Read ejagham Jems, echî 1 Bible Online

Jems, echî 1 - ejagham bible

Jems, echî 1

¹Mme Jems, ka nne-etûm Obhasi na Ńtâ Jisos Krayis, n kí kup ane Obhasi chénchén mba á rî ka ngûm ka ngûm, ngun ndə́m.

²Atem-abhon-í-nnyen, achot á rî á tə́m ên. Ebhú á təm ên, kô ên ḿmáne na ogyebhá-ḿbə́ŋé,

³ka achot mmá á kí gaé ḿbə́ŋé nnyi o kíi ên na Obhasi. Ó chiŋ ên egaé njí, o kí fon ên okə́bhá-ḿbə́ŋé.

⁴Deê okə́bhá-ḿbə́ŋé mbí ó chóé ên ó jî ochî, ó jéghe ên ḿbə́ŋé nnyi o kíi ên na Obhasi, kpe ejûm etat é kâ kə̂t.

⁵Kən nne kpe yót á ro məŋé ejûm nji Obhasi a wóme, deê a goré Obhasi, tîk a tóŋe yê. Obhasi á kará ane joók, á bhó yam ḿbə́ŋé.

⁶Ebhú o kí goré Obhasi a tóŋé wâ, kî ḿbə́ŋé se tîk a tóŋe, ka fôn efup. Nne nnyo a kí fon efup, a ri noŋ ebhúghí-aya nji é kí gbo ńgô, é gbok ngá, ka ekpak mfêp á noghá.

⁷Ntʉ́ghi nne ányo a ri nne nnyo á ko ńgyímí kpe nnyə́n, a yóŋe. Deê a kâ kére se Ńtâ Jisos tîk a káre yê ekəp.

⁹Deê ntem-mmon-i-nnyen nnyo a ri ka okpák a fon ogyebhá-ḿbə́ŋé ka ekpatə́m í ńgyímí nnyi a fonê na Obhasi.

¹⁰Deê fə́ne nnyo a ri nne-ntí a fon ogyebhá-ḿbə́ŋé nji Obhasi á tabhé ntí imê, ka kpe a káe a kêt, nne-ntí nnyó a kí man noŋ mfem átí.

¹¹Njúí nâ a kí fap a yâ ta ngun a fûp, átí mmá á rîk, mfem nnyí a gbô, ono obhê ó mân. Nâ noŋ fə́ne nne-ntí a kí kpo ka ebhú a kí jen ogəm obhê.

¹²Deê ogyebhá-ḿbə́ŋé ó jóe na nne nnyo tîk a kí kəp ḿbə́ŋé ka ebhú achot á kí təm yê. Ka ebhú á kəp ḿbə́ŋé, a kô érûm ka achot mmá, a kí fon ekpin noŋ ekəp nji Obhasi a chimî a káre ane mba á kóre yê.

¹³Ebhú achot mmá á kí gaé nne a yim obhí, deê nne a kâ sə́re se, “A ri egaé Obhasi.” Echî aŋ? Nne nnyo á gaá Obhasi a yim obhí cháŋ. Obhasi fə́ne á bhó gaé nne owe a yim obhí.

¹⁴A ri íkíkéré ibhí mfi nne nâ í chóa nne í kaghá ka egaé a yim obhí.

¹⁵Ebhú nne á karé biji mbâ íkíkéré ibhí mfí, tîk a kə̂t a yimá obhí. Obhí ó kpo kui nne ka biji, ekʉ̂ é bhak.

¹⁶Atem í ḿbə́ŋé, ka ríri ên biji.

¹⁷Kpe njə́n ekəp eno, kpe mbə́n ofa mbi ó ká fon akôp, ó dʉ̂ nnyi ósô. A ri Obhasi nnyo a yimî ebhát chénchén ka ósô nâ a túmi. Obhasi á bhó yoŋe noŋ ńtʉgântʉ nnyi á tana a fábhá.

¹⁸Ka okorá-ḿbə́ŋé obhê, a kô mfoné nchot eye a yîm êt se é gyími ochî ka iyîm chénchén mbi yê a yimî.

¹⁹Atem í ḿbə́ŋé, yûk ên. Nne a kí chot nchot, kí ên atûŋ tʉrî oyúk ên. Kô ên ebhú kən o támá ên nchot. Deê ḿbə́ŋé a kâ yáma ên babhap.

²⁰Nne nnyo á wagha ḿbə́ŋé eyámám á bhó fon ekpin ka nnyen-i-mbá noŋ Obhasi a wóme.

²¹Maghê ên mân achot akôp na ekpin ebhí nji é nyə́ne ên ka biji. Karê ên biji ibhə́né mbâ Obhasi, o kâm ên eyum í nchot ejê nji a bheê ên ka ḿbə́ŋé. Ńji nâ é kí bhik oyim ên ó sém.

²²O kâ ríri ên biji. Ó yuk ên eyum í nchot Obhasi, é nop o yîm ên mân nji o yúghi.

²³Nji nne á yuk nji Obhasi a chorê kən á ka yim ka ekpak nji a yúghi, é rî noŋ nne a kêp biji ka efe,

²⁴kən á kpo maghé, a gyíni ebhú jə́t ekpak nji a yéne biji.

²⁵Kən nne nnyo á tʉrí otóp mfoné ebhín nji é kí yim nne a sémá, a fî ebhín njí, é ká joé ka eyúghúm a gyiná, kən ka eyimím, a kí fon ogyebhá-ḿbə́ŋé ka chénchén ejûm nji á yimá.

²⁶Nne nnyo a kí kere se yê nne Obhasi kən á ka məŋé ka ekpak nji a kí fi nnyo imê, á rirá biji, ńgyímí eye na Obhasi a ri chichi.

²⁷Nne nnyo Obhasi Ńsé á yena se nâ mfoné-mfoné nne owe, a ri yê nnyo á kaghá akʉ́ghá-ane na ane-akáé ekə́t obhô se á kâ yên oseŋe. A ri yê nnyo á fik biji, achot í ngun á kâ bhíbhi yê.