Read ejagham 1 Pita, echî 3 Bible Online

1 Pita, echî 3 - ejagham bible

1 Pita, echî 3

¹Noŋ ágbán na ásé ábho, ên akáé, deê ó káre ên biji mbâ arûm abhə́né. Ó joé ên ka ekpak njí, tîk etʉ̂ arûm mba á ka kam na nchot Obhasi á kâm, nji kpe echoróm asík, o chorê ên.

²Arûm abhə́né ábho áfoné nâ á kí yen sê ekpin ejə́né é rî ka nnyen-i-mbá, á yena fə́ne ekpak ó jigha ên ebhín Obhasi.

³Deê ono obhə́né ó kâ jóe a ri mbi biji noŋ nnyʉ̂ eyimím se á yén oyén, na ḿbáŋé, na ḿfô biji nnyi nná.

⁴Ono obhə́né, deê ó dʉ̂ ka ḿbə́ŋé. Ono ntʉ́ghi mbi ó bhó kot áfírí, ó bhó kot nchot, ó bhó kpo fə́ne ayép. Nâ ntʉ́ghi ono mbi Obhasi á korá na ḿbə́ŋé-a-ḿbə́ŋé.

⁵Nâ ekpak akáé ka éməné mba á yúŋi ḿbə́ŋé á kî na Obhasi, á tóŋe ano ábho, á káre biji mbâ arûm ábho.

⁶Sara a fonê ntʉ́ghi ekpin njí. Á bhiŋá ndûm owe Abraham se, “Ńsé.” Mfá-mfá, ên ó chəbhe ên abhon í Sara ájoé o kí yimâ ên ono, efup ó ka fon ên na arûm abhə́né.

⁷Ên arûm eróŋ, ó məŋe ên sê akáé abhə́né á ká son noŋ ên. Ka obhô mbí, deê ó jóe ên na ábho ka ekpak í Jisos Krayis a wóme, o jighá ên ábho. Echî aŋ? Ábho á kí fon fə́ne ekpin ótúm-ótúm noŋ ên. Deê o yimá ên ekpak ekpin njí kən é jóe sê kpe nne a kí goré Obhasi, ejûm kpe jə́t é bhó gbʉi yê.

⁸Kən ń jéghe n kí səre ên bəre deê íkíkéré ifə́né í jóe fə́t, fon ên ḿbə́ŋé yə́t na atem, joê ên ka okot na atem-abhon-í-nnyen. Deê ó tóŋé ên onobhá-eji mbâ atem-ane, nne a kâ kére se yê a chíŋi abhô.

⁹Ntem á yim wâ obhí, ka yim ó fé. Nne á səre se é bhíp wâ, ka sə́ré se é bhíp yê eróŋ. Kən nne á yim ên áno, deê ó sə́ré ên a ri sê Obhasi a karé yê enare. Echî aŋ? Ebhú Obhasi a sáŋe ên, a chími se yê a kí karé ên enare.

¹⁰Á séŋe sê, “Kpe énê nnyo á wom a dí ekpin, a kí wom a yén onono ka ngun eye, a ri a maghé achot abhí echoróm, a ri a maghé áfúbhí esə́rə́m.

¹¹A ri a chəp njəm a karé obhí, a yim ono. A ri a wóm ekone, a tóp ńjə́ne.

¹²Echî a ri jen? Amə̂t í Ńtâ Obhasi á rî ka biji ane mba á yíma ekpin ka nnyen-i-mbá. Á yugha ogora-biji ane ntʉ́ghi mbá. Kən a kí chəp njəm a káre ane abhí.”

¹³Ájoé o kí nok ên ka nnyen onogha-ejûm se ó yîm ên onono, énê nnyo kə́n a bhíbhi ên?

¹⁴Kən kpe é fábhe sê ó yén ên oseŋe, ejûm ebhí o yimî ên cháŋ, joê ên na ogyebhá-ḿbə́ŋé. O kâ fûp ên ane ngun, ḿbə́ŋé a kâ rə̂m ên.

¹⁵Kən ka ḿbə́ŋé eyəné, jíghi ên Krayis noŋ Ntûfâm. Joê ên ngyím na nji o kí fe ên ájoé ane á bhəp ên echî nji o kí jighi ên yê noŋ Ntûfâm. Kən fê ên ebhə̂p njí na ejík, o kâ rə̂m ên orəm.

¹⁶Deê ḿbə́ŋé eyəné a joé jáé. Echî aŋ? Ábho mba á bhíbha ên nji o kí fon ên ekpin ka nnyen-i-mbá na Jisos Krayis, á kí fon oyúbhá-echî na achot mma ábho á chóra na ên.

¹⁷Ájoé nâ nji Obhasi a wóme se ó yén oseŋe, é nóbhe sê ó yén ên ka obhô ono mbi o yimî ên na nji ó yén ên ka ó yim ên obhí.

¹⁸Echî aŋ? Jisos Krayis a kpô ntə̂m ányi yə́t ka obhí obhə́ré. Yê nnyo á yimá iyîm ka nnyen-i-mbá, kən a kpô ka echî ejə́ré, êt ayimá-obhí, se a kó êt é sí mbâ Obhasi. Ka biji, á yúi Jisos Krayis, kən ka Ntʉgantʉ Obhasi, a yîm yê a nyə́me ka ekʉ̂.

¹⁹Ka ikom í Ntʉgantʉ nnyó, Jisos a jî sə́re achot Obhasi mbâ ábho mba Obhasi a kíi ka ókúmí.

²⁰Mba yê a jî sə́re nná nâ mba éməné á ká ki ḿbə́ŋé na Obhasi ka ebhú Nowa á gbek okpi obhê, kpe noŋ yê Obhasi a kə́bhe ḿbə́ŋé, a chighá se kə́n á yóŋe ḿbə́ŋé ábho. Ka ebhú achot í Nowa mmá, ane chénchén-chenchen mba Obhasi a nyáŋe ka ayép, a ri eníganî.

²¹Enyáŋám njí ka ayép, á kí ko égyé noŋ ayép efúghúm mma á kí yim ên ó sém. Ayép Obhasi á ká joé sê ó yighi akôp ka biji noŋ nne á yumí nná ayép. Á rî ejûm nji ó chimi ó kare Obhasi na ḿbə́ŋé eya jáé. Ayép efúghúm á kí yim wâ o sêm ka obhí obhâ ka obhô enyəmə́m nji Jisos Krayis a nyəmê ka ekʉ̂.

²²Jisos nnyó a jî nnyi ósô, a kun ágo ka ekumi ejík, ka mkpe obhô-orûm Obhasi. Baénjel na ikom eték chénchén na ikom kpe mfə́n kpe mfə́n á chəbhe ka óséré obhê.