Read ejagham Ane ibru, echî 10 Bible Online

Ane ibru, echî 10 - ejagham bible

Ane ibru, echî 10

¹Ebhín ane Jus é rî noŋ ńtʉgântʉ ejûm, mfoné ejûm asík. É kí toŋe a ri mkpât, é bhó toŋe chénchén ekpak okara-agore mmá mát kpe bhaghé eyâ. Agore ntʉ́ghi mmá á ká bhik eyimím ane mba á jígha Obhasi a kâ fôn akôp bhúghí-bhúghí.

²Ebhú sê á yíma ábho ka etʉri á ro kpó fon akôp, kə́n mbôp nnyí á ká si ntə̂m ejomóm noŋ á mágha a? Ebhú sê ane mbá á jigha Obhasi á chəbhe nná akôp cháŋ, kə́n nsôn á ro yim ábho sê á yîm obhí.

³Kən ka ekpak é rî, efin njí kpe bhaghé eyâ, é kí chəbhé njəm é yimá ábho á tirá obhí ábho.

⁴Echî aŋ? Agyʉ́ŋ í mfoŋ na kpe mma mbúi, á ká bhik eyighím obhí nne.

⁵Nâ ńjə́ne Jisos Krayis a chorê na Obhasi kən a bhá ka ngun se, “We ó ka wóm efin agyʉ́ŋ í nnyam na bikəp, kən ó tʉri ə̂m ó ki efin ejâ.

⁶Ó ka kot agore ekarám mma sê á kâk nnyam ka ngun a rík á kara wâ, na kpe agore mma sê á káre wâ ka obhô obhí mbi ane á yími.

⁷Nâ echî n chorê se, ‘Obhasi omé, ńgyê mân mme, ḿ ba ḿ bá yîm nji we o wóme se ń yîm. Nâ ekpak á séŋe á kpê na mme ka nwet eya.’ ”

⁸Ndaŋa-mbá ejûm nji Jisos Krayis a chorê a ri se, “Obhasi, we ó ka wóm efin na bikəp, ó ka kot onyam mbi á kí kak ka ngûn á ríghi mbâ eya, na kpe efin nji á káre ka obhô obhí.” Á chorá áno, kpe noŋ ebhín é fíi sê nne a yim.

⁹A kpô chot mân a kpê se, “Ńgyê mme ḿ ba ḿ bá yîm nji we o wóme.” Ka ebháám njí, Jisos a bhíbhi ndaŋa-mbá efin a kô nji fê a bhâ.

¹⁰Nji fê njí nâ é kí yim êt é bhó fon akôp ka ochî Obhasi. Echî aŋ? Jisos Krayis a karê biji ibhê noŋ agore ntə̂m ányi yə́t, nchot fə́ne a mân.

¹¹Kpe nnyón nkara-agore Obhasi á kí gyimi a kará ekpak agore mmá mát kpe bhaghé ofú. Efin nji é ká bhik eyighím nne obhí obhê.

¹²Kən ebhú Jisos Krayis a karê agore áma ka obhí ane abhê ntə̂m yə́t ányi, nchot a mân. A jî kúmi ka ekumi ejík mkpe obhô-orûm Obhasi.

¹³Mbôp nnyí a kí chik sê Obhasi a yim ane-ebhan abhê á chə́bhe ekíghá-akát ejê.

¹⁴Ka efin ejê jə́t ńjə́ne-njənê, a yîm ane mba Obhasi a sû obhí ábho á bhik nnyen ebhighím ka ótúm-ótúm.

¹⁵Obhasi Ebhare Ntʉgantʉ fə́ne a gyím êt ntî-isê. Ndaŋa-mbá, á chóre sê,

¹⁶“Ńgyê ńgyímí nnyi n kí ko na ábho. Mfín ányi á chiŋ, n kí kak ebhín ejámé ka íkíkéré ábho, n sêŋ ńjə́ne ka ḿbə́ŋé ábho.”

¹⁷A kpô chot se, “Tîk ń do kpó tit obhí ábho na ndibhí nnyi á yími.”

¹⁸Ka eji Obhasi a rî nsôn a sû obhí obhə́ré, echî efin nji sê á káre ka obhí eyighím kpó cháŋ.

¹⁹Atem-abhon-í-nnyen, kpe efup nji é kí kpo gbʉi êt mfá-mfá e kâ gyê Mfoné-mfoné Eji Obhasi cháŋ. E kí gye ka obhô agyʉ́ŋ í Jisos Krayis.

²⁰A rə́bhe êt mbá mfê nnyi á kará ekpin. Ka obhô mbá nnyí, é yáŋe íkpéghé é gyé Eji Obhasi. Íkpéghé mfí a ri biji Ńtâ Jisos yê ḿfoné.

