Read ejagham Ane ibru, echî 8 Bible Online

Ane ibru, echî 8 - ejagham bible

Ane ibru, echî 8

¹Mfoné-mfoné echî nchot ka achot mmá chénchén é rî sê é fon ekpak í ntûfâm akará-agore Obhasi nnyó. Ntûfâm nnyo a kun ka eji ejík, mkpe obhô-orûm Ńsé owəré Obhasi ka ósô.

²Yê nâ a ri ágo ka mbiŋ eyəré ka eji nji Obhasi yê ḿfoné a ri. Á ká gbe eji njí noŋ etəm nji nne a gbeê na obhô obhê. A ri Obhasi yê ḿfoné nâ a gbeê ńjə́ne.

³Kpe nnyón ntûfâm akará-agore Obhasi, á sáŋe yê sê a kará bikəp na agore mbâ Obhasi ka mbiŋ ane. Ka ekpak njí, é nóbhe fə́ne sê ntûfâm akará-agore owəré nnyó a fon ejûm nji-nji a kí karé noŋ agore mbâ Obhasi.

⁴Ebhú sê owəré a ri nná mfá ka ngun, kə́n á bhó joé nkara-agore Obhasi, ka akará-agore Obhasi ta á rî ka ngun. Á kára agore mbâ Obhasi ka ekpak ebhín é fíi.

⁵Á gyébha a ri ekpak etûm nji á yíma ka ósô. É rî ekan-ékân noŋ ebhú Mosis á woma a gbe etəm Obhasi. Obhasi a sə́re yê se, “Kó ebhú, gbe etəm áji ka ekpak nji n sə́re wâ, ebhú o ri nná ka egúí.”

⁶Ka ekpak é rî, Jisos Krayis a fôn etûm nji é nóbhe é chíŋi ochíŋ nji éməné. Ńgyímí mfê nnyi yê a yimî nná Obhasi a fôn na nne, a nôp fə́ne a chíŋi nnyi ndaŋa-mbá. Echî aŋ? Obhasi a chími êt onono mbi ó chíŋi ochíŋ ka ńgyímí nnyi mfá-mfá.

⁷Ebhú sê ndaŋa-mbá ńgyímí nnyi Obhasi a fonê na nne a fonê ikom, kə́n echî nnyi fê nnyí kpó cháŋ.

⁸Kən Obhasi a yên se ane abhê á gbo. Nâ ńjə́ne a chorê se, “Ofú ó kə́ bha mbi n kí fon ńgyímí mfê na ndə́p-i-njû Isrel na ndə́p-i-njû Juda.

⁹Ńgyímí nnyí á bhó joé noŋ nnyi e fonê na ásé éməné ábho ka ebhú n kóe ábho na obhô obhámé bəre á mághe eték í Ijip. Ábho á ká fi ka ńgyímí nnyi e kamê, ka obhô mbí ń ka kpó fon ebhú na ábho.” Nâ nnyi Ńtâ Obhasi a chorê.

¹⁰A kpô chot se, “Ńgyê ńgyímí nnyi n kí ko na ndə́p-i-njû Isrel. Mfín ányi á chiŋ, n kí kak bibhín ibhámé ka íkíkéré ábho, n sêŋ ḿbə́ne ka ḿbə́ŋé ábho. Ábho fə́ne á jóe ane abhámé. N kí joé Obhasi ábho.

¹¹Echî nji á kí kpi atem ábho na abhon-í-nnyen ábho á mə́ŋe ə̂m cháŋ, ka kpe énê ábho a kí məŋé ə̂m, kpe a fábhe mbiŋ, kpe a rô fáp.

¹²Tîk n dî ábho nsôn n sû obhí ábho. Tîk n gyíni obhí mbi á yími.”

¹³Nji Obhasi a kí chot nchot i ńgyímí mfê nâ é fap sê nnyi ndaŋa-mbá a tə̂m. Kpe bhaghé ejûm nji é kí təm, é kí kui é kpô ayép é tân.