Read ejagham 1 Pita, echî 4 Bible Online

1 Pita, echî 4 - ejagham bible

1 Pita, echî 4

¹Deê ó tît ên mân ekpak oseŋe biji mbi Jisos Krayis a yéne, kən ó fôn ên osoná-ḿbə́ŋé noŋ yê. Echî a ri jen? Nne nnyo a kí yen oseŋe ntʉ́ghi mbí, nchot obhí na yê fə́ne a manê áno oman.

²Deê é róghé mân ka égyé, jeghê ofon ên ekpin ka nsi nnyí ka ekpak Obhasi a wóme, ekpak ane ngun á wóme asík.

³Ó fon ên ekpin kpá ka ekpak ane mba á ká məŋé Obhasi á fóna. Eyimím achot akôp, ekpatə́m ekot na achot í ngun, aməm egboóm, ejiím birom énə́mé-énə́me, na atû mma ó kará ên biji ka ajom etóbhóm.

⁴Kən mfá-mfá ane mbá mba á ká məŋé Obhasi, é kí man ábho biji nji á ro kpó yen ên ó chə̂m na ábho ka echâk ekpin njí. Ka obhô mbí, a chə́bhe mân á tuk ên.

⁵Kən á rî á sə́ré obhí ábho bhə́t na bhə́t ka ochî Obhasi nnyo a ri ngyím ka etáŋám chénchén nne, kpe a kpóe okpó, kpe a ri mbít.

⁶Nâ echî á kóe otîp ogyebhá-ḿbə́ŋé á jak mbâ ábho mba á kpo á ji, se ka ekpin í ngun á táŋ ábho noŋ ane chénchén, kən ka ńtʉgântʉ á fôn ekpin noŋ Obhasi.

⁷Ntə̂m a sî chén. Ka echî njí aŋ, deê kpe énê a fi biji ibhê, a na biji, tîk a tʉ́ri ogoré Obhasi.

⁸Nji é fáŋe é chîŋ ochíŋ a ri okot. Kot ên atem-ane na ḿbə́ŋé-a-ḿbə́ŋé. Echî aŋ? Okot ó kí tane obhí etî-etî.

⁹Ntem a bháe wâ ka njû, fi yê nono o kâ kêp se nâ oseŋe etat.

¹⁰Bikəp Obhasi í ti otí. Nji-nji a karê wâ, kô ńjə́ne nyáŋa atem-ane, ó tʉ́ri otóŋé onobhá-eji Obhasi mbi ó rî ka mkpak ka mkpak.

¹¹We nnyo Obhasi a karê wâ se o sə́rá otîp, sə́re otîp Obhasi. We nnyo o ri noŋ ḿgbán, tʉ̂k ka ekpak ikom mfi Obhasi a karê wâ. Nji kpe énê a kí yim ka ekpak Obhasi a karê yê, ngun tîk á káre Obhasi nkat ka obhô Jisos Krayis. Deê ejík na ikom chénchén í fôn yê ka ótúm-ótúm. Áno.

¹²Atem í ḿbə́ŋé, oseŋe ó ti ó chiŋ ka ngaé nnyi á gáa ên, kən deê é kâ jóe ên ejûm okpógha-biji sê achot mma á fábha na ên, ane á ká nok oyén.

¹³Kó ên oseŋe mbí na ogyebhá-ḿbə́ŋé, ka áfo nâ o kí fon ên eyəné nkiri ka oseŋe mbi Krayis a yéne. Tîk o fôn ên mân ogyebhá-ḿbə́ŋé ka ofú mbi á yim ane á yén ekpatə́m ejík ejê.

¹⁴Deê ó fôn ên ogyebhá-ḿbə́ŋé ájoé ngun á kí tu ên ka o ri ên atem-ane Krayis. Ńji é toŋe sê Ntʉgantʉ Obhasi nnyi a fonê ejík a ri na ên.

¹⁵Deê nne a kâ yên oseŋe ka obhô sê a ri nyúa-nne, a ri nnyágha-ejʉ̂, a ri nne mbí, na kpe sê á kaghá nnyo ka achot ane etat.

¹⁶Kən ájoé o kí yen ên oseŋe ka o ri ên atem-ane Krayis, deê é kâ jóe ên ejûm ísonê. Kûp ên a ri Obhasi, ka ó kam ên mbiŋ atem-ane Krayis.

¹⁷Ebhú é si nji Obhasi a kí taŋ ngun, a kí raŋ mbá kpá na ane abhê. Ájoé Obhasi a kí roghe kpá na ane abhê, tîk a jéghe mân nan na ane mba á ká ki ḿbə́ŋé na otîp ogyebhá-ḿbə́ŋé mbi ó dʉ̂ mbâ eye?

¹⁸Á séŋe sê, “Ájoé é kí yuŋi kən ane ano á sém, ane abhí mba á ká məŋé Obhasi mân aŋ?”

¹⁹Nâ deê ane mba á kí yen oseŋe ka a ri Obhasi nâ a wóme se á yén, á nôk ka ntûm i nno eyimím, á káre biji chénchén mbâ Obhasi nnyo a yimî ngun, ka kpe bhaghé ejûm a chimî, á yimá ńjə́ne.