Read ejagham Ane ibru, echî 1 Bible Online

Ane ibru, echî 1 - ejagham bible

Ane ibru, echî 1

¹Éməné Obhasi a kóe mkpak etî-etî a chôt na ásé abhə́ré ntə̂m etî-etî. Ka ebhú áji a kí səre nchot mbâ akará-otîp abhê se á sə́ré ane.

²Kən mfá-mfá, nji é rî nâ ebhú ngun a kə́ bha oman, Mmon owe nâ á səra êt nji Obhasi a chorê. A ri Mmon nnyó nâ Obhasi a sáŋe se iyîm chénchén í jóe ibhê. É dʉ̂ fə́ne ka Mmon nnyó kən Obhasi a yîm ngun.

³Ka Mmon nnyó nâ é yena ekpatə́m ebhát nji é rî ka ejík Obhasi. Ó məŋe Mmon nnyó nâ ó məŋe Obhasi. A ri na eyum í nnyo ejê ńjéne-njənê nâ a fiî ngun, a kí ji ochî. Ebhú a kpóe a sû nne obhí, a gyʉ̂t a jak ka ósô a jî kúmi ka eji ekumi ejík, mkpe obhô-orûm Obhasi nnyo a faŋê a chíŋi chénchén ejûm.

⁴Obhasi a yûŋ Mmon owe a fâŋ a chíŋi baénjel abhê, noŋ fə́ne mbiŋ nnyi á káre Mmon nnyó a chíŋi nnyi ábho.

⁵Ka nan? Obhasi á ka nok osə́ré énjel owe kpe yót se, “We a ri Mmon omé. Éróghé ka égyé, ń chəbhe Ńsé owa?” Obhasi á ka nok ochot fə́ne na énjel owe kpe yót se, “Mme tîk n jóe Ńsé mbâ eya, we fə́ne Mmon mbâ amé”?

⁶Ebhú Obhasi a kí tum ndaŋa-mbá Mmon owe nnyó ka ngun, a chôt se, “Deê chénchén baénjel abhámé á jíghí Mmon nnyó.”

⁷A chôt fə́ne a kpê na baénjel abhê se, “Obhasi a yîm baénjel abhê se á jóe noŋ mfêp, a yîm ábho fə́ne se á jóe noŋ ngun mmi ń kí ru.”

⁸Kən a chôt a kpê na Mmon owe se, “We a ri Obhasi. Otúi obhâ ó ká fon ntə̂m. Ó fik ane abhâ ka nnyen-i-mbá.

⁹Ekpin ka nnyen-i-mbá nâ we ó korá, ó ka kot achot mma á kí bhibhi ebhín ejámé. Nâ ńjə́ne n sáŋe wâ mân bəre ó fôn ogyebhá-ḿbə́ŋé ka ekpatə́m ejík nji ń kará wâ, ane etat ń ka karé áno.”

¹⁰Á chôt fə́ne sê, “Ntûfâm, ta ka éməné ńgô, o yimî nsi, a ri we na abhô amâ nâ o yimî ósô.

¹¹Chénchén iyîm mbi we o yimî, í kí man, kən we ḿfoné ó bhó man. Chénchén iyîm mbí í kí ka í tə̂m noŋ ḿfô.

¹²O kí fət ḿbə́ne eji jə́t noŋ nne á fərá nkʉ̂ eye. Iyîm mbí í kí kpo ayép, kən we o kí kət okə́t noŋ o ri, ekpin ejâ é bhó fon ntə̂m.”

¹³Obhasi á ka nok osə́ré baénjel abhê kpe yót se, “Kumî ə̂m mfá ka ekumi ejík, mkpe obhô-orûm amé ta n yîm ane-ebhan abhâ á chə́bhe ekíghá-akát ejâ.”

¹⁴Énjel mân a ri jen? A ri ńtʉgântʉ nnyo Obhasi a túmi se á bhá ka ngun á bhá nyáŋé ane mba yê a kí yim á sém.?