Read ejagham Ndem~i jon, echî 1 Bible Online

Ndem~i jon, echî 1 - ejagham bible

Ndem~i jon, echî 1

¹Achot í nwet nnyí a ri mma Jisos Krayis a tóŋe jáé mbâ ḿgbán owe Jon. A ri Obhasi yê ḿfoné nâ a karê Jisos achot mmá se a tóŋé ágbán abhê, kən Jisos a tûm áno énjel a bhá toŋe Jon. Achot í nchane á rî á kpê na nji é kí fap ka mkpât ebhú.

²Jon a ri ntî-isê ka achot chénchén mma yê a yéne. A kí seŋ mfá a kpê na otîp mbi Obhasi a karê na nchot ka echî nnyi Jisos Krayis a tóŋe jáé.

³Deê ogyebhá-ḿbə́ŋé ó jóe na nne nnyo a bhiŋ ejûm nji Obhasi a chorê nná sê tîk é fâp. Deê ogyebhá-ḿbə́ŋé ó jóe ó káre ane mba á yuk nchot nnyí, á yim fə́ne nji á yúghi, ka ebhú é kpiri.

⁴Mme Jon, n kí kup ên ane Obhasi chénchén ka bichəme atóbhá Jisos inígisá mbi í rî ebhat Esiya. Deê onobhá-eji na enare í jóe na ên. Onobhá-eji na enare mbí í dʉ̂ mbâ yê nnyo a ri égyé, a joé ebhú áji, a kə́ bha fə́ne ka nsígha-njəm ebhú. Í dʉ̂ fə́ne mbâ ńtʉgântʉ enígisá nnyi a ri ka ochî ekumi otúi obhê.

⁵Ó dʉ̂ fə́ne mbâ Jisos Krayis, ntî-isê nnyo á bhó səre áfúbhí, ndaŋa-mbá Mmon ojî nnyo a nyəmê ka ekʉ̂, Ntûfâm nnyo a fonê chénchén atúi-ofâm í ngun. Deê ejík é jóe fə́ne é káre yê nnyo a tóŋe êt okot, a kô agyʉ́ŋ amê a yîm êt é sem ka obhí obhə́ré.

⁶A kî êt otúi, a yîm êt akará-agore se é tʉ́k Ńsé owe Obhasi. Deê ejík na ikom chénchén í jóe í káre Jisos Krayis ka ótúm-ótúm. Áno.

⁷Kêp ên, a kə́ bha ka átʉ́k-í-ngurobhú, kpe énê tîk a yên yê. Kpe ane mba á yúi yê nná tîk á yên yê fə́ne. Nték ka ngun ndə́m tîk á rʉ́ri ka obhô obhê. Nâ noŋ é kí joé fə́ne ka etʉri. Áno.

⁸Ńtâ Obhasi Ósô se, “Mme Obhasi nâ n di Ndaŋa-mbá, mme nâ n di Ntə́ma-njəm.” Yê a ri égyé, yê nâ a ri ebhú áji, yê fə́ne nâ a kə́ bha ka nsígha-njəm ebhú.

⁹Mme a ri Jon, ntem-mmon-i-nnyen owəné. Noŋ ntóbhá Jisos, ń chəm na ên ka oseŋe mbi é yena ka nchot otúi obhê, e kə́bhá ḿbə́ŋé. Á kâk ə̂m ka eji óráné-ngun etat mbi ayép á fáre ka ń kará otîp Obhasi ka ekpak nji Jisos Krayis a tóŋe jáé. Á bhíŋa eji óráné-ngun njí sê Patmos.

¹⁰Ka ofú oyoá-biji bhə́t, Obhasi Ebhare Ntʉgantʉ a gyê ə̂m ka biji. N yûk ndûm eyum noŋ kpe á fíi abhukpoŋ, mbá-njəm amé.

¹¹Nji eyum njí é chóre é rî sê, “Sêŋ kpe bhaghé ejûm nji o yéne ka nwet, tûm mbâ bichəme atóbhá Jisos inígisá ebhat Esiya ndə́m. Tûm Efesus na Simena na Pegamom na Tayatira na Sadis na Firadefiya na Layodisiya.”

¹²Nji n yúghi nchot nnyí, m kpíghi bəre ń yén nne nnyo á chorá na mme. Kən nji m kpíghi, n yên bijighi-eyâŋ inígisá mbí á yími na gûl.

¹³Ka étíŋanti bijighi-eyâŋ mbí, n yên nne noŋ Mmon-i-ntem-nne. A kaghê árâm-í-ḿfô etat ka biji, a bhôp ndíghí etat a fáre agbaŋe amê. Á yími fə́ne ndíghí mmí na gûl.

¹⁴Echî ndə́m na nnyʉ̂ echî eye á bhara kpáŋ noŋ ébháré-mfughikəm. A bhárá noŋ atáé-ngurobhú. Amə̂t amê á bhik noŋ erəmta-ngûn.

¹⁵Akát amê á runá nwaŋ noŋ iséné mfi á yóe ka ngûn sê á yíghi akôp. Eyum ejê ka nnyo é sóna noŋ kpe ejok nji ó yugha nná ka eyʉri-ayép.

¹⁶Ka obhô-orûm obhê, a fiî ńdʉnândʉ-ósô nnígisá. Akparanja njəm-i-ngyêm ébháe á rî yê ka nnyo. Ochî obhê ó yâk noŋ njúí oyum.

¹⁷Ebhú n yéne yê, m gbô yê áfo ka ochî noŋ m kpóe okpó. Kən a kúni ə̂m obhô-orûm obhê ka biji, a chôt se, “Ka fûp, mme nâ n gyím ochî, mme nâ n gyím njəm.

¹⁸Mme nâ Njû Ekpin. M kpô, kən mfá-mfá n di ka ekpin ka ótúm-ótúm. Mme nâ m fiî ikom ekʉ̂ na mfi eték akə́bha-nsi.

¹⁹Nâ sêŋ mân nji o yéne, ekpak é rî na ka ekpak é kí joé.

²⁰Ńdʉnândʉ mmí nnígisá mmi ń dî ə̂m nná ka obhô-orûm na bijighi-eyâŋ mbí inígisá mbi á yími nná na gûl, deê ń sə́ré wâ echî. Ńdʉnândʉ mmí nnígisá a ri baénjel mma á bhábha bichəme inígisá mbi atóbhá Jisos. Bijighi-eyâŋ mbí inígisá a ri bichəme nchane.”