Read ejagham Ane ibru, echî 6 Bible Online

Ane ibru, echî 6 - ejagham bible

Ane ibru, echî 6

¹Nâ deê mân é jî ochî, e maghá kpá abhon iyîm mbi á kpíi ên ndaŋa-mbá ka nchot i Jisos Krayis. Deê é kúí. É kí joé a ri ebhú ebhíbhím ka esə́rə́m ên sê nne a yóŋé ḿbə́ŋé a maghé ekpin ebhí, a kí ḿbə́ŋé na Obhasi.

²Deê e kâ kpô róghé ên esə́rə́m nchot ayép efúghúm, obhô ekunúm ka echî nne se a fon enare Obhasi, enyəmə́m ka ekʉ̂ nji nne a kpô, na etáŋám nji Obhasi a kí taŋ ngun ka ótúm-ótúm.

³Ájoé Obhasi a káre, ńgyê mbi e kí kpi ên.

⁴Ane á rî mba ta á məŋe obhí na ono, á fon ekəp Obhasi á chəm biji na Obhasi Ebhare Ntʉgantʉ, kən á bhâ táŋe Obhasi. A ri ejûm eyúŋi ka esə́rə́m ntʉ́ghi ane mbá á yóŋé ḿbə́ŋé á mághe obhí ábho.

⁵Ane mbá á məŋe onobhá-eji mbi ó rî ka eyum Obhasi. Á məŋe sê ngun nnyi a kə́ bha mbá-ochî, a fonê ikom.

⁶Ájoé ane mbá á mə́ŋe iyîm mbí chénchén kən á taŋe ḿbə́ne, mbá cháŋ nnyi o kí kpo yim ábho á yóŋe ḿbə́ŋé á mághe obhí ábho. Echî aŋ? Á rî noŋ ane mba á kpo kúm Mmon Obhasi ka ego, ngun á yena á yoá yê.

⁷Nsi nnyi kpe bhaghé ebhú mbúta a nâ, a bhéré ńnyə́ne, á bhe ejûm ka ńnyə́ne, é kúi nono, ane á kô fə́ne ejûm njí á nyáŋe biji, Obhasi á kará ntʉ́ghi nsi nnyí enare.

⁸Kən ájoé ajoŋe na ájé nâ á kua ka ńnyə́ne, á ka kpó fap ejûm. Ebhú é kpiri nji Obhasi a kí to ńnyə́ne enyo. A kə̂t nnyi nne a kə́ bha okak ngûn a ríghí.

⁹Kən atem í ḿbə́ŋé, kpe noŋ é chorá áno, é ka fon efup na ên, é məŋe sê tîk o fôn ên enare Obhasi nji é kí yim ên é sém.

¹⁰Echî aŋ? Obhasi á ka joé nne amoe. Á bhó gyini ntûm eyəné na okot mbi o tóŋe ên yê nji o nyáŋe ên ane abhê. Nâ ekpak nji fə́ne o nyə́ne ên o yimá.

¹¹E kí wom sê kpe nnyón nne owəné, a nok ta a sí ntə̂m, a kâ yíghi ḿbə́ŋé. Ka ekpak nji, tîk nne a fôn ejûm nji Obhasi a chimî.

¹²Nne a kâ tʉ̂ mân njəm. Gyebhâ ên ekpin ane mba á kíi ḿbə́ŋé na Obhasi, á kəbha ḿbə́ŋé, á fôn ejûm nji Obhasi a chimî.

¹³Ebhú Obhasi a chimî Abraham onono, á ka kó mbiŋ i nne etat a chimí, é ká chiŋi eye yê ḿfoné. Echî aŋ? Nne etat nnyo a kpô chíŋí yê nnyo yê a kí chimí cháŋ.

¹⁴A chimî Abraham se, “Ka etʉri, tîk n káre wâ enare, tîk n yîm biyábhé-abhon abhâ á tî.”

¹⁵Abraham a kə̂p fə́ne ḿbə́ŋé, a chîk tata a fôn nji Obhasi a chimî yê.

¹⁶Ebhú kpe mô áfírí a ri ka eji, ane á kí chimí ka mbiŋ ejûm nji é fáŋe é chíŋi ábho. Nne á kpo chimí fə́ne ka ekpak njí, nâ ntə̂m. Echimím nji é kí toŋe sê ejûm nji a chorê é rî ka echî.

¹⁷Nâ noŋ é rî fə́ne na Obhasi. Nji a wóme a tóŋé ane mba á kí fon nji a chimî se nji a chimî é rî ka echî, a chími na mbiŋ eye yê ḿfoné.

¹⁸Nâ mân ka iyîm mbí íbháe, echimím Obhasi njí, na ejûm nji yê a chimî êt, yê á bhó səre áfúbhí. Deê êt mba e bée áno e jî bhə̂t mbâ eye, é sôn ḿbə́ŋé, é fôn nji yê a chimî.

¹⁹Amə̂t mma e kíi nná sê tîk e fôn nji yê a chimî a ri eji otə́má-ḿbə́ŋé ekpin ejə́ré. É ka fon efup ka otə́má-ḿbə́ŋé mbí. Ó kí ko êt e gyê ókʉ́rí achot Obhasi, é chíŋ mân itə̂m mfi í rî ka mbá kən ó sí Obhasi, é gyé ka eji Obhasi a ri.

²⁰Eji njí nâ Jisos Krayis a raŋê êt áno mbá a jî ka obhô obhə́ré. A ri fə́ne ágo noŋ ntûfâm akará-agore Obhasi ka ótúm-ótúm, ka ńgyímí akará-agore nnyi Mekisedek.