Read ejagham 1 Pita, echî 2 Bible Online

1 Pita, echî 2 - ejagham bible

1 Pita, echî 2

¹Nji Obhasi a káre ên áno ekpin efê, maghê ên mân achot obhí chénchén. Maghê ên áfúbhí, maghê ên óríghi, yighî ên atem amə̂t ka biji, nne a kâ bhíbhi ntem.

²Deê ekpin ejə́né é jóe noŋ mmon i mfê nnyo á korá a yábhá abhê nnyen. Deê ó kə́t o korá ên mfoné-mfoné abhê áma, mma á rî nâ eyum Obhasi. Nâ nji é kí yim ên ó sôn ka ekpin ejə́né na Obhasi.

³Echî é rî sê mfá-mfá ó məŋe ên ekpak onobhá-eji Ńtâ Obhasi ó rî.

⁴Nâ bhák ên mân mbâ Ńtâ Jisos Krayis. Yê nâ a ri isôk ekpin áfi mfi ngun á jíŋi sê chichi, kən Obhasi a sâŋ yê se a chîŋ ochíŋ.

⁵Nâ bhák ên noŋ isôk ekpin, Obhasi a kó ên a gbe ókʉ́rí Ntʉgantʉ owe. Ka ókʉ́rí mbí, ên o kí joé ên akará-agore Obhasi mba ekpin é ká fon akôp. O kí karé ên ekûp na ejík noŋ efin ejə́né nji Obhasi a kí ko ka mbiŋ i Jisos Krayis.

⁶Echî aŋ? Obhasi a chorê se, “Ńgyê n kí ki isôk ekpin ifámé mfá ka Sayon mfi í kí fi njû amé. Ń saŋ yê. Ka ochî obhámé, yê nâ a chíŋi ochíŋ. Nne kpe nnyón nnyo á yuŋ ḿbə́ŋé a kî na yê á bhó ko éré.”

⁷Ên mba ó ki ên ḿbə́ŋé na yê, ka ochî obhə́né yê nâ a chíŋi ochíŋ. Kən mba á ká ki ḿbə́ŋé na yê, á séŋe sê, “Tîk á yên sê isôk mfi agbeghá-ojû á táŋe sê á ka nop njû egbeém, ḿfə́ne nâ í bhâ jóe mân isôk mfi í fíi njû.”

⁸Á séŋe fə́ne sê “Nâ isôk nchane mfi í kí yim ábho á kóbhe, ḿfə́ne nâ í kí yim ábho á gbô.” Echî aŋ? Á kóbhe ka á ká kam na otîp mbi á yúghi. Nâ ekpak nji Obhasi a gaê a kî.

⁹Kən ên a ri ane mba Obhasi a sáŋe. Ên nâ akará-agore mba ó tʉgha ên Obhasi nnyo a ri Ntûfâm owəné. Ekpin ejə́né é ká fon akôp ka ochî obhê. A sáŋe ên noŋ abhê ane a yíghi ka ejírim se ó sə́ré ên ane ekpatə́m í ntûm i nno nnyi yê a yimî. A sáŋe ên se ó jên ên ka ebhát ejê nji é rî ane a ri ókerê.

¹⁰Ebhú áji ó ka joé ên ane Obhasi, kən mfá-mfá ó chəbhe ên ane abhê. Ebhú áji Obhasi á ka ri ên nsôn, kən mfá-mfá a rî ên nsôn.

¹¹Atem í ḿbə́ŋé, məŋê ên sê ên a ri ajéné, o bháe ên a ri ejen ka nsi nnyí. Ka obhô mbí, n kí goré ên bəre ó yíghi ên abhô amə́né ka iyîm obhí mbi ḿbə́ŋé eyəné a kí kot se ó yîm ên. Echî aŋ? Ntʉ́ghi iyîm mbí, í kí gbʉi ên o kâ yîm ên ejûm nji é gyébha Obhasi ḿbə́ŋé.

