Read ejagham Ane ibru, echî 13 Bible Online

Ane ibru, echî 13 - ejagham bible

Ane ibru, echî 13

¹Choŋ ên ochî o korá ên atem noŋ abhon-í-nnyen.

²Ka mághe ên efiím ajéné, ka ebhú tat ó fik ên áno a ri baénjel, kən ó ka məŋé ên.

³Tirâ ên ane mba á rî ka ókúmí noŋ kpe ên afoné o ri ên eróŋ ka ókúmí. Tirâ ên fə́ne ane mba á kára ábho oseŋe kpe ên fə́ne o kí yen ên oseŋe mbí.

⁴Deê nkáé na ndûm á jíghí atem. Nne ábho kpe yót a kâ gbô ekun, ka Obhasi a kí taŋ mgbogha-ekun na nyima-achot-akôp.

⁵Ntí ń kâ fâŋ nne ń chíŋ. Nji o fonê, deê é bhîk wâ. Echî aŋ? Obhasi a chorê se, “Tîk ḿ bó maghé wâ. Tîk ḿ bó yighí wâ amə̂t.”

⁶Nâ kə́n e chôt, efup é bhó fon sê, “Ńtâ Obhasi nâ á nyaŋa ə̂m, efup ḿ bó fon. Nne a kí bhik ə̂m jen oyim?”

⁷Tirâ ên ane-echî abhə́né mba á kpíi ên achot Obhasi. Kére ên nji é fabhe ka ekpin ábho, o tóbhá ên mân ekpak í ḿbə́ŋé ábho nnyi á kíi na Obhasi.

⁸Jisos Krayis ka ényané, ka égyé, na ka ótúm-ótúm, a ri Jisos yót. Á bhó yoŋe.

⁹O kâ kâm ên á tʉ̂ ên á kâk ka etə́m na ekpak okpígha-ejûm egyê-egyê mbi ebhú tat nne á ka nok oyúk. É nóbhe sê onobhá-eji Obhasi ó yîm ḿbə́ŋé nne a son. Bibhín sê ka dí ńjî na ńji, í bhó nyaŋe ane mba á fîk ḿbə́ne kpe mkpât.

¹⁰É fon ejə́ré eji é tubha ekəp mbâ Obhasi. Akará-agore Obhasi mba á túbha ekəp ane Jus ka nji ábho etəm, á ká fon ikom mfi á kí di kpe ejûm ka ejə́ré eji.

¹¹Echî aŋ? Ntûfâm akará-agore a kók a ri agyʉ́ŋ onyam a bhák ka Mfoné-mfoné Eji Obhasi, a kará agore ka obhô obhí ane. Kən biji onyam mbí, á yôk a ri ka etím éré.

¹²Nâ noŋ é rî fə́ne na Jisos. A yéne oseŋe ka etím éré eték í Jerusarem se yê a kó agyʉ́ŋ amê, a yighí ane akôp ka ochî Obhasi.

¹³Nâ deê mân é fáp é kpúghí yê ka etím éré, é kó fə́ne ísonê ka ekpak nji yê a kə́bhe ḿbə́ŋé, a kô.

¹⁴Echî aŋ? Ka ngun nnyí é ka fon eték nji é bhó man, kən é kebha a ri eték nji é kə́ bha.

¹⁵Ka mbiŋ i Jisos Krayis mân, deê e kâ mághe ên ekarám efin nji é rî nâ ekûp na ejík mbâ Obhasi. Ḿfa nâ ekəp nji nne nnyo a kamê na mbiŋ eye.

¹⁶Ka gyíni ên onono eyimím, o kirá ên na atem nji-nji o fonê ên. Nâ ntʉ́ghi ekəp nji é gyébha Obhasi ka ḿbə́ŋé.

¹⁷Yúgha ên ane-echî abhə́né, karê ên biji mbâ ábho, ka a ri ábho nâ á bhabha ńtʉgântʉ eyəné. Ábho nâ á kí səre Obhasi jə́t na jə́t ekpak á fíi ka nsi nnyí. Ó yuk ên ábho, tîk á yíma etûm ábho na ogyebhá-ḿbə́ŋé. Kən áno asík, tîk á bhó yim na ogyebhá-ḿbə́ŋé. Ńji tîk é bhó nyaŋe ên.

¹⁸Gorê ên Obhasi mbâ eyəré, ka é məŋe sê ḿbə́ŋé eyəré a ri jáé, é woma fə́ne sê e yimá kpe bhaghé ejûm ka nnyen-i-mbá.

¹⁹N kí goré ên na ḿbə́ŋé-a-ḿbə́ŋé bəre ó góre ên Obhasi sê a yim ə̂m ń chə́bhe njəm ḿ bá mbâ eyəné babhap.

²⁰Ńtâ Obhasi owəré, Nkara-enare, a yîm Ntûfâm owəré Jisos Krayis a nyə́me ka ekʉ̂. A yîm yê mfoné-mfoné mbábhá ane abhê. Ka nan? A yimî ka agyʉ́ŋ í Jisos mma á rî nâ eriŋ í ńgyímí mfê nnyi Obhasi a kpó fon na ane. Ńgyímí nnyí á ka fon ntə̂m.

²¹Deê Obhasi owəré nnyó a karé ên chénchén íkíkéré mfi no, ó bhîk ên eyimím nji yê a wóme. Deê yê a yim êt chénchén ka obhô Jisos Krayis e yimá iyîm mbi yê á yen, ḿbə́ŋé a gyébhe yê. Deê ejík é jóe é káre Jisos Krayis ka ótúm-ótúm. Áno.

²²Atem-abhon-í-nnyen, n kí goré ên bəre ó nâ ên biji ó yúk ên otîp obhámé mbí, mbi ó ká ti otí.

²³Məŋê ên sê á yighi ntem-mmon-i-nnyen owəré Timoti ka ókúmí. Á waghe obhá, tîk e bhák ágo na yê, é bhá yén ên.

²⁴Kûp ên ane-echî abhə́né fép, é kpê na chénchén ane Obhasi ágo. Ane Obhasi mba eték í Itariya, á kí kup ên.

²⁵Deê onobhá-eji Obhasi ó jóe na ên chénchén.