Read ejagham Ane ibru, echî 7 Bible Online

Ane ibru, echî 7 - ejagham bible

Ane ibru, echî 7

¹Nne nnyó sê Mekisedek éməné nâ a ri ntûfâm ebhat í Serem. A ri nkara-agore Obhasi ósô. Ebhú áji Mekisedek nnyó a kpúghi Abraham ka mbá, nâ ebhú Abraham a dʉ nnyi enok nji a noghê a tábhe érûm atúi-ofâm ebhat a dʉ. Nji Mekisedek a kpúghi yê, a káre yê Abraham enare.

²Abraham fə́ne a kíri iyîm mbi a kóe a bhák nnyi enok ka ngûm ófó, a káre Mekisedek eji nkiri jə́t. Ndaŋa-mbá echî mbiŋ i Mekisedek a ri Ntûfâm Ekpin ka Nnyen-i-mbá. Yê fə́ne nâ a ri Ntûfâm Serem, nâ se Ntûfâm Ekone.

³É ka məŋé ńsé na nnyen na kpe ndə́p-i-njû Mekisedek. É ka məŋé fə́ne eróghá-ndə́p eye, ntə̂m eye fə́ne é ka məŋé. A ri noŋ Mmon Obhasi, a kí kət nkara-agore Obhasi ka ótúm-ótúm.

⁴Ḿfa nâ nne a kí yen ńgyímí nyúp i Mekisedek. Abraham ka ńsé éməné owəré chénchén a káre yê eji nkiri jə́t ka iyîm mbi a kóe a chə́bhe njəm nnyi enok.

⁵Biyábhé-abhon í Libhayi nâ ndə́p-i-njû akará-agore Obhasi. Ábho nâ ebhín é fíi sê nne kpe nnyón á kirá iyîm ibhê ka ngûm ófó, a káre ábho eji nkiri jə́t. Ndə́p-i-njû nnyí na ane chénchén mba ngá, á rî ori a ri biyábhé-abhon Abraham.

⁶Kən Mekisedek nnyó, nnyo kpe á ka dʉ ndə́p-i-njû ane mbá, Abraham a káre yê eji nkiri jə́t. Yê fə́ne a káre Abraham enare, ńga Abraham nâ Obhasi a chimî nná efaŋ.

⁷É rî jáé sê nnyo a faŋê a chíŋi ntem nâ á kará ntem enare.

⁸Eji nkiri jə́t njí á kára mbâ akará-agore Obhasi mba á ka á kpo. Kən ebhú á káre Mekisedek, á káre nne nnyo á séŋe sê á bhó kpo bhúghí-bhúghí.

⁹Nne kə́n a tô fə́ne sê Libhayi nnyo á kará yê eji nkiri jə́t, yê ḿfoné fə́ne a káre mbâ Mekisedek ka obhô Abraham.

¹⁰Nan? Ebhú Mekisedek a kpúghi Abraham kpe noŋ a nyə́ne á ka ji Libhayi, Libhayi a ri ori ágo ka agyʉ́ŋ Abraham.

¹¹A ri ka ńgyímí akará-agore ndə́p-i-njû Libhayi nâ Mosis a karê nná ebhín Obhasi mbâ ane Isrel. Ájoé Obhasi a kóe ekpin ane se é rî ka nnyen-i-mbá ka obhô ndə́p-i-njû Libhayi mba á rî akará-agore abhê, jen mân nkara-agore nnyo tat a kpô bhá á ka bhá ka ńgyímí akará-agore Eron, a bháe a ri ka ńgyímí nnyi Mekisedek?

¹²É məŋe sê ńgyímí akará-agore á yoŋe, ebhín fə́ne é kí joé egyê.

¹³Echî aŋ? Nne nnyó nnyo é chorá nná achot mmá e kpek, a dʉ ndə́p-i-njû etat nyáŋé-nyáŋé. Nne ndə́p-i-njû eye fə́ne kpe yót nnyo a nôk ojoé nkara-agore Obhasi cháŋ.