²¹Ka eji é fon ekpatə́m í nkara-agore Obhasi nnyo a ri nne-echî ka ókʉ́rí achot Obhasi,

²²deê mân é jî é kpíri Obhasi na mfoné ḿbə́ŋé eyəré jáé nnyi e kíi na yê, efup é ka fon. É jî é kpíri yê na ḿbə́ŋé eyəré nnyi á su, nsôn é ro kpó fon sê é yim obhí. Á su fə́ne biji ibhə́ré na ayép mma á ká fon akôp ka ochî Obhasi.

²³Nji e yuŋî ḿbə́ŋé e kúni, deê é fíi fə́ne ka ńjə́ne, e kâ yóŋe. Echî aŋ? Yê nnyo a chimî êt ejûm njí, á bhó səre áfúbhí.

²⁴Deê é kére ên fə́ne ekpak e kí kaghâ ên atem ikom á korá atem, a yimá fə́ne ntûm i nno.

²⁵Nji e kí yimâ ên ka ekpak njí, deê e kâ gyíni fə́ne echəmə́m na atóbhá Jisos, e gorá Obhasi noŋ etʉ̂ ane á gyína. Deê e kaghá atem ikom, ka ofú Ńtâ Jisos a kə́ bha okpírí.

²⁶É məŋe mfoné nchot Obhasi. É kpo joé mân e yimá obhí e jak ochî, deê é mə́ŋe sê agore etat kpó cháŋ mma Jisos a kí karé ka obhí obhə́ré.

²⁷Nji é kí gbo é káre êt, a ri otáŋá-esup mbi Obhasi a kí taŋ êt na erəmta-ngûn nji é kí righi chénchén ane-ebhan abhê. A ri eyimá-efup ejûm.

²⁸Nne nnyo á taŋé ebhín í Mosis ebhú áji nji ta ane á fap á si ábháe, kpe ásá, á sə́re sê a gbô, á yúa ntʉ́ghi nne nnyó, nsôn á bhó fon.

²⁹Á kí kpəre mân nne nan nji nne á ko Mmon Obhasi se chichi nne? Á kí kpəre nne nan nji nne á ko agyʉ́ŋ mma Jisos a karê se yê a yim ane á kâ fôn akôp ka ochî Obhasi se echâk ejûm? Á kí kpəre nne nan nji kpe ebhú tat nne a tû Ntʉgantʉ Obhasi nnyo á toŋá êt onobhá-eji?

³⁰É məŋe Obhasi nnyo a chorê se, “Maghê nkáŋ edíím ka obhô obhámé, tîk n yîm n yóŋe.” A kpô chot sê, “Ńtâ Obhasi a kí taŋ esup ane abhê.”

³¹A ri ekpatə́m eyima-efup ejûm ka egboóm ka nchot na mfoné-mfoné Obhasi.

³²Tit ên ebhú áji nji o raŋê ên mbá o mə́ŋe ên achot Obhasi, kpe noŋ o yéne ên oseŋe kpe-eji, ó ka maghé ên achot amê. O gyími ên akát á sî nsi.

³³Ebhú áji, ane á kára ên atû na oseŋe ka ndûm éré. Ebhú etat ó chəmá ên na atem-ane mba á yena fə́ne oseŋe ka ekpak njí.

³⁴Ó chəmá ên o yéná oseŋe na ane ókúmí, o fôn ên a ri ogyebhá-ḿbə́ŋé nji ane á tábha iyîm ibhə́né. Echî aŋ? O mə́ŋe ên sê ó fon ên iyîm mbi í chiŋi ábhi. Ḿbə́ne ábhi mbi o fonê ên í kí kət ka ótúm-ótúm.

³⁵Nâ ka yíghi ên mân ḿbə́ŋé ka nji Obhasi a chimî. Ḿbə́ŋé ekíím ntʉ́ghi nnyí a fôn ekpatə́m ekəp.

³⁶Echî é nóbhe ó kəp ên ḿbə́ŋé é rî sê, ó kəp ên, tîk ó yim ên nji Obhasi a wóme ó fôn ên ekəp nji yê a chimî.

³⁷A chimî sê, “Ka mkpât ebhú chiîŋ, yê nnyo sê a kə́ bha, a kə́ bha á bhó bhibhi ebhú.

³⁸Kən ane abhámé mba ń ko ekpin ábho bəre é rî ka nnyen-i-mbá, tîk á fôn ekpin ka ḿbə́ŋé nnyi á kíi na mme. Kən á tʉ biji á yíghi na mme, ḿbə́ŋé tîk á bhó gyebhé ə̂m na ábho.”

³⁹Kən êt é ka joé mbá á tʉ̂k áno biji, á kpok á tana. Êt é ki ḿbə́ŋé é sem.