Read ejagham 1 Jon, echî 1 Bible Online

1 Jon, echî 1 - ejagham bible

1 Jon, echî 1

¹E kí chot nchot ka nwet eyəré nnyí é kpê na nne nnyo a ri eyum Obhasi nji é kí karé nne ekpin. Nne nnyó a râŋ mbá a jóe kən kpe ngun a róghé. Êt áfoné e yûk esə́re ejê, e yên yê na amə̂t amə́ré e kêp, e kə́me yê na abhô amə́ré.

²Nne nnyó a bháe a bhâ kúmi na êt, e yên ekpin ejê. Nâ echî e kí səre ên mân mfá-mfá noŋ atî-isê nne nnyó, yê nâ a ri fə́ne ekpin ótúm-ótúm. Nne nnyó a ri kpá na Obhasi Ńsé, kən Ńsé a tûm yê se a bhá kumí na êt.

³Nji e yúghi na atûŋ, e yên na amə̂t, e kí səre ên fə́ne sê ên ó chə̂m na êt ka ochəma-biji mbi e fonê na Ńsé na Mmon owe Jisos Krayis.

⁴É seŋa nná, sê ogyebhá-ḿbə́ŋé mbi e fonê ên ó súi ó fâŋ ó chíŋ ochíŋ.

⁵Deê é sə́ré ên mân otîp mbi Mmon Obhasi a kóe a bhák. A sə́re êt se Obhasi nâ ebhát, ejírim na yê kpák cháŋ.

⁶Ájoé é to sê êt é chəm biji na Obhasi, kən e nyə́ne e yimá achot abhí noŋ ane á rî ka ejírim, áfo nâ é səre áfúbhí ka nchot i nnyo eyəré na ka oyima-ejûm obhə́ré.

⁷Kən ájoé ekpin ejə́ré é kí jen ka ebhát nji Obhasi yê ḿfoné a ri, nâ é fon ochəma-biji na atem. É joé ekpak njí, nâ agyʉ́ŋ mma Mmon owe Jisos Krayis, á rî ágo á suk chénchén obhí obhə́ré á yighá.

⁸É to sê é ka yim obhí, áfo nâ e kí rirí biji ibhə́ré, mfoné nchot nnyi Obhasi cháŋ êt ka ḿbə́ŋé.

⁹Kən ájoé é rak obhí obhə́ré é səre Obhasi, yê a ri nnyen i nne, tîk a rî êt nsôn ka ekpak nji yê a chimî, a sû chénchén obhí obhə́ré a yíghi.

¹⁰É to sê êt é ka yim obhí, nâ e kí ko Obhasi noŋ nne áfúbhí, nâ fə́ne eyum í nchot ejê é ká gye êt ka echî.