Read ejagham Ndem~i jon, echî 10 Bible Online

Ndem~i jon, echî 10 - ejagham bible

Ndem~i jon, echî 10

¹N yên ndûm i énjel etat a bhərá a bhák nnyi ósô. Átʉ́k í ngurobhú á fáre yê á kâk, ibhaŋ í ngurobhú í fáre echî ejê. Ochî obhê ó runá noŋ njúí, akát amê á bhîk noŋ ngûn ń dʉ̂k ka átí.

²A ri na mmon i nwet ka obhô. Nwet nnyí a ri ndəbhə́m. A kî ekát obhô-orûm ejê njəm-ósô aya, nji obhô-okáé ka ngun.

³A gyʉ́i ka ndûm eyum noŋ nki nâ á gyʉá. Nji a gyʉî, nsân enígisá a gbô.

⁴Ebhú nsân nnyí enígisá a gboê, ń tʉri biji ń séŋ, kən n yûk eyum, é dʉ̂ ka ósô, é kí chot sê, “Deê ejûm nji nsân nnyí enígisá a chorê é kə́t ka ebhə̂t, ka séŋ.”

⁵Énjel nnyo n yéne nná a gyím, ekát jə́t ka aya, nji tat ka ngun, a yûŋ obhô-orûm obhê ka ósô.

⁶A chími ka mbiŋ Obhasi nnyo a kí kpin ka ótúm-ótúm, nnyo a yimî ósô na chénchén nji é rî ka ósô, a yîm ngun na nji é rî ka ngun, a yîm aya na nji é rî ka aya, se, “Á kâ kpô bhíbhí ebhú.

⁷Se mfín á si nnyi énjel ka osúí anígisá á fi abhukpoŋ amê, ébhə́me Obhasi ka ekpak nji a sə́re akará-otîp mba á yíma etûm ejê, é fáp ka ekpak a chorê.”

⁸Eyum nji n yúghi nná mân ka ósô é kpô chot mbâ amé se, “Choŋ okô nwet nnyi a ri áno ndəbhə́m ka obhô énjel nnyo a gyím áno ka aya na ngun.”

⁹N jak mbâ énjel nnyó, n jî sə́re yê bəre a karé ə̂m mmon i nwet ányo. A chôt se, “Kô dî. Tîk a yuá oyuí ka oya obhâ, kən a seŋá noŋ akʉ́-okon ka nnyo imâ.”

¹⁰N kô mmon i nwet nnyó ka obhô obhê, n dî. Nwet nnyí á seŋá oseŋ noŋ akʉ́-okon ka nnyo imámé, kən nji m meê, oya obhámé ó chə́bhe ó yuá oyuí.

¹¹Á sə́re ə̂m mân sê, “O ri ó kpó karé otîp Obhasi o kpê na nték ka otúi ka otúi, na ane ka mkpak ka mkpak, na mfâm ka nyum ka nyum, na atúi-ofâm ka ngûm ka ngûm.”