Read ejagham 1 Pita, echî 5 Bible Online

1 Pita, echî 5 - ejagham bible

1 Pita, echî 5

¹N kí goré ên, ane-echî echəme atóbhá Jisos, mme nne-echî ka echəme njí eróŋ. Mme a ri ntî-isê nnyo n yéne oseŋe mbi Jisos Krayis a yéne. Mme eróŋ n kí fon nkiri ejík ejê nji tîk a yîm ane á mə́ŋe. N kí goré ên,

²deê ó bhábhé ên ane mba Obhasi a karê ên ka obhô. Bhábhe ên ábho noŋ kpe mbábha-obhúi na obhúi obhê. Bhábhe ên ábho na okorá-ḿbə́ŋé ka ekpak Obhasi a wóme é kâ jóe noŋ kpe á chóe ên ochóé. Yim ên etûm ejə́né ka o korê ên sê ó yîm, é kâ jóe ka obhô orʉrí mbi o kí fon ên ka etím.

³O kâ kére ên sê ên a ri atúi-ofâm, ane abhə́né á rî óséré obhə́né, kən deê ó tóŋé ên ekpin nji ane abhə́né á kí top.

⁴Ó joé ên ka ekpak njí, ebhú Ntûfâm Abhábhá-obhúi ányo á bha, á kí kəbhe ên itam ejík mfi í bhó kpo ayép.

⁵Ka ekpak njí jə́t, ên abhóné eróŋ, o ri ó yúk ên ane-echî abhə́né. Nne owəné kpe yót a kâ yúŋa biji, tʉ̂k ên atem, ka á séŋe sê, “Obhasi á bhó kot nyuŋa-biji, kən á toŋá onobhá-eji obhê mbâ nnyo á bhó yuŋ biji.”

⁶Nâ kî ên biji ibhə́né ka óséré ikom Obhasi, ofú ó bhik, tîk a yûŋ ên mbiŋ.

⁷Maghê ên chénchén nji é kára ên onyʉghá-ḿbə́ŋé ka obhô obhê, ka yê a ri ágo a bhábhá ên.

⁸Fiî ên biji, joê ên ka ibhábhé, ka Satan nnyo a ri nne-ebhan owəné a kí kuk a fará noŋ nki se yê a wóm nne a dí.

⁹Joê ên tə́mé-tə́mé ka ḿbə́ŋé nnyi o kíi ên na Obhasi, taŋê ên Satan ka ó məŋe ên sê nâ oseŋe mbi chénchén atem-abhon-í-nnyen ka ngun ndə́m á yéna.

¹⁰Ó yen ên mân oseŋe ka mkpât ebhú, Obhasi tîk a káre ikom, a yîm ên o sôn, o fôn ên arʉk ka nsi. Yê nnyo a fonê onobhá-eji chénchén, nâ a bhiŋî ên se ó chə̂m ên na Krayis ka ekpin ótúm-ótúm.

¹¹Deê ikom chénchén í jóe ifê ka ótúm-ótúm. Áno.

¹²A ri Siras nnyo ń yen bəre ntem-mmon-i-nnyen ka etʉri nâ a kaghê ə̂m obhô, e sêŋ nwet nnyí. N séŋe bəre ń kâk ên ikom, ń sə́ré noŋ ntî-isê bəre nchot nnyí a ri mfoné-mfoné onobhá-eji Obhasi. Fiî ên ka ńnyə́ne, obhô ó sôn.

¹³Echəme ane atóbhá Jisos nji Obhasi a sáŋe fə́ne ngá ka Babiron é kí tum ên ekûp. Mmon omé Mak a kí tum fə́ne ekûp.

¹⁴Kûp ên atem na otama-ngaŋ mbi atem-ane Krayis. Deê enare é jóe na chénchén ên mba o ri ên na Krayis.