¹²Ka mághe ên onobhá-eji eyimím na ane mba á ká ki ḿbə́ŋé na Obhasi. Echî aŋ? O kí yim ên áno, kpe ane mba á chóra achot abhí á kpek na ên, tîk á yena onono obhə́né, á kará nkat mbâ Obhasi ka ofú a kə́ bha, a bhá kpughi ábho.

¹³Nji o ri ên atóbhá Ńtâ Jisos, jíghi ên ane chénchén mba á fíi otúi eték. Jíghi ên Ntûfâm i Rom, nnyo chénchén atúi-ofâm á rî ka óséré obhê.

¹⁴Jíghi ên atúi-ofâm mba ngá mba yê a sáŋe se á kâk yê obhô, á kpərá ayimá-obhí, á jigha fə́ne ane ano.

¹⁵É gyebhá Obhasi nji o kí yim ên ono. Echî aŋ? Ono mbí ó kí yim ánə́mé ane mbá mba kpe ejûm á ká riŋí, mba á bhíbha ên áno, á kâk onyo ábho ka otâk.

¹⁶Ên a ri ane mba ó sem ên ka osʉ́ŋ kən kpe noŋ é rî áno, deê o kâ kére ên sê esémém ejə́ré njí é kare ên obhô ó yîm ên obhí. Deê esémém njí é nyáŋe ên ó yîm ên ekpin noŋ asʉ́ŋ Obhasi.

¹⁷Karê ên ejík mbâ ane chénchén, kot ên atem-abhon-í-nnyen mba á kíi ḿbə́ŋé na Jisos Krayis, yúbhi ên Obhasi, jíghi ên Ntûfâm i Rom.

¹⁸Ên mba o ri ên ágbán ka ojû, sére ên biji karê ên ásé abhə́né. Jíghi ên ábho na ḿbə́ŋé-a-ḿbə́ŋé. Kpe á rî nono na ên, á toŋa ên onobhá-eji, kpe á rî ochu-óchû, jíghi ên ábho.

¹⁹Echî aŋ? Nne nnyo á fóne ekarám ekûp na ejík a ri yê nnyo a kí kam oseŋe, kpe a rô gbo, ka a mə́ŋe sê nâ ekpin nji Obhasi a korê.

²⁰Kən sê nne a yîm ejûm ebhí, á kpəre yê, kən a kâm akpəre mmá, echî á kí karé yê ejík na ekûp a ri jen? Kən nji nne a yimî ono á kpəre yê, a kâm fə́ne akpəre mmá, Obhasi a kí toŋe yê onobhá-eji.

²¹Nâ ekpin nji Obhasi a sáŋe ên se ó yîm, ka Jisos Krayis yê ḿfoné a kâm ekpak oseŋe mbí ka obhô obhə́né. A tóŋe ên ekpak ekpin njí. O fonê ên mân ka etóbhóm ekát ejê.

²²“Yê, á ka yim obhí, nne nnyo a noghê oyúk yê a sə́re áfúbhí cháŋ.”

²³Á chot achot abhí á kpê na yê kən á ka fé. Nji á káre yê oseŋe, á ka tóŋé nne kpe yót indəré, kən a kî ḿbə́ŋé na Obhasi nnyo á taŋa achot amê ka nnyen-i-mbá.

²⁴Jisos Krayis a chə́me obhí obhə́ré ka echî ejê a kpô ka ego se obhí ó kâ kpô fon ikom ka ekpin ejə́ré, é fôn ekpin ka nnyen-i-mbá. Bifú mbi á kághe yê ka biji í yim êt é son.

²⁵Ka nan? Ebhú áji o ri ên noŋ ojo-obhúi mbi ó tan, kən ó chəbhe ên njəm mbâ Jisos Krayis nnyo á bhabha ḿbə́ŋé eyəné. O kí top ên yê noŋ ojo-obhúi ó tóbha mbábhá ábho.