Read ejagham 1 Pita, echî 1 Bible Online

1 Pita, echî 1 - ejagham bible

1 Pita, echî 1

¹A ri mme, Pita, ka ḿgbán i Jisos Krayis nâ n séŋe nwet nnyí bəre ń túm mbâ eyəné. Ên a ri ane mba Obhasi a sáŋe, ó chəbhe ajéné ka ngun. Ó nyane ên ka ngûm noŋ ane á bée enok, ó kət ên ka ebhat í Pontus na Garasiya na Kapadosiya na Esiya na Bitiniya.

²Obhasi Ńsé nâ a sáŋe ên ka ejûm nji yê a wóme kən a yîm ên. A sáŋe ên se ka ikom Ebhare Ntʉgantʉ owe, ó ka kpó fon ekpin akôp. A sáŋe ên fə́ne se ó yúk ên Jisos Krayis, a su ên na agyʉ́ŋ amê. Deê Obhasi a tóŋé ên chénchén onobhá-eji obhê, a karé fə́ne chénchén enare.

³Deê é káre ejík mbâ Obhasi Ńsé, Ńsé Ntûfâm owəré Jisos Krayis. Ka ekpatə́m nsôn eye, a káre êt ekpin efê nji a yimî Jisos a nyə́me ka ekʉ̂. Ńji é yim êt é məŋe sê yê nâ a fonê êt.

⁴Ka obhô mbí, e kí chik sê é fôn ekpatə́m ekəp nji Obhasi a kíi ane abhê. A kíi ekəp nji mbâ eyəné ágo ka ósô na yê. Ka ósô, ekəp njí é bhó cha, é bhó bhip, é bhó kpo ayép.

⁵Ka ḿbə́ŋé nnyi o kíi ên na Jisos Krayis, Obhasi na ikom ifê a kí bhabhe ên, ejûm é bhó yim ên ta ebhú é sî nji a kí yim ên ó sém. Esémém njí é kí joé ebhú ngun a mân.

⁶Ńji é fóne ka ekarám ên ekpatə́m ogyebhá-ḿbə́ŋé, kpe noŋ nsae a súi óbhə́ŋé obhə́né ka mô ebhú nnyó nji ó yena ên áno oseŋe ka mkpak ka mkpak.

⁷Oseŋe mbí a ri egaé sê á yén ájoé ḿbə́ŋé nnyi o kíi ên na Jisos Krayis a sôn. Kpe gûl nnyi kə́n á bhíbhi, á kí gaé ńnyə́ne ka eyoóm na ngûn. Nâ noŋ fə́ne kpe ḿbə́ŋé ekíím eyəné nnyi a fâŋ a chíŋi gûl, á rî á gáe. Ó chiŋ ên egaé njí, tîk Obhasi a káre ên ekûp na ejík ka ofú ábhi mbi yê a kí toŋe Jisos Krayis.

⁸Kpe ó ka nok ên yê oyén, ó kot ên yê. Kpe o rô nok ên yê oyén mfá-mfá, ó ki ên ḿbə́ŋé na yê. Ka obhô mbí, ó gyebhá ên ḿbə́ŋé kpe-eji nnyi nne a nyə̂m osə́ré.

⁹Ó gyebhá ên ḿbə́ŋé ka ekpak njí, ka Obhasi a yîm ên o kí sem. Nâ ekəp ka ḿbə́ŋé nnyi o kíi ên na Jisos Krayis.

¹⁰A ri ka obhô esémém njí nâ akará-otîp Obhasi á sóghe obhô ka ngûm á bhə́p, kən á kí səre á kpek na ekəp njí nji Obhasi a kí karé ên.

¹¹Á nok sê á mə́ŋe mfoné ebhú nchane na ekpak nji ekəp njí é kə́ bha. A ri ebhú nchane jə́t nâ ńtʉgântʉ Krayis nnyi a ri ábho ka biji, a kí toŋe. Akará-otîp mbá á sə́ra noŋ á yéne oyén, sê Krayis tîk a yên oseŋe kən a kí kəp ḿbə́ŋé, ekpatə́m ejík tîk é bhak.

