Read ejagham Ane ibru, echî 9 Bible Online

Ane ibru, echî 9 - ejagham bible

Ane ibru, echî 9

¹Kpe ndaŋa-mbá ńgyímí nnyi Obhasi a fonê na ane a fôn ibhê bibhín mbi o kí jighi. A fôn fə́ne eji nji á gbée sê á jíghí Obhasi.

²Á gbe etəm á kíri ka abhon-í-njû ábháe. Nnyo-ochî, á kî eji á kúna ńtʉ́ríkáŋ, á kî étí na édî nji á kára mbâ Obhasi. Á bhíŋa ńnyóne sê Eji Obhasi.

³Nnyo ó chiŋ osúí ḿkpéghé ḿbáe, o gyê nnyo mbá-njəm. Á bhíŋa ńjə́ne sê Mfoné-mfoné Eji Obhasi Ósô.

⁴Eji njí é fóne eji etat nji á yôk ejûm énoê egyʉ etat. Á yími eji njí na gûl. Nkop nnyi a tóŋe ńgyímí nnyi Obhasi a fonê na nne a ri fə́ne áfo. Á yími nkop nnyí na gûl. Ka etím í nkop nnyí, otʉ etat mbi á yími fə́ne na gûl ó rî. Ka etím otʉ mbí, édî Obhasi nji á bhíŋa sê mána é rî. Ítí-ejen Eron éməné mfi í kúa ájé í rî fə́ne áfo. Ntáé nnyi éməné Obhasi a séŋe nná ebhín ejê, a ri fə́ne áfo.

⁵Iyîm etat í rî mbi á tʉ́ri á kúni ka njəm-ósô nkop nnyí. Iyîm mbí í rî na afabhe mma á bhúi eji nji é tóŋe sê Obhasi a rik nsôn a suk obhí ane. Iyîm mbí í tóŋe fə́ne sê ejík Obhasi é rî áfo. Ḿfa asík nâ e kí səre chénchén na ndə́p-a-ndə́p.

⁶Á kpó man iyîm mbí etʉrʉ́m chénchén á ki, akará-agore Obhasi á jak mân kpe bhaghé ebhú ka etím mmon-i-njû nnyo mbá-ochî, á jak á kará agore ábho.

⁷Kən ka mmon-i-njû nnyo mbá-njəm, təm Ntûfâm Akará-agore nâ á gyek, ntə̂m yə́t ka eyâ. Á bhó gye fə́ne nji á ka fi agyʉ́ŋ í nnyam mma yê a kí jom a karé Obhasi ka obhí obhê, na mbi ane chénchén á yími ka énə́mé.

⁸Ka ekpak njí, Obhasi Ebhare Ntʉgantʉ a kí toŋe se mbá kən ó gyé mmon-i-njû nnyo mbá-njəm, Mfoné-mfoné Eji Obhasi, a nyə́ne á ka rəbhé, ka eji nnyo mbâ-ochî a nyə́ne.

⁹Mmon-i-njû ndaŋa-mbá nnyó a gyím noŋ eriŋ í ngun ebhú njí. É kí toŋe sê bikəp na agore mbi ane á kára Obhasi í ká yim ḿbə́ŋé ábho a joé jáé.

¹⁰Iyîm mbí chénchén í fóne ejûm eyimím í kpê a ri na édî, na ejûm egwóóm, na erû ane nji sê á sû iyîm, á sû biji, á kâ fôn akôp ka ochî Obhasi. Bibhín mbí chénchén na erû njí a ri iyîm í ngun, í kóre okóré tata ebhú é sí nji Obhasi a kí yoŋe chénchén achot.

¹¹Ebhú mân Jisos Krayis a kpô bhá noŋ Ntûfâm Akará-agore Obhasi ka ánoê achot mma á bháe, a chîŋ koŋ a gyée ka mmon-i-njû nnyo a fonê mbiŋ a chíŋi ochíŋ, á ka fon kpe akôp. Nne asík a gbeê mmon-i-njû nnyó. É fâp sê á ká gbe ńnyóne ka ngun nnyí.

¹²Nji a chíŋi a jî gyê ka Mfoné-mfoné Eji Obhasi ntə̂m yə́t, nchot fə́ne a manê áno oman. Á ka kó agyʉ́ŋ í mbúi na kpe mmon i mfoŋ a gyé. A gyée a ri na agyʉ́ŋ amê yê ḿfoné. Ejûm nji a yimî nná é yim êt é sem ka obhí obhə́ré ka ótúm-ótúm.

¹³Nne á joé na akôp ka ochî Obhasi, á kí ko agyʉ́ŋ í mbúi na kpe mma mfoŋ, ebhú tat a kô atôŋ mma á yóe mmon i mfoŋ, á nyât yê sê a kâ jóe na akôp ka ochî atem-ane.

¹⁴Ájoé nâ noŋ é rî, kən mân agyʉ́ŋ í Jisos Krayis! Kpe akôp á ka fon ka ochî Obhasi, a kpô ekʉ̂ ka echî ejə́ré ka ikom Obhasi Ebhare Ntʉgantʉ nnyo á bhó kpo bhúghí-bhúghí. A sû êt a yíghi ka obhí mbi ó kə́ bha êt na ekʉ̂, se é yîm etûm é káre mfoné-mfoné Obhasi.

¹⁵Nâ Jisos Krayis mân nâ a gyím ka étíŋanti nne na Obhasi ka ńgyímí mfê nnyí. Ane mân mba Obhasi á bhiŋ, tîk á fôn ejûm áji nji é kí kət ta ótúm-ótúm ka ekpak Obhasi a chimî. Á kí fon, ka ekʉ̂ Jisos Krayis é yim ábho á sem ka obhí mbi á yími ebhú á fóne ńgyímí ndaŋa-mbá nnyi Obhasi na ane.

¹⁶Kən á kâm nwet nnyi á séŋe sê á kíri iyîm í nne nji nne a kpóe á rî á tóŋé sê nne ányo a kpô ka etʉri.

¹⁷Nwet nnyí a kí fon ikom tem nji mfona-nwet a kpô, á bhó fon nji a nyə́ne mbít.

¹⁸Ka ekpak njí, kpe ndaŋa-mbá ńgyímí nnyi Obhasi a fonê na nne, a gyími nji agyʉ́ŋ á bhə́re ka nsi.

¹⁹Nan? Ebhú Mosis a sə́re ane chénchén achot fép mma á rî ka ebhín, a kô ájé etat á bhíŋa sê ísop a kpê na ébhí anyot í mbúi, a bhî ka agyʉ́ŋ í mbúi chəm-chəm na mma mmon i mfoŋ na ayép. A kô a nyât ka nwet ebhín nnyí, a nyât fə́ne chénchén ane.

²⁰A chôt se, “Ḿfa nâ agyʉ́ŋ í ńgyímí nnyi Obhasi a sə́re ên se ó fî.”

²¹Ka ekpak njí jə́t, Mosis a kô fə́ne agyʉ́ŋ mmá a nyât ka etəm nji á kára nná agore, a nyât fə́ne ka chénchén iyîm mbi á kóe á yîm agore.

²²Ka ekpak nji ebhín é fíi, mkpât kən chénchén iyîm mbi á nyáre na agyʉ́ŋ mmá, í ká fon akôp ka ochî Obhasi. Agyʉ́ŋ fə́ne á ro gbo ka nsi, eji Obhasi a kí ri nsôn a su obhí nne cháŋ.

²³Nâ ńjə́ne á fóne ekóóm agyʉ́ŋ onyam á yîm iyîm mbí mbi í fóŋe mbi ósô, í kâ fôn akôp. Kən mbi ósô mbi í rî mfoné-mfoné ḿbə́ne, á fóne ekóóm ejûm nji é chíŋi agyʉ́ŋ mmá.

²⁴Ka nan? Jisos Krayis á ka gyé ka eji nji ane á yími na abhô sê eji Obhasi nji é fóŋe ofóŋé mfoné-mfoné ńjə́ne. A gyée ka mfoné-mfoné eji nji ka ósô. Mfá-mfá yê nâ a chəbhê a fábhá ka ochî Obhasi ka obhô obhə́ré.

²⁵Eyâ kpe njə́n, ntûfâm akará-agore Obhasi á gyek Mfoné-mfoné Eji Obhasi na agyʉ́ŋ onyam etat, amê asík. Kən Jisos Krayis á ka gyé a kará biji ibhê chénchén ebhú.

²⁶Sê é rî áno eê, kə́n Jisos Krayis a kə́re áno ka oseŋe é róghé ta ka ebhú ngun a róghe ndə́p. Kən ka ekpak é rî, a bhâ ntə̂m nnyí yə́t, nâ ebhú fə́ne ntə̂m i ngun a kpíri. A bháe yê a bhá yighí obhí ane ka ekpóóm ekʉ̂ ka echî ábho.

²⁷Ka noŋ fə́ne Obhasi a toê se nne a kí kpo ntə̂m yə́t, á kpo kpo, á tâŋ yê,

²⁸nâ noŋ fə́ne é rî na Jisos Krayis. Nji a kpóe áno ntə̂m ányi yə́t se yê a yighí obhí ane etî-etî, a kí kpo bha ka osúí ntə̂m ébháe. Kən á ka bhá se yê a bhá kpo bhup nchot obhí. A kə́ bha se yê a bhá yim ane mba á chígha yê, á sém.