Read ejagham Ane ibru, echî 11 Bible Online

Ane ibru, echî 11 - ejagham bible

Ane ibru, echî 11

¹Ḿbə́ŋé ekíím a ri ekamám se tîk e fôn ejûm nji é chighá. Se tîk e fôn fə́ne nji kpe na amə̂t e nyə́ne é ka yén.

²A ri ḿbə́ŋé ekíím nnyí nâ a yimî Obhasi a sə́re se ane éməné á yîm nono.

³Ḿbə́ŋé ekíím nnyí nâ a yimî êt e kâm sê Obhasi a kóe eyum í nnyo ejê, a yîm ngun. Nâ é fap sê iyîm mbi é yena nná á yími ka iyîm mbi é bhó yen.

⁴A ri ḿbə́ŋé ekíím nnyí nâ Abel a karê agore mbâ Obhasi, Obhasi a kô kən a táŋe nji Keyin. A ri ka obhô ḿbə́ŋé ekíím nnyí nâ Obhasi a kóe ekpin Abel se é rî ka nnyen-i-mbá. A kâm fə́ne agore amê. Abel nnyó ta a kpô, kən ka ḿbə́ŋé nnyi a kíi na Obhasi, a nyə́ne a chorá nchot na êt égyé.

⁵Ḿbə́ŋé nnyi Enok a kíi na Obhasi nâ a yimî Obhasi a kô yê a jak ka ósô mbít. Ebhú a táne áno á wôm yê á ká yen, ka Obhasi a kô yê a jî ka ósô. Kən a bhâ jî, á gae yê á yen sê a yîm é gyébhe Obhasi ka ḿbə́ŋé.

⁶Ó ka kí fə́ne ḿbə́ŋé na Obhasi, eji ó yimá é gyébhe yê ka ḿbə́ŋé cháŋ, ka kpe énê nnyo á woma a jî a kpíri Obhasi, a ri a kam se Obhasi a ri. A ri a kam fə́ne se Obhasi a kí karé ekəp mbâ nne kpe nnyón nnyo á woma a məŋé yê na ḿbə́ŋé-a-ḿbə́ŋé.

⁷Ka ḿbə́ŋé nnyi Nowa a kíi na Obhasi, a yûk nchot nnyi Obhasi a sə́re yê ka ekpak iyîm tîk í fâp. A yûk Obhasi a jíghi yê a gbê mân okpi ibhutu obhê mbi ó yîm efun ejê é sêm. Ḿbə́ŋé nnyi Nowa a kíi na Obhasi a tóŋe se ngun á gbo. Obhasi a kô fə́ne ekpin í Nowa se é rî ka nnyen-i-mbá, ka a kíi ḿbə́ŋé na yê.

⁸A ri ḿbə́ŋé nnyi Abraham a kíi na Obhasi nâ a yimî yê á ka taŋé nji Obhasi a bhiŋî yê se a ji ebhat nji a chimî a káre yê. A mághe eték ejê a jak ebhat eték nji á ka məŋé.

⁹Ka obhô ḿbə́ŋé nnyi a kíi na Obhasi, a mághe a jak ka nsi nnyí nnyi Obhasi a chimî nná yê. A jî jóe noŋ njéné a kumá ka abhon-í-ntəm noŋ Isak na Jakop. Nji Obhasi a chimî Abraham, é gbóe fə́ne é káre abhon mbá ábháe noŋ adíghá-ekʉ̂.

¹⁰Echî Abraham a yúghi Obhasi a ri jen? Amə̂t amê á rî a ri ka eték nji Obhasi nâ a gbeê na ndéné nnyi a sonê oson. Obhasi nâ a kére ekpak eték áji é kí joé.

¹¹Ka ḿbə́ŋé nnyi Abraham a kíi, kpe na okúí obhê nji kə́n a rô fon mmon, a bhâ chə́bhe ńsé mmon. Kpe nkáé owe Sara nnyo a ri ngum, a kô oya. Abraham a kâm se Obhasi nnyo a chorê se yê tîk a jî mmon, nne áfúbhí asík.

¹²Nâ mân ka obhô nne yót nnyo a kúi ta a kí kpiri oyəm obhê, biyábhé-abhon á sui osúí noŋ kpe ńdʉnândʉ ka ósô. Abhon kpe mfan cháŋ noŋ ésébhe ka mkpe aya.

¹³Ábho mbá chénchén á kíi ḿbə́ŋé na Obhasi ta á kpô, á ká fon ejûm nji Obhasi a chimî, kən á yên ńjə́ne mbâ nda, á gbíŋi ńjə́ne na ogyebhá-ḿbə́ŋé. Á mə́ŋe sê nsi nnyí, nnyi ábho asík, á bháe a ri ojéné.

¹⁴Ane mba á fon íkíkéré mfi sê ábho á rî ka nsi nnyí noŋ ajéné, á kí toŋe jáé sê ábho á wóme nji ábho eték.

¹⁵Ebhú á chóra nná á kpek na nsi nnyi ábho á mághe, kə́n á kí məŋé sê ofú bhə́t á kí chəbhé njəm ka ńnyə́ne.

¹⁶Kən ka ekpak é yen, ane mbá á chóra á kera a ri na eték nji é chíŋi nji ndaŋa-mbá. A ri eték ósô. Ka obhô mbí, é bhó joé ejûm ísonê mbâ Obhasi nji ane mbá á bhiŋ yê sê Obhasi ábho. Echî aŋ? Yê Obhasi a tʉ́ri eték a kî ábho.

¹⁷Ka ḿbə́ŋé nnyi Abraham a kíi na Obhasi, nji Obhasi a gaê yê ogaé, a kô mmon owe Isak se a yúí a karé agore mbâ Obhasi. Abraham nnyo Obhasi a chimî nná onono a káre yê, a kâm se yê a yúi mmon yót ányo nnyo yê a fonê, a karé agore mbâ Obhasi.

¹⁸A kamê áno kpe noŋ Obhasi a sə́re yê se, “Biyábhé-abhon abhâ á kí dʉ mbâ Isak.”

¹⁹A kamê ka a kére ka ḿbə́ŋé se Obhasi a bhîk eyimím mmon nnyó a chəbhé njəm ka ekpin. Kə́n e kô sê Isak a kpô kən a chə́bhe njəm ka ekpin a kpúghi ńsé owe áfo.

²⁰Ka ḿbə́ŋé nnyi Isak a kíi na Obhasi, a káre enare mbâ Jakop na Isa.

²¹Ka ḿbə́ŋé nnyi Jakop fə́ne a kíi na Obhasi, ebhú a kí kpo, a káre enare mbâ abhon í mmon owe Jusep, yót na yót. A tə̂m biji ka ítí-ejen ifê, a káre ekûp na ejík mbâ Obhasi.

²²A ri ka ḿbə́ŋé nnyí Jusep fə́ne a kíi na Obhasi nâ ebhú a kí kpo a chôt nchot a kpê na ebhú ane Isrel á kí maghé Ijip. A sə́re ekpak á kí yim na biji ibhê.

²³Ka ḿbə́ŋé nnyi ásé Mosis á kíi na Obhasi, á bhə̂t mmon ábho Mosis ka nnyam-ósô ésá, ka á yen sê mmon nnyó á ka joé chichi mmon. Á ká fup kpe ebhín í Ntûfâm eték Ijip.

²⁴Ka ḿbə́ŋé nnyi Mosis a kíi na Obhasi, ebhú a kúi, á ka kam á bhiŋ yê sê mmon nnyo mmon i Ntûfâm Ijip nnyo nne-nkáé a jíi.

²⁵A sâŋ se yê a yén oseŋe mbi ane Ijip á kára ane Obhasi, na nji a kumí ka obhí, a fon ogyebhá-ḿbə́ŋé mbi ó bhó kət.

²⁶A kére se oseŋe eyéném ka obhô Jisos Krayis, ó fon efaŋ ó chiŋi chénchén efaŋ Ijip, ka a kíi amə̂t a ri ka ekəp nji Obhasi a chimî.

²⁷Ka ḿbə́ŋé nnyi Mosis a kíi na Obhasi, a mághe eték Ijip, á ka fon efup se Ntûfâm Ijip tîk a yâm ḿbə́ŋé. Echî aŋ? A kə́bhe ḿbə́ŋé, ka é rî bəre a yên Obhasi nnyo nne á bhó yen.

²⁸Ka ḿbə́ŋé nnyi a kíi na Obhasi, a róghe erom í Ntə̂m Osʉ́ŋ. Nan? A sə́re ane Isrel á nyát agyʉ́ŋ ka ntə̂m ábho. Tîk é dʉ̂ áfo, énjel nnyo á bhak abhon í ndaŋa-mbá chénchén ka Ijip oyúí, a kâ yúi mba ábho eróŋ.

²⁹Ka ḿbə́ŋé nnyí ekíím, ane Isrel á yáŋe Ébhí-aya na akát noŋ kpe á jená ka óráné-ngun. Kən ane Ijip á kpó to á bhá gyé á yáŋe, aya a kə̂n ábho a sê.

³⁰Ka ḿbə́ŋé nnyi ane Isrel á kíi na Obhasi nâ a yimî ábhághé-ojû mma á gbée á fáre Jeriko á gyʉ́i á gbô nji á jen á fare ḿmáne ka mfín enígisá.

³¹Ka ḿbə́ŋé nnyi Rayap nnyo nne-nkáé ejen a kíi na Obhasi, á ka kpó noŋ ane mba á ká yuk Obhasi. A tóŋe se yê a kî ḿbə́ŋé ka a kóe ane Isrel mba á bháe ka ebhə̂t á bhá mə́ŋe ndə́p eték, a bhə̂t ábho ka njû eye.

³²N kí kpo chot jen ka nchot i ḿbə́ŋé ekíím nnyí? Ebhú tîk é bhó bhik ka esə́rə́m ên ḿ kpê na Gidiyon na Barak na Samson na Jefa na Debhit na Samuwel na akará-otîp Obhasi éməné.

³³Ka ḿbə́ŋé nnyi ane mbá á kíi na Obhasi á nôk na otúi ka otúi, á kô érûm, á tâŋ nték ábho nono, Obhasi a chími ábho onono. Ka obhô ábho, oki ó bhúi onyo,

³⁴birəmta-ngûn í tân, ngyêm akparanja a fúni ábho. Ogóŋ ó mân ábho, á chə́bhe afoná-ikom, á chə́bhe arûm-ane ka enok, á yîm ane-ebhan ábho ka bifun á bê ábho.

³⁵Ka ḿbə́ŋé nnyi á kíi, etʉ̂ ane-akáé á kpô yén ane ábho mba á kpo, nji á chə́bhe njəm ka ekpin. Á káre etʉ̂ ekpatə́m oseŋe, kən á ká taŋe Obhasi sê á yíghi ábho abhô, ka á fóne ka ḿbə́ŋé sê kpe ábho á kpóe okpó, tîk á chə́bhe njəm ka nnyen ekpin nji é chíŋi nji mfá-mfá.

³⁶Etʉ̂ á fôn ekpatə́m atû, á tə̂m ábho ekpatə́m í bhatəm, á fî ábho á kâk ka ókúmí.

³⁷Á tûp etʉ̂ ábho na atáé, á yâ ábho ka mbat ébháe, á yúi ábho na akparanja. Á chíŋa na ogu obhúi sê ḿfô ábho, okpák ó noghá ábho, ane á nyerá ábho achot á kará ábho oseŋe.

³⁸Ane mbá chénchén ngun nnyí á ka nop eji nji ábho kə́n á kumi. Á jená á bhuŋa ka etə́m na ka ngûm agúí, á gyek otáé ka otáé.

³⁹Kən kpe noŋ Obhasi a kamê se ane mbá á ki ḿbə́ŋé ka etʉri na yê, á ká fon ejûm nji yê a chimî.

⁴⁰Echî aŋ? Obhasi a fonê íkíkéré etat mfi no a kpê na êt chénchén. A kére se a chəm êt na ábho a yim ábho á tʉri obhik ka ochî obhê.