¹⁴É rî jáé sê Ntûfâm owəré Jisos Krayis a dʉ ka ndə́p-i-njû Juda. Mosis á ka chot kpe ejûm a bháŋe na ndə́p-i-njû nnyí, nchot akará-agore Obhasi.

¹⁵Ńji é jeghe otóŋé jáé nji nkara-agore Obhasi egyê a fábhe ka ndə́p-i-njû nnyí nnyo a ri noŋ Mekisedek éməné.

¹⁶Nne nnyó á ka joé nkara-agore ka ekpak ebhín na erû ane ngun é tóŋe, kən a ri ka ikom mfi í káre yê ekpin ótúm-ótúm.

¹⁷Á chóre á kpê na yê sê, “We o kí joé nkara-agore Obhasi ta ótúm-ótúm ka ńgyímí akará-agore Obhasi nnyi Mekisedek.”

¹⁸Ebhín nji ndaŋa-mbá é ká kpo fon mân ikom ka é kət chichi, é ká kpo fon órúmí.

¹⁹Echî é rî sê ebhín í Mosis é ká yim kpe ejûm jə́t é jóe ka nnyen-i-mbá na Obhasi. Mfá-mfá Obhasi a karê êt nnyen ejûm efê nji e kí təm ḿbə́ŋé. A ri ejûm efê njí nâ é tʉ̂k êt e kpírá Obhasi.

²⁰Nji é kpo kpe áfo a ri echimím nji Obhasi a chimî se Jisos tîk a jóe nkara-agore. Ebhú nji ndə́p-i-njû Libhayi á fî echəme akará-agore Obhasi, Obhasi á ka chimí noŋ njí.

²¹Kən Jisos a chə́bhe nkara-agore Obhasi ka echimím Obhasi. A chə́bhe áno ebhú Obhasi a sə́re yê se, “Ntûfâm a chími. Á bhó yoŋe íkíkéré ifê. We nâ o kí joé nkara-agore omé ta ótúm-ótúm.”

²²Echimím njí é yim Jisos a chə́bhe noŋ ejûm nji á kóe á gyeghe ofi ka ńgyímí mfê nnyi Obhasi a kpô fon na nne.

²³Akará-agore Obhasi mba ndaŋa-mbá á tî, ka ekʉ̂ é ká kam ábho á kə́t á jî ochî na etûm ábho.

²⁴Kən Jisos a kí kət ka ótúm-ótúm, etûm ejê noŋ nkara-agore é bhó ji mbâ nne etat.

²⁵Ka obhô mbí, a bhîk eyimím ane chénchén mba á kí top yê á jená á kpira Obhasi, á sém bhúghí-bhúghí. Ka nan? Yê ngá a gyím chénchén ebhú ka étíŋanti Obhasi na nne, a tʉrá achot ane mbâ Obhasi.

²⁶É nóbhe sê é fôn ntûfâm akará-agore Obhasi ntʉ́ghi ányo. Ntûfâm nnyo á ka fon ekpin akôp, nji nne a kí to se a gbô cháŋ, ḿbə́ŋé a ri jáé, a gyím ńgô nyáŋé-nyáŋé á ka chəm na ayimá-obhí. A fâŋ fə́ne a chíŋi ósô na nsi.

²⁷Echî cháŋ nji a kí kará agore chénchén ebhú noŋ akará-agore mba ngá, ka obhí obhê yê ḿfoné na mbi ane etat. A karê agore mmá ntə̂m yə́t ányi, a rô kpó karé. A karê ebhú a kpô ekʉ̂ ka echî ane.

²⁸Ebhín í Mosis é kí saŋ nne na obhê ogbo é yîm nkara-agore Obhasi, kən eyum nji é fábhe Obhasi ka nnyo a chimî nji ta ebhín é bha. Eyum njí nâ é sáŋe Mmon owe nnyo yê ḿfoné Obhasi ta a yîm yê a jóe, kpe ekpin akôp a kâ fôn ka ótúm-ótúm.