Read ejagham 2 Jon, echî 1 Bible Online

2 Jon, echî 1 - ejagham bible

2 Jon, echî 1

¹Mmá nnyo Obhasi a sáŋe, n kí kup wâ na abhon abhâ. A re mme nnyo n di nâ nne-nkúí ka achot Obhasi nâ ń kubha áno. Okot obhámé na ên ó faŋ kpe-eji. Kpe mme átíŋ-atiŋâ asík m fonê ekpatə́m okot mbí na ên. Chénchén ane eróŋ mba á mə́ŋe mfoné nchot nnyi Obhasi, á fon okot mbí na ên.

²E fonê okot mbí ka mfoné nchot nnyi Obhasi a ri êt ka ḿbə́ŋé, á bhó maghé êt ta ótúm.

³Deê Obhasi Ńsé na Jisos Krayis nnyo Mmon owe, á tóŋe êt onobhá-eji, á rî êt nsôn, á káre êt fə́ne enare. Deê é fôn chénchén ofa mbí, e jéghe ofon fə́ne mfoné nchot nnyi Obhasi na okot.

⁴Ḿbə́ŋé a gyébhe ə̂m kpe-eji nji n yúghi bəre etʉ̂ mba á rî nâ abhon abhâ, á kí tobhâ mfoné nchot nnyi Obhasi ka ekpak nji Obhasi Ńsé yê ḿfoné a sə́re êt.

⁵Mmá, ń ka séŋ mfá-mfá bəre ḿ kpó karé wâ ebhín efê, kən a ri ńjə́ne jə́t nji e fonê ta ka ebhú e róghe ḿbə́ŋé ekíím na Obhasi. Ebhín í nchane é rî sê deê é kôt atem.

⁶Okot a ri sê ó ki ebhín Obhasi. Ebhín í nchane nji ó yuk ên ta ka eróghá-ndə́p é rî sê, é fôn ekpin okot.

⁷Ane-áfúbhí mba á kí tʉ nne a gyê etə́m á jabhe ngun. Ane mba á bhó kam sê Jisos Krayis a bháe ka ngun nnyí noŋ nne. Nne kpe nnyón ntʉ́ghi nnyó a ri nne-áfúbhí na nne-ebhan í Krayis yót fə́ne.

⁸Deê ó fî ên mân biji ibhə́né, nne a kâ yîm é tán yê ka etûm nji ta a yîm, kən deê a fon ekəp Obhasi é súí é fúk.

⁹Kpe énê nnyo á bhó top okpígha-ejûm í Krayis, kən a kí toŋâ se yê a mə́ŋe a chîŋ, nâ á ka fon Obhasi ka ḿbə́ŋé. Kən nne nnyo a kí tobhâ okpígha-ejûm mbí, nâ a fonê Obhasi Ńsé na Mmon owe ka ḿbə́ŋé.

¹⁰Kpe énê nnyo á bha mbâ eyəné, á ka bhá na okpígha-ejûm í Krayis, deê o kâ káre ên yê kpe ekumi. Kpe ekûp í nnyo nji se, “Deê enare é jóe na we,” o kâ kûp.

¹¹Kpe énê nnyo á goré se enare é jóe na nne ntʉ́ghi nnyó, nâ fə́ne a chə̂m na yê ka obhí eyimím.

¹²Achot á ti mma kə́n n kí wom ń sə́ré ên, kən tîk ḿ bó wom ń séŋ fép ka nwet. Ń woma bəre ta ḿ bá ejen ágo, tîk e kúmi ochî na ochî e kúbhi na atem kən é fôn ekpatə́m ogyebhá-ḿbə́ŋé.

¹³To ó məŋe ntem-nne Krayis owa nnyo nne-nkáé ányo nnyo Obhasi a sáŋe, abhon abhê sê ń kúp wâ.