḿfoné, deê ń séŋ ń sə́ré wâ bəre ntʉ́ghi arə́m mmá, mme Pol, tîk n gôm. A ri ń ka wóm ń tît wâ bəre ekpin ejâ ka Jisos Krayis é rî ə̂m ka obhô.

²⁰Ntem-mmon-i-nnyen, nâ yim mân ejûm nji n toê nná ka mbiŋ i Ńtâ Jisos. Karê ə̂m ogyebhá-ḿbə́ŋé noŋ ntem-mmon-i-nnyen.

²¹Ḿ məŋe bəre nji ń seŋa áno, o kí yim ka ekpak nji n wóme. Ka etʉri, tîk o yîm é chíŋi nji ń woma áno.

²²Mân ebhú osêŋ mbí ó gye wâ ka obhô, tʉ́ri mmon-i-njû, kî ə̂m, ka ḿ fon íkíkéré bəre tîk Obhasi a yîm ə̂m n chə́bhe njəm mbâ eyəné ka ekpak nji ên ó gorá ên yê.

²³Epafras nnyo a ri ka ókúmí na mme ka obhô Jisos Krayis se ń kúp wâ.

²⁴Atem-ane etûm abhámé, Mak na Aritakus, na Dimas, na Luk, sê ń kúp wâ eróŋ.

²⁵Deê Ńtâ Jisos Krayis a tóŋé ên onobhá-eji.