Read ejagham Ane ibru, echî 5 Bible Online

Ane ibru, echî 5 - ejagham bible

Ane ibru, echî 5

¹Kpe nnyón ntûfâm akará-agore Obhasi, á sáŋe nná ka ekam ane sê a yim etûm mba Obhasi ka mbiŋ ane. Sê a káre bikəp na agore mbâ Obhasi ka obhí mbi ane á yími.

²Ka eji nkara-agore nnyó yê ḿfoné á ka chíŋí ngyím obhí eyimím, a kí bhik efiím ane nono mba á gbóe na mba á ká məŋé ejûm nji á yíma.

³Ka obhô mbí, ntûfâm nkara-agore a fonê ka ekarám Obhasi efin ka obhí mbi yê ḿfoné á yimá na mbi ane abhê á yíma.

⁴Nne nnyo á yimá biji ibhê ntûfâm nkara-agore cháŋ. A ri Obhasi nâ á kará nne ejík njí noŋ a jíghi Eron ebhú áji.

⁵Nâ e ri é mə́ŋe mân sê Jisos Krayis á ka chóé biji ibhê á yîm yê ntûfâm nkara-agore. A ri Obhasi nâ a sáŋe yê, a chôt se, “We a ri Mmon omé, éróghé ka égyé, ń chəbhe Ńsé owa.”

⁶A kpô chot fə́ne ka eji etat se, “We o kí joé nkara-agore ka ótúm-ótúm, ka ńgyímí akará-agore nnyi Mekisedek.”

⁷Ka ebhú Jisos a ri ka nne ka nsi nnyí, a rʉ́rá ekpatə́m ekʉ̂ ta obhə́bhe ó fabha ka amə̂t, a gorá Obhasi nnyo a bhighî yê eyimím a sém ka ekʉ̂. Ka ejík nji á karé Obhasi, a fubhá yê, Obhasi fə́ne a yûk agore amê.

⁸Kpe noŋ a ri Mmon Obhasi, oseŋe mbi a yéne, ó kpî yê a yúk nchot Obhasi.

⁹Nji Obhasi a kpô yim yê a tʉ́ri obhik, Jisos a bhâ chə́bhe mân nne nnyo á yimá kpe bhaghé énê nnyo á yugha yê, a sémá ka otúm-ótúm.

¹⁰Nâ ńjə́ne Obhasi a sáŋe yê a yîm ntûfâm akará-agore ka ńgyímí akará-agore nnyi Mekisedek.

¹¹Ka nchot i Mekisedek nnyí, iyîm í rî etî-etî mbi kə́n e wôm é sə́ré ên kən é kí yuŋi esə́rə́m, ka tîk ó bhó waghe ên oməŋé.

¹²Kpe noŋ mfá-mfá ên kə́n ó chəbhe ên a ri ane mba á kí kpi ane achot mmá, o nyə́ne ên nji nne a kí kpo kpi ên ndaŋa-mbá ejûm nji Obhasi a wóme mbâ ane abhê. O nyə́ne ên o wómá achot Obhasi mma á réŋa noŋ abhê mma mmon i mfê á yabhá, á ká son noŋ mfoné édî.

¹³Nne nnyo á kət a yúghá achot mmá á ká son, a nyə́ne noŋ mmon i mfê, á ka tʉrí oməŋé nchot Obhasi nnyi á yimá nne a joá ka nnyen-i-mbá.

¹⁴Nne nnyo a kí kpighâ achot Obhasi mma á sóne oson, a ri nne-nkúí ka achot mmá. A tôp achot mmá ka ofú ka ofú a mə́ŋe ejûm ebhí na ejûm eno.