Read ejagham Ndem~i jon, echî 12 Bible Online

Ndem~i jon, echî 12 - ejagham bible

Ndem~i jon, echî 12

¹Ekpatə́m ejûm efup etat é fâp ka ósô. A ri nne-nkáé nnyo á kaghá njúí ka biji noŋ nkʉ̂. Nnyam-ósô a ri yê mbâ óséré akát. Itam otúi mfi í rî yê ka echî í fóne ńdʉnândʉ ófó na ḿbáe.

²Nne-nkáé nnyó a ri kpít ka ejiím mmon, a kí kuk a rʉ́rá nji ojî ó nógha yê.

³Nji tat é kpô fáp nnyi ósô. N yên ndûm i nnyam achî anígisá, a bhík obhí. A fonê mbaŋ ófó. Kpe njə́n echî, itam otúi í rî.

⁴Ikî ifê í chóe ebhat í ńdʉnândʉ ósô jə́t, ó kirí ka ngûm ésá, é gbô ka ngun. A bhâ gyími ka ochî nne-nkáé nnyo á bhak nná mmon ojí, se yê a kí di mmon ányo ebhú á fap.

⁵Nne-nkáé nnyó a jî mmon nnyó, mmon i ndûm. A ri mmon nnyo a bháe ojoé ntûfâm i ngun ndə́m. Eték í ngun kpe njə́n é rî ka óséré otúi obhê. Kən nji á jíi mmon nnyó a gbô, á yûŋ yê ntə̂m yə́t á jak mbâ Obhasi ka eji ekumi otúi ejê.

⁶Nnyen i mmon nnyó a bê a gyê etə́m, a jak ka eji Obhasi a yîm a kî yê se a joé áfo, á gyek yê ka ntem i nsam i mfín ésá njəm nsam i mfín ésá (1,260).

⁷Enok é bhâ gbô mân ka ósô. Ntûfâm i baénjel a kamá se Mayikel na atem abhê á róghe enoghóm na ndûm i nnyam achî anígisá nnyí. Ndûm i nnyam nnyí a ri fə́ne na ágbán abhê.

⁸BaMayikel á bhâ kô érûm ka enok njí, ndûm i nnyam achî anígisá nnyí na ágbán abhê á ká kpo fon eji ekumi ka ósô.

⁹Á tûp ndûm i nnyam achî anígisá nnyí ka nsi. Nnyam nnyí a ri etəm í nnyô nnyi ta ka éməné á bhíŋa nná sê Ndûm i Nne-mbí, na kpe ebhú tat sê Satan. Yê nâ á rirá ane chénchén ka ngun. Á tûp yê ka nsi. Á tûp fə́ne ágbán abhê, á tôp yê.

¹⁰N yûk mân ndûm eyum ka ósô, é chôt sê, “Mfá-mfá esémém ka obhí é bha. Ikom na otúi Obhasi, na ikom í Krayis, nne nnyo Obhasi a túmi a bhá yim ngun á sém, í bha. Í bháe nan? Nne nnyo á kumá atem-abhon-í-nnyen achot, atʉ́ na efín á yaghá ábho achot ka ochî Obhasi owəré, á bhum yê ka nsi.

¹¹Á tábhe yê érûm na agyʉ́ŋ í Mmon-i-njo-mbúi ányo na otîp fə́ne mbi atî-isê Mmon-i-njo-mbúi á káre. Ane mbá mba á kpóe nná á ká ko ekpin ábho sê nâ ejûm etat.

¹²Ósô na chénchