Read ejagham Ane ibru, echî 12 Bible Online

Ane ibru, echî 12 - ejagham bible

Ane ibru, echî 12

¹N kí goré ên bəre na atî-isê ḿbə́ŋé ekíím na Obhasi mba á súi ngûm, deê é bhûm ên mân chénchén iyîm mbi í kí gbʉi êt e kâ tôp Obhasi. É mághe ên fə́ne obhí chénchén mbi ó bhó wom êt é mághe achâk iyîm mmá. Deê é gyímí ên son-son, é bhéné egaé-ábhiî njí nji Obhasi a kî nná ka ochî obhə́ré. Deê é bhéné ên ńjə́ne na okə́bhá-ḿbə́ŋé.

²Nji e kí bhenâ ên, deê e kébhá ên Jisos nnyo a ri ndaŋa-mbá, nnyo fə́ne a kí yim êt é tʉ́ri obhik ka ḿbə́ŋé nnyi e kíi na Obhasi. Ka obhô ogyebhá-ḿbə́ŋé mbi Obhasi a kíi yê, a kâm ekʉ̂ ka ego na ekpatə́m ísonê. Mfá-mfá a kun ágo ka ekumi ejík mkpe obhô-orûm Obhasi ka ekumi otúi Obhasi.

³Fon ên íkíkéré kpeê ên na yê nnyo a kə́bhe nná ḿbə́ŋé kpe na oyírí mbi ayimá-obhí á fóne na yê. Nâ ka kâm ên o kêt ên ó yíghi ên ḿbə́ŋé nnyi o kíi ên na Obhasi.

⁴O kí nok ên na obhí, é fubha ên, kən é nyə́ne kpá é ká si nji agyʉ́ŋ amə́né á kí bhət ka nsi.

⁵Ó gyini ên okaghá-ḿbə́ŋé mbi Obhasi á kaghá ên nji á chorá na ên noŋ abhon abhê a? Ka á séŋe sê, “Mmon omé, yûk Obhasi ka ebhú á kpəré wâ se ó yim obhí. Kə̂p ḿbə́ŋé nji á fame wâ.

⁶Echî é rî sê, Obhasi a kí fame a ri ane mba yê a korê, a kpərá fə́ne kpe nnyón nne nnyo yê a kamê se a chəbhé mmon owe.”

⁷Kə̂p ên ḿbə́ŋé nji o kí yen ên oseŋe noŋ ekpərə́m nji ńsé. Echî aŋ? Obhasi á yimá ên áno noŋ abhon abhê. Ó nok oyén ên nnyón mmon nnyo ńsé á bhó kpəré yê nji mmon a yîm obhí?

⁸Ájoé á ká kpəré ên nji ó yim ên obhí noŋ á kpə́re abhon mba ngá chénchén nâ ó ka joé ên mfoné-mfoné abhon. O ri ên noŋ abhon mba nne a jíi ka éré.

⁹Ásé abhə́ré ka nsi nnyí á kpə́ra êt nji é yim ejûm ebhí, e jíghá ábho. Kən mân Ńsé owəré ka ńtʉgântʉ! E fonê ka ejíghím yê é chíŋ ochíŋ, é fôn ekpin.

¹⁰Ásé abhə́ré ka nsi nnyí, ebhú etat á kí kpəre êt ka mkpât ebhú ka ekpak á kére se é rî nono. Kən Obhasi á kpərá êt ka onono obhə́ré se é chə̂m é fôn ekpin ejê nji é ká fon akôp.

¹¹Ka mfá-mfá njí, chénchén ekpərə́m nji á kí kpəré êt é nógha êt ka biji, é bhó gyebhe ka ḿbə́ŋé. Kən ka nsígha-njəm ebhú, é kí yim nne nnyo á kpəre yê ka ekpak njí a fôn ekpin ka nnyen-i-mbá, a fôn fə́ne enare.

¹²Nâ mân dʉî ên ngyím, obhô ó tə́ne, ekát é sôn.

¹³Yim ên mbá a joé tə́níní nnyi o kí chem ên ó chíŋ. Tîk ó ro kpó joé noŋ abhə́né, kən ó kí son ên oson.

¹⁴Nok ên ekpak o kí fon ên ekone na ane chénchén, na ekpak fə́ne nji ó bhó fon ên ekpin akôp. Áno asík, nne nnyo a kí yen Ńtâ Jisos cháŋ.

¹⁵Nôk ên ekpak nji nne kpe yót á bhó kət nnyo á ka fon onobhá-eji Obhasi. Deê kpe oyámá-ḿbə́ŋé bhə́t ó kâ fâp, ó bhá na okpóŋe ka ekam ejə́né. Ntʉ́ghi okpóŋe mbí ó kí yim ane etî-etî á fôn ekpin akôp.

¹⁶Deê nne kpe yót a kâ kâk biji ka achot akôp enuŋúm na ane, na kpe a maghé achot Obhasi noŋ Isa nnyo a gurî ńgyímí eye noŋ mmon i ndaŋa-mbá ka ntə̂m édî yə́t.

¹⁷Ó məŋe ên sê ebhú á kpô chəbhé njəm a kí nok yê a fon enare nchane, á tên yê akarám. A rʉ́ri obhə́bhe ó təbhá se á rúi áfo á káre yê, kən chichi, mbá kpó cháŋ.

¹⁸É rî sê ó ka sí ên kpá egúí áji noŋ ane Isrel. Ó ka sí ên egúí áji nji ngûn ń dûk. Ó ka sí ên kpá eji enyak áji na ejírim, ekpatə́m í mfêp a noghá.

¹⁹Ó ka yúk ên abhukpoŋ mma á fîk na eyum nji nne á yuk, a bê a féne njəm se á kâ kpô chot yê a yúk.

²⁰Ane éməné abhə́ré mba á síi, á ká bhik ekəbhə́m ḿbə́ŋé á tóp ebhín nji á káre sê, “Kpe nnyam etə́m nâ a kəmê egúí njí, á kí tup ńnyə́ne na atáé.”

²¹Ejûm nji á yéne a ri ekpatə́m eyimá-efup ejûm. Ta Mosis a chôt se, “Efup é fî ə̂m ta n choghá ka biji.”

²²Kən ên ó bha ên ó si Egui Sayon. Ó si ên eték í mfoné-mfoné Obhasi nji é rî nâ Jerusarem ósô. Ó si ên eji baénjel á rî kpe mfan cháŋ.

²³Ó bha ên ó si echəme ogyebhá-ḿbə́ŋé abhon í ndaŋa-mbá Obhasi mba á seŋ obhiŋ ábho ka ósô. Ó bha ên mbâ ntáŋa-achot ane chénchén nnyo a ri Obhasi. Yê nâ a ri Obhasi ńtʉgântʉ ane ano mba á yîm á tʉri obhik ka ochî obhê.

²⁴Ó bha ên mbâ Jisos ntʉra-achot ka ngyím i mfê nnyi Obhasi a fonê na nne. Ó bha ên mbâ agyʉ́ŋ mma á gbóe ka nsi, á bhâk na nnyen otîp ó chíŋi agyʉ́ŋ Abel.

²⁵Nok ên o kâ táŋe ên Obhasi nnyo á chorá áno. Echî aŋ? Ájoé ane éməné á ká be ta á sém nji á táŋe yê nnyo a sə́re ábho ka nsi nnyí se á kó ebhú, êt é bhó bhik ebéém ta é sém ájoé é taŋe yê nnyo a ri ka ósô a sə́rá êt se é kó ebhú.

²⁶Ka ebhú éməné áji, eyum nji é fábhe yê ka nnyo é yîm nsi a nyíŋi. Mfá-mfá a chími se, “Ntə̂m yə́t nnyi n kí kpo nyiŋí ngûm, é bhó joé nsi-ńsî, n kí nyiŋí ósô eróŋ.”

²⁷Eyum í nchot njí sê, “É kət ntə̂m yə́t,” é kí toŋe êt sê Obhasi tîk a yíghi mbi í kí nyiŋi, nâ ngun nnyi yê a yimî, nnyi á bhó nyiŋi, a kə̂t.

²⁸Nâ deê é káre mân ekûp mbâ Obhasi nji a karê êt otúi nne á ká bhik enyiŋím. Ka obhô mbí, deê é káre ên yê nkat nnyi a kí gyebhe yê, é káre na ejík, e foná fə́ne efup na yê.

²⁹Echî aŋ? Obhasi owəré a ri noŋ erəmta-ngûn nji é rígha kpe njə́n ejûm.