Read ejagham Jems, echî 4 Bible Online

Jems, echî 4 - ejagham bible

Jems, echî 4

¹N kí bhəp ên bəre achot enok na okpóŋe ka ekam ejə́né á dʉ̂ nan? To á dʉ̂ ka ekot ekpin edíím ka ngun? Ekot njí é kət é kará ên onyʉk ka ḿbə́ŋé.

²Ka ḿbə́ŋé eyəné, ó woma ên njí o wómá ên ńjî, kən ó bhó fon ên. Ka obhô mbí, kpe nne o yúi ên. Ó woma ên ejûm na ḿbə́ŋé-a-ḿbə́ŋé, kən ó bhó fon ên ńjə́ne. Ka obhô mbí, o kí nok ên, o kpóŋá ên na atem. Sê ó gorá ên Obhasi a karé ên ejûm nji é bhíghi na ên, kə́n a kí karé. Kən ó bhó goré ên.

³Nji ó gorá ên Obhasi ó bhó fon ên, ka ó ka tʉrí ogoré ên yê. O gorê ên a ri na íkíkéré ibhí sê ó kó ên ńjə́ne ó dí ekpin.

⁴O ri ên noŋ ane mba á kí gbo ekun. Ó ka məŋé ên sê nji ó ko ên ngun nnyí ka otem, ó ko ên Obhasi ka ebhan a? Kpe énê nnyo á yim otem na ngun nnyí, a yîm Obhasi nne ebhan.

⁵Ó kera ên sê á gbo nji á séŋe sê, “Ḿbə́ŋé nnyi Obhasi a karê nne, a yimá nne a korá nji é ká joé ejê.”

⁶Kən onobhá-eji mbi Obhasi á toŋá ó son ó chiŋi ochíŋ. Nâ noŋ á séŋe sê, “Obhasi á bhó kot nyuŋa-biji, kən á toŋá onobhá-eji obhê mbâ nnyo a kí ki biji se kpe ejûm yê á ka fáp.”

⁷Karê mân biji mbâ Obhasi. Taŋê ên Satan, tîk a bê ên.

⁸Nji o kí di o kpírá Obhasi, Obhasi fə́ne a kí di a kpírá wâ. Ayimá-obhí, su ên abhô amə́né yighî ka obhí. Ane áfúbhí, su ên ḿbə́ŋé eyəné.

⁹Fon ên nsae, gbo ên ka ekʉ̂. Deê amə̂ŋ eyoóm amə́né á chə́bhe ekʉ̂ eriím, ogyebhá-ḿbə́ŋé obhə́né ó mân.

¹⁰Kô ên biji ibhə́né sê kpe ejûm ó ka fáp ên ka ochî Ńtâ Obhasi, tîk a yûŋ mbiŋ eyəné.

¹¹Atem-abhon-í-nnyen, deê nne a kâ bhíbhi ntem. Kpe énê nnyo a kí bhibhi ntem, na kpe a táŋ ntem, nâ a kí bhibhi fə́ne ebhín. A kí taŋ ebhín. Ájoé o kí taŋ ebhín, nâ ó ka kpó joé ka óséré ebhín, ó chəbhe o táŋá ńjə́ne.

¹²Obhasi yê átíŋ nâ ntáŋa-achot. Yê átíŋ nâ á kará ebhín. Yê átíŋ nâ kə́n a yîm ane á sêm, a yîm é bhîp ábho. Ó kera mân se we nâ énê nji o kí taŋ ntem-mmon-i-nnyen?

¹³Yûk ên, ên ane mba ó timá ên sê, “Ebhú tat, égyé nâ ójô, tîk e jak ejen eték njí, e kâ ágo eyâ jə́t, e jên ogəm, e fôn ntí etî-etî.”

¹⁴Məŋê sê ó ka məŋé kpe ekpak ekpin ejə́né é bhâk ojoé ójô. O ri noŋ abhʉ́í ka ajé mma á kí fap mfá-mfá, kən mkpât ebhú á tan.

¹⁵Nji o fonê ên ka echoróm kə́n a ri se, “Ájoé Ńtâ Obhasi a kâm, tîk e kúmi ka eték e yîm njí, na ńjî.”

¹⁶Kən ên mân o kí yuŋ ên biji, o timá ên iyîm. Ntʉ́ghi ekpin njí é ká nop.

¹⁷Nâ é fap sê nne nnyo a mə́ŋe ono mbi a fonê ka eyimím kən á ka yim, a gbô.