Read ejagham 3 Jon, echî 1 Bible Online

3 Jon, echî 1 - ejagham bible

3 Jon, echî 1

¹Nwet nnyí a dʉ mbâ amé nnyo n di nâ nne-nkúí ka achot Obhasi. Ntem i ḿbə́ŋé omé Gayus, nnyo n korê na ḿbə́ŋé-a-ḿbə́ŋé, n sə́ŋe áno nwet nnyí mbâ eya.

²Ntem i ḿbə́ŋé, n kí goré Obhasi bəre ekpin é jên nono na we, o ri fə́ne ka osoná-biji. A re ḿ məŋe bəre ngyím eya ka achot Obhasi a ri nono.

³É joe ə̂m a ri ekpatə́m ogyebhá-ḿbə́ŋé nji etʉ̂ atem-abhon-í-nnyen á chəbhé njəm á kí sərâ ə̂m ekpak nji o ri tə́mé-tə́mé ka mbá Obhasi na ekpak fə́ne nji ó tobha mfoné nchot eye.

⁴Ejûm etat é kára ə̂m ekpatə́m ogyebhá-ḿbə́ŋé cháŋ, é ká chiŋi nji ń yuk sê abhon abhámé ka Obhasi á kí tobhâ mfoné nchot nnyi Obhasi.

⁵Ntem i ḿbə́ŋé, ekpak ekpin nji o fiî na atem-abhon-í-nnyen kpe noŋ á rî ajéné, é rî ka mbá.

⁶Á səre esə́re okot obhâ ngá ka echəme atóbhá Jisos. Ítəbhé, kak ábho obhô, ejen ábho é jî ochî. Yim ka ekpak é kí kot Obhasi ka ḿbə́ŋé.

⁷Á yə́bhe ejen ábho ka obhô Krayis. Á ká tabhé kpe ekəp jə́t mbâ ane mba á ká ki ḿbə́ŋé na yê.

⁸Ka obhô mbí, êt e ri é kâk ane ntʉ́ghi mbá obhô. É yim áno, é chə̂m na ábho ka etûm í mfoné nchot nnyi Obhasi.

⁹Ń seŋ nwet ń tum mbâ echəme atóbhá Jisos ágo mbâ eyəné, kən Diyotrefes nnyo á kebha biji se yê nâ a ri nne-echî, á bhó yubhi nchot amé.

¹⁰Ka obhô mbí, ebhú ḿ ba, kpe bhaghé ejûm nji Diyotrefes a yimî, é kpê na ekpatə́m áfúbhí fép mma a sə́re a kpê na êt, n kí tup jáé. Nji é gáre é bhîp ka achot mma Diyotrefes a yimî é rî sê á bhó fi atem-abhon-í-nnyen mba ajéné. Á taŋá fə́ne ane etat á kâ fî ajéné, a yighá mba á fi ofi ka echəme atóbhá Jisos.

¹¹Ntem i ḿbə́ŋé, kpe ofú bhə́t o kâ tôp erû ebhí njí, deê ó tóp erû eno. Nne nnyo á yim ono a ri nne Obhasi, kən nnyo á yim obhí á ka məŋé Obhasi bhúghí-bhúghí.

¹²Kpe énê a kí səre se Demetriyus a fôn erû. Ekpin ejê fə́ne é toŋe sê a ri nne nnyo a ri na erû. Kpe êt eróŋ é kam sê a ri na erû. Ó məŋe ên ngá sê nji é chot é rî ka echî.

¹³Achot á rî etî-etî mma kə́n n kí wom ń sə́ré wâ, kən ń ka wóm ń kâk fép ka nwet.

¹⁴Íkíkéré í rî ə̂m bəre ń yén ên mkpât ebhú. Ebhú é kpughi, tîk e kúbhi ochî na ochî.

¹⁵Deê enare é jóe na we. Atem abhâ fép ngá sê ń kúp wâ. Deê ó kúp fə́ne atem abhə́ré ágo ka echî ka echî.