Read ejagham 1 Jon, echî 3 Bible Online

1 Jon, echî 3 - ejagham bible

1 Jon, echî 3

¹Kére ên mân ekpatə́m okot mbi Obhasi Ńsé a fonê na êt nji ta a chə́bhe a bhiŋá êt abhon abhê. Ka etʉri, êt a ri abhon Obhasi. Ane ngun á ká məŋé êt noŋ abhon Obhasi, ka kpe Obhasi Ńsé yê ḿfoné ábho á ká məŋé.

²Atem í ḿbə́ŋé, ka mfá-mfá njí, êt a ri abhon Obhasi, kən é ka məŋé nji yê a fiî a kî êt ka nsígha-njəm ebhú. Chénchén nji e məŋê ka ebhú njí é rî sê, ebhú Krayis á bha, êt e kí joé noŋ yê, ka tîk e yên yê ka ekpak a ri.

³Kpe énê nnyo a kí chik na ḿbə́ŋé ányi se yê a joé noŋ Krayis, a kí məŋé se kpe mô obhí a kâ fôn, ka Krayis yê ḿfoné á ka fon obhí.

⁴Kpe énê nnyo á yimá obhí, a gbô ebhín Obhasi, ka obhí eyimím a ri ebhín egboóm.

⁵Kən ó məŋe ên sê Krayis a bháe a bhá yighí obhí ane ka ngun. Ó məŋe ên fə́ne sê yê kpák á ka fon obhí.

⁶Ka obhô mbí, kpe énê nnyo ekpin ejê é kə́ra na Krayis, á bhó yimâ obhí. Kpe nnyón nne nnyo á yimá obhí nâ ḿbə́ŋé eye á ka məŋé Krayis, á ka yén yê fə́ne.

⁷Abhon í ḿbə́ŋé, deê nne kpe yót a kâ ríri ên. Kpe énê nnyo a kí yim ekpin ka nnyen-i-mbá, a ri nnyen i nne noŋ Krayis.

⁸Kən nne nnyo a kí yimâ obhí nâ a fóŋé Satan, ka ta ka eróghá-ndə́p í ngun Satan a ri nyima-obhí. Nâ ejûm nji é kóe Mmon Obhasi a bhák ka ngun. A bháe a bhá bhibhi chénchén etûm í Satan ka ngun nnyí.

⁹Nne nnyo a chə́bhe mmon Obhasi, obhí á bhó yimâ, ka ejímí Obhasi é rî yê ka biji. Ntʉ́ghi nne ányo á bhó kət ka obhí eyimím, ka Obhasi a ri Ńsé owe.

¹⁰Ngyím a ri nnyi e kí ko e mə́ŋe sê nne nnyó a ri mmon Obhasi, ńnyô a ri mmon i Satan. Kpe énê nnyo cháŋ a yimá erû ka nnyen-i-mbá, á bhó korâ ntem-mmon-i-nnyen, a ri mmon i Satan nnyo Obhasi asík.

¹¹Ta ka eróghá-ndə́p ó yuk ên otîp mbi sê e ri é fôn okot na atem.

¹²Deê e kâ fôn ekpin noŋ nne etat ka ane-atəm nnyo a kamê mbiŋ se Keyin. Keyin a fonê ekpin nji mmon i Satan. A fî fə́ne enyeré ejê a yúi. Echî etat cháŋ nji a yúi enyeré ejê, é ká chiŋi sê Keyin a fonê ekpin ebhí, enyeré ejê a fonê nnyen ekpin.

¹³Atem-abhon-í-nnyen, deê mân é kâ jóe ên ejûm okpógha-biji nji ngun á bhána ên.

¹⁴É məŋe sê é maghe ekʉ̂ é gye ka ekpin, ka é fon okot na atem-abhon-í-nnyen. Nne kpe nnyón nnyo á ka fon okot na ntem-nne Krayis, a nyə́ne ka óséré ekʉ̂.

¹⁵Kpe énê nnyo á bhaná ntem-mmon-i-nnyen, a ri nyúa-nne. Ó məŋe ên ngá fə́ne sê nyúa-nne kpe yót nnyo a kí fon ekpin Obhasi nji ótúm-ótúm cháŋ.

¹⁶Krayis yê ḿfoné a tóŋe êt ejûm nji á bhíŋa sê okot ka ekʉ̂ nji a kpóe ka echî ejə́ré. Ka ekpak njí, kə́n êt eróŋ e fonê ka ekamám ekʉ̂ ka echî atem-abhon-í-nnyen.

¹⁷Ájoé ó fon iyîm í ngun kən o yên ntem-mmon-i-nnyen a ri ka eket, kən o yíghi amə̂t ó ka nyáŋé, okot Obhasi ó kí yim nan ó jóe wâ ka ḿbə́ŋé.

¹⁸Kérê, deê é mə́ŋe ên mân sê okot ó kâ jóe ka nnyo ńnyô, deê é kôt na ḿbə́ŋé-a-ḿbə́ŋé, é toŋe fə́ne ka eyimím ejə́ré.

¹⁹A re okot ntʉ́ghi mbí nâ ó kí yim êt é mə́ŋe sê mfoné nchot nnyi Obhasi a ri êt ka ḿbə́ŋé. Okot mbí nâ ó kí yim ḿbə́ŋé á bhó rəm êt ka ochî Obhasi.

²⁰Kpe ḿbə́ŋé eyəré a kí səre êt se é yim obhí, aya á bhó choghé êt, ka Obhasi yê ḿfoné a chíŋi ḿbə́ŋé eyəré, a mə́ŋe fə́ne chénchén ejûm.

²¹Kən atem í ḿbə́ŋé, ájoé ḿbə́ŋé eyəré á ka sə́ré êt se é yim obhí, nâ kpe echî nji e kí fon efup ka ochî Obhasi cháŋ.

²²Yê a kí karé êt kpe bhaghé ejûm nji e bhə́bhe, ka e kí ki ebhín ejê, e yimá fə́ne iyîm mbí ḿbə́ŋé á gyebhá yê.

²³Obhasi a sə́re êt se, deê é yûŋ ḿbə́ŋé é kí na Mmon owe Jisos Krayis, e kôt fə́ne atem ka ekpak nji Jisos a sə́re êt.

²⁴Nne kpe nnyón nnyo a kí ki ebhín Obhasi, a kí kət na Obhasi, Obhasi eróŋ na yê. Nji é kí yim êt é mə́ŋe sê Obhasi a kí kət na êt a ri Ebhare Ntʉgantʉ owe nnyo a karê êt.