Read ejagham Ane ibru, echî 2 Bible Online

Ane ibru, echî 2 - ejagham bible

Ane ibru, echî 2

¹Nâ deê é kó ên mân ebhú e yúghá achot mma á kpîk êt, e kâ bhâ obhúŋ é mághe ḿmáne.

²Echî aŋ? Á toŋe otîp mbi baénjel á kóe á bhak éməné sê ó rî ka echî. Nne a rô tóp ḿbə́ne, Obhasi a kpə́re yê fə́ne ka ekpak é bhíghi obhik.

³Ájoé mân é bhó yuk ekpatə́m otîp mbí, mbi ó kí yim êt e sêm, e kí yim nan á bhó kpəré êt? Ńtâ Jisos nâ a raŋê mbá a sə́re otîp mbí, ane mba á yúghi yê fə́ne á tóŋe êt sê achot mmá á rî ka echî.

⁴Obhasi yê ḿfoné a gyími fə́ne ntî-isê achot mmá chénchén ka biriŋ na iyîm emana-biji na ntûm okpógha-biji nnyi a tóŋe. A kíri fə́ne ane bikəp Obhasi Ebhare Ntʉgantʉ ka ekpak nji yê a wóme.

⁵Ngun nnyi é səra nná sê tîk a bhák, Obhasi á ka yim ńnyə́ne se baénjel abhê á kúmi otúi ngun i nchane.

⁶Kən ka ekpak á séŋe sê, “Obhasi, nne a fábhe jen kpá títí nji ta o kí kerâ yê. A fábhe jen nji ta o kə́ bha se ó bhá nyáŋé yê?

⁷Ka mkpât ebhú chiîŋ, o yîm yê a joé ka óséré baénjel abhâ. O kô mân yê o káre otúi se a fon ekûp na ejík.

⁸O kâk fə́ne chénchén iyîm ka óséré obhê.” Á sə́re sê Obhasi á kíi kpe bhaghé ejûm ka óséré nne, kpe ejûm jə́t é ká kət. Kən e nyə́ne é ka yén eji nne a kúmi otúi a káre chénchén ejûm.

⁹E məŋê a ri Jisos. Obhasi, ka onobhá-eji obhê, a yimî yê a jóe ka óséré baénjel ka mô ebhú, a kpó ekʉ̂ ka obhô ane chénchén. A bhâ káre yê mân otúi se a fon ekûp na ejík ka obhô oseŋe mbi a yéne ka ekʉ̂.

¹⁰A ri Obhasi nnyo a yimî chénchén iyîm, iyîm chénchén fə́ne í rî ka obhô obhê, nâ a kére se ájoé yê a kí ko chénchén abhon abhê á bhá ka ejík ejê, é nóbhe a yim Mmon obhô-orûm owe, Jisos, a yén oseŋe kən a tʉrí obhik nji a kí yim ane á sém.

¹¹Yê, Jisos, nnyo á suk obhí ane é kpê na ane mba yê á suk nná obhí, á fóne Ńsé yót. Nâ njə́ne Jisos á ka kó noŋ ejûm ísonê ka ebhiŋím ábho se abhon-í-nnyen.

¹²A chorê na Obhasi se, “N kí səre abhon-í-nnyen abhámé nne nnyo we o ri. Eji atem-abhon-í-nnyen á kumí, áfo nâ n kí karé wâ nkat.”

¹³A kpô chot fə́ne se, “N kí ki ḿbə́ŋé amé na Obhasi.” A chôt fə́ne se, “Ńgyê mme n di na abhon mba Obhasi a karê ə̂m.”

¹⁴Ka eji abhon Obhasi ábha a ri ane na agyʉ́ŋ na biji, Jisos fə́ne a bháe noŋ nne. A yîm áno se yê á kpo ekʉ̂, tîk a bhíbhi Satan, é dʉ̂ áfo a rô kpó fon ikom na ekʉ̂.

¹⁵Ka ekpak njí, a kí yim ane á sém mba mbôp nnyí á rî ka osʉ́ŋ ka á fúbha ekʉ̂.

¹⁶Ka nan? É toŋe jáé sê Jisos Krayis á ka bhá onyáŋé baénjel, a bháe onyáŋé abhon Abraham.

¹⁷Nâ ńjə́ne é rî nono sê Jisos Krayis a joé noŋ atem-abhon-í-nnyen abhê ka chénchén ejûm, tîk a chə́bhe mân mfoné-mfoné ntûfâm akará-agore ka ochî Obhasi. Tîk a rik fə́ne atem-abhon-í-nnyen abhê nsôn, a yimá etûm ejê na ḿbə́ŋé-a-ḿbə́ŋé, yê a su obhí mbi ane Obhasi á yími.

¹⁸Ka nan? Yê ḿfoné a yên oseŋe, Satan a gáe yê, nâ njə́ne a kí bhik enyáŋám ane mba Satan a kí gaé eróŋ.