Read ejagham Ane ibru, echî 4 Bible Online

Ane ibru, echî 4 - ejagham bible

Ane ibru, echî 4

¹Nji Obhasi a chimî nná se yê á kok ane abhê a gyé eji oyoá-biji ejê, é nyə́ne. Nâ deê mân é fôn ên efup á kâ bhâ otáŋ nne owəné kpe yót sê á ka bhik nji á gyek eji njí.

²Ka nan? Otîp Obhasi ó bháe mbâ eyəré noŋ ó bháe eróŋ mbâ ásé éməné abhə́ré. Kən mbi ábho ó ká fon orʉrí, ka ábho mba á yúghi oyúk, á ká ki ḿbə́ŋé na Obhasi.

³Êt mba é ki ḿbə́ŋé na yê, e kí gye eji oyoá-biji ejê ka ekpak nji yê a chorê, “Ḿbə́ŋé a yâm ə̂m, n chími bəre, ‘Ábho tîk á bhó si eji oyoá-biji ejámé bhúghí-bhúghí!’ ” Kən Obhasi a bhá chot nchot nnyí, ta etûm ejê ka eyimím ngun é man.

⁴Ka eji etat ka nwet Obhasi, á chóre á kpê na osúí mfín enígisá sê, “Obhasi a mân etûm ejê kən a yóe biji ka osúí mfín enígisá.”

⁵Á kpô chot nchot ńnyi yə́t sê, “Obhasi a toê se, ‘Tîk á bhó gye ka eji oyoá-biji ejámé, á yóe biji na mme bhúghí-bhúghí!’ ”

⁶Nâ é rî sê, eji oyoá-biji njí é nyə́ne é chighá ane etat á gyé, ka ane ndaŋa-mbá á ká gye, ka á ká top nji otîp ó wóme.

⁷Kən Obhasi mân a kpô kak ofú etat se a ri “Égyé.” Nyâ a chîŋ ta a râp kən a bhâ chôt nchot ofú mbí ka nnyo Debhit se, “Égyé, kpe o yúghi ên eyum Obhasi ka sôn ên echî.”

⁸Ebhú sê Josuwa a kóe nná ane abhə́ré éməné a sî ka eji oyoá-biji Obhasi eê, kə́n é ká kət Obhasi a kpó kak ofú mbi tat.

⁹Kən ka eji a kâk, ofú oyoá-biji ábhi ó nyə́ne mbâ ane Obhasi.

¹⁰Kpe énê nnyo a gyée eji oyoá-biji Obhasi á maghe fə́ne ejê etûm a yóe biji noŋ Obhasi yê ḿfoné a maghê.

¹¹Nâ deê mân é nôk ên é gyé eji oyoá-biji Obhasi, nne owəné kpe yót a kâ gbô noŋ ásé éməné abhə́ré mba á ká yuk nchot Obhasi.

¹²Echî aŋ? É məŋe sê otîp Obhasi ó rî mbít, ó kí yim etûm. Ó gyem ó chiŋi kpe akparanja mma njəm i ngyêm ébháe. Ó kí jəm ó gyek ta ka étíŋanti ńtʉgântʉ na ḿbə́ŋé, étíŋanti akôn í biji na aron ka ekə́p. Ó gyêk ka íkíkéré ḿbə́ŋé, ó məŋá ejûm nji nne a wóme a yim ka ḿbə́ŋé.

¹³Kpe nne yót, kpe ejûm jə́t fə́ne cháŋ ka nsi nji Obhasi á bhó yen. Kpe jen é rî jáé ka nsi ka ochî obhê. E ri é gyímí fə́ne ka ochî obhê, é səra nji-nji e yimî.

¹⁴Deê mân e kâ yíghi obhô ka ejûm nji e kamê. Echî aŋ? É fon Jisos Krayis, Mmon Obhasi, ka ntûfâm akará-agore Obhasi nnyo a faŋê a chîŋ ochíŋ. Yê a ri na Obhasi ka ósô.

¹⁵Jisos Krayis, ntûfâm i nkara-agore Obhasi owəré, a kí fon nsôn na êt ka ogoŋ í ḿbə́ŋé obhə́ré, ka yê ḿfoné a chîŋ fə́ne ka mkpak egaé nnyi é foná ka nsi nnyí. Kən yê á ka yim a ri obhí.

¹⁶Deê êt mân e kâ fôn efup, é jî ên e kpírá otúi onobhá-eji Obhasi, a ri êt nsôn, a tóŋé êt fə́ne onobhá-eji mbi ó kí nyaŋe êt ka ebhú Satan a kí gaé êt.