Read ejagham 2 Pita, echî 1 Bible Online

2 Pita, echî 1 - ejagham bible

2 Pita, echî 1

¹Nwet nnyí a dʉ mbâ amé, Simun Pita, ka ḿgbán i Jisos Krayis nnyo ń tʉgha. Ń tuma ńnyə́ne mbâ ên mba ó ki ên ḿbə́ŋé na Jisos noŋ êt eróŋ. Ḿbə́ŋé ekíím nnyí a ri ekpatə́m ejûm mbâ eyəré chénchén. E kíi ḿbə́ŋé nnyí ka obhô Jisos nnyo á yimá iyîm ka nnyen-i-mbá. Yê a ri Obhasi nnyo á yimá êt e sémá.

²Deê Obhasi a tóŋé ên ekpatə́m onobhá-eji, a karé ên enare esúi-esúi, ka ó məŋe ên yê na Ntûfâm owəré Jisos Krayis.

³Obhasi a kô ekpatə́m ikom ifê a káre êt chénchén nji e wóme kən é fôn ekpin ka ekpak yê a wóme. A yimî ka obhô eməŋə́m nji e məŋê yê. A sáŋe êt se é chə̂m, é mə́ŋe ejík na nnyen erû ejê.

⁴Ka ekpak njí, a káre êt ekpatə́m í bikəp ino mbi yê a chimî nná. Echî aŋ? Se ka obhô bikəp mbí, tîk o bê ên o mághe achot abhí ngun nnyí mma ane á kóra, o tôp ên ekpin ejê.

⁵Kən ó fôn ên ekpin njí, nok ên ka ekpak o kí kpe ên nnyen erû ka okíghá-ḿbə́ŋé obhə́né. Kpeê ên oməŋá-ejûm ka nnyen erû njí.

⁶Fon ên énoê oməŋá-ejûm mbí, o fik ên biji. Nji o kí fighâ ên biji, kə́bha ên ḿbə́ŋé. Nji o kí kəbhâ ên ḿbə́ŋé, fon ên ekpin ka ekpak Obhasi a wóme.

⁷Deê ekpin njí ka ekpak Obhasi á woma, é jên na onobhá-eji mbâ ntem-mmon-i-nnyen, o jéghe okpe na okot.

⁸Nâ ekpin nji o fonê ên efiím. Ó fon ên fə́ne ńjə́ne esúi-esúi, é kí yim ên o jóe ên son-son, ache ó bhó chaghé ên ka nchot i Ntûfâm owəré Jisos Krayis nnyo ó məŋe ên.

⁹Kən kpe énê nnyo á ka fon ekpin njí a ri noŋ ntána-amə̂t, á ka fon íkíkéré, ka a gyíni se Obhasi a rî nsôn a sû obhí obhê.

¹⁰Atem-abhon-í-nnyen, nâ nok ên mân ekpak nji nne a kí yim esáŋám nji Obhasi a sáŋe ên, é fáp echî. Ó yim ên ka ekpak njí, ḿbə́ŋé nnyi o kíi ên nná á bhó təm ka mbá.

¹¹Tîk á káre ên mân ikom ó gyé ên otúi Ntûfâm owəré Jisos Krayis mbi ótúm-ótúm. Yê nâ á yimá êt e sémá.

¹²Nâ ńjə́ne tîk n tirá ên achot mmá chénchén ebhú, kpe noŋ ó raŋ ên áno mbá ó məŋe ên ḿmáne, ó son ên fə́ne nnyen esonóm ka mfoné nchot nnyi Obhasi á káre ên.

¹³Ń kere bəre é rî nono n yimá ên o tirá achot mmá nji n nyə́ne nná mbít.

¹⁴Ḿ məŋe bəre ebhú ejámé é si chén ka ekpak nji Ntûfâm owəré Jisos Krayis a sə́re ə̂m, á ka bhə́t.

¹⁵N di ń nôk mân nnyen enoghóm bəre ó fôn ên mbá nnyi o kí ko ên o tirá ên achot mmá chénchén ebhú, kpe m kpóe okpó.

¹⁶Nchot ekpatə́m ebháám nji Ńtâ Jisos Krayis nnyi é səra ên áno mfá, é ka sə́ré áfúbhí, e yéne eyúp ejê njí na amə̂t amə́ré.

¹⁷Êt e ri ka eji, ebhú Obhasi Ńsé a karê yê ekûp na ejík. Nâ ebhú ejík Obhasi é bháe na eyum se, “Ḿfa a ri Mmon okot omé, ḿ foná ogyebhá-ḿbə́ŋé na yê.”

¹⁸Êt áfoné e yûk eyum njí nji é dʉ̂ nnyi ósô ka ebhú e ri na yê ka egúí Obhasi.

¹⁹Êt mân nâ e yéne jáé nchot nnyi akará-otîp Obhasi á chóre. É nóbhe sê ó yúk ên nchot ábho nnyí. Ńnyə́ne a ri noŋ eyâŋ nji á nyoe á ki ka ejírim ta ofú ó che kən ebhát ofú é gye wâ mân ka amə̂t, ḿbə́ŋé a jáe wâ.

²⁰Məŋê ên ka ndaŋa-mbá eji sê kpe nchot akará-otîp yə́t nnyi a dʉ ka íkíkéré ntem-nne cháŋ.

²¹Ka nan? Akará-otîp mbá á ka chot ka ikom ábho, kən a ri Obhasi Ebhare Ntʉgantʉ nâ a kí yim ábho á səra otîp mbi ó dʉ̂ mbâ Obhasi.