Read ejagham Jems, echî 3 Bible Online

Jems, echî 3 - ejagham bible

Jems, echî 3

¹Atem-abhon-í-nnyen, deê o kâ tî ên otí mba o kí joé ên atóŋá-ane achot Obhasi. Echî aŋ? Ó məŋe ên sê esup ejə́ré, êt atóŋá-ane achot Obhasi, é kí son é chíŋi nji ane mba ngá.

²Êt chénchén, nne nnyo a rok ogbo cháŋ. Kən nne nnyo ka ótúm á bhó gbo ka erə́bhe nchot ejê, á ka fon kpe akôp. Nne ntʉ́ghi ányo a kí fi biji kpe ka jen.

³É kaghá esené ka nnyo mfoŋ anyanyâ sê é yîm ńnyə́ne a ji kpe fan nji e wóme. Ka ekpak njí, êt nâ é chəbhe e tʉk mfoŋ nnyí mbá.

⁴Kép ńsughîkaŋ, kpe a faŋê nan, kpe mfêp a sonê nan, mmon esené a ri ágo nnyo á fik ńnyə́ne. Ńnyóne nâ á yimá nchʉghá-chʉ́ghá kpe fan a korê, a jak na ńsughîkaŋ eye.

⁵Nâ noŋ é rî fə́ne na erə́bhe nnyo ejə́ré. Kpe na ochép obhê, erə́bhe é kí chot achot mma á fáŋe á chíŋi ochíŋ. Kére kpá ekpak nji etə́m ndə́m é kí rik ka nkiŋ i ngûn nnyi a kí gbo ka ńjə́ne.

⁶Erə́bhe é rî noŋ ngûn. Ka ayô biji chénchén, ńjə́ne a ri ngun obhí ka ibhê biji. É fon ikom mfi é kí bhibhi kpe bhaghé eyô biji, é kâk ngûn ka ekpin ejə́ré ndə́m. Ikom mfí í dʉ̂ mbâ Satan yê ḿfoné.

⁷Onyam obhí ka etə́m, nnón, onyô, osí, chénchén ntʉ́ghi iyîm mbí nne a kí gye.

⁸Kən kpe nne nnyo a kí məŋé erə́bhe ogye cháŋ. Erə́bhe a ri mfoné-mfoné ejûm ebhí nji é bhó kumí nyamḿ. Erə́bhe é fóne nchep nnyi á yua nne oyúí.

⁹A ri erə́bhe nâ e kí ko e kará Ńtâ Obhasi Ńsé ekûp na ejík. Kən e kí ko erə́bhe njí jə́t e tû nne nnyo Obhasi a yimî ka ejímí ejê.

¹⁰Ejík na atû í kí dʉ ka nnyo mmí mə́t. Atem-abhon-í-nnyen, ntʉ́ghi ekpin njí é ká joé ka mbá.

¹¹Mfúk ayép mə́t ń nôk okaré ayép egwóóm na mma akâŋ a?

¹²Atem-abhon-í-nnyen, eji o nôk oyén ên ojʉ ó kâp íchókut na kpe íríghí egóm í kâp ajʉ a ri fan? Kpe ayép akâŋ á bhó karé mfoné ayép mma gwóóm.

¹³Ájoé ane á rî ka ekam ejə́né mba á kéra sê ábho á fon oməŋá-ejûm na aron, deê á tóŋé ka ekpin eno na ntûm i nno. Deê oməŋá-ejûm ábho ó kâ yîm ábho á yuŋá biji.

¹⁴Kən nne nnyo á fon ḿbə́ŋé nnyi á yira ntem, a noghá sê á yúk yê átíŋ, nâ deê a kâ sûm obhô-ngaŋ se yê a mə́ŋe nchot Obhasi. Áfo a ri áfúbhí, mfoné nchot Obhasi asík.

¹⁵Ntʉ́ghi oməŋá-ejûm mbí ó ká dʉ nnyi ósô, ó dʉ̂ ka ngun nnyí. Ó ká chəm na Obhasi, ó chə́me na Satan.

¹⁶Ka nan? Eji oyírí na ofî ó jóa, achât na achot abhí chénchén á jóa fə́ne áfo.

¹⁷Kən oməŋá-ejûm ósô ó ká fon akôp. Nâ ndaŋa-mbá ejûm. Ó jóa fə́ne na ekone, ó joá nyamḿ, ó toŋa onobhá-eji, ó rik nsôn. Ó məŋá ḿbə́ne ka ntûm i nno. Ó ká fon áfúbhí, ó bhó bhibhi ntem.

¹⁸Onono nâ nkap nnyi á fabha ka ejûm í nkap nji no. Ane ekone nâ á bhak na ekone.