¹²Obhasi a tóŋe akará-otîp mbá jáé se etûm nji ábho á yíma, ekəp nji ábho asík. A ri ejə́né. Akará-otîp mbá á chóre á kpê na achot mma ó yugha ên áno égyé mbâ ane mba á sə́ra ên otîp ogyebhá-ḿbə́ŋé mbí. Ane mbá á sə́ra ên na ikom Ebhare Ntʉgantʉ nnyo Obhasi a túmi nnyi ósô. Achot mmá, kpe baénjel ka ósô kə́n á kôt sê á mə́ŋe.

¹³Nâ fiî ên mân biji ibhə́né ka o fonê ên etûm eyimím. Kî ên ḿbə́ŋé eyəné nyamḿ. Deê chénchén íkíkéré ifə́né í jóe ka esémém ejə́né noŋ ekəp nji Obhasi a kíi ên ebhú á toŋe Jisos Krayis.

¹⁴Deê ó yúk ên Obhasi, nne a kâ kâm se ekpin ejê é tóp íkíkéré ibhí mfi ebhú áji o fonê ên, nji o nyə́ne ó ka məŋé ên mfoné nchot Obhasi.

¹⁵Kən deê ekpin ejə́né é kâ fôn akôp kpe ka jen nji ó yimá ên, ka yê, nnyo a sáŋe ên, á ka fon akôp ka ekpin ejê bhúghí-bhúghí.

¹⁶Á séŋe sê Obhasi a toê se, “Ka fon ên akôp ka ekpin ejə́né, ka mme ń ka fon.”

¹⁷O kí bhiŋ ên Obhasi se Ńsé ebhú o kí goré ên yê. Yê nâ á taŋá chénchén ane ka ekpak ejûm nji nne a yimî, á bhó kep nne ka ochî. Deê mân ó fî ên biji ta ofú obhə́né ó bhîk, o jighá ên yê, ka ên a ri ajéné ka nsi nnyí.

¹⁸Echî aŋ? Ó məŋe ên ejûm nji á káre ka echî ejə́né kən ó sem ên ka echâk ekpin nji ásé éməné abhə́né á kpî ên. Ejûm nji é yími ên o sêm é ká joé kpe gûl na kpe sírbha nnyi a kí bhip.

¹⁹Kən a ri agyʉ́ŋ í Jisos Krayis mma á gbóe ka nsi noŋ mbúi efin nnyi á ka fon kpe akôp.

²⁰Obhasi a sáŋe Jisos kən kpe ngun a bhá roghe. Kən a bhâ tóŋe yê ka ebhú ejə́ré njí, nji é rî nâ ntə́ma-njəm ebhú, se a bhá nyaŋe ên.

²¹Ka obhô Jisos Krayis nnyó, ó ki ḿbə́ŋé na Obhasi. A ri Obhasi nâ a yimî yê a nyə́me ka ekʉ̂, a káre yê ejík. Nâ ńjə́ne ó ki ên ḿbə́ŋé na Obhasi, ó məŋe ên sê yê nâ tîk a káre ên nji ó chígha ên.

²²Nji o yúghi ên mân mfoné nchot Obhasi mfá-mfá, ó su ên biji ó yighi ka obhí, ó fon ên mfoné-mfoné okot na atem-abhon-í-nnyen. Nâ kot ên mân atem na ḿbə́ŋé-a-ḿbə́ŋé.

²³Mfá-mfá á ji ên mfê mbâ ńsé nnyo á bhó kpo, a kí kət ka ótúm-ótúm. Á jíi ên mfê ka obhô eyum Obhasi nji é kára ekpin, é kí kət ka ótúm-ótúm.

²⁴Nâ noŋ á séŋe se, “Ngun ndə́m á rî noŋ ajé, ejík nji á fóne é rî noŋ mfem ajé. Ajé mma á kí kpo, mfem a wûk,

²⁵kən eyum Obhasi é kí kət ka ótúm-ótúm.” Eyum Obhasi njí a ri otîp ogyebhá-ḿbə́ŋé mbi á sə́re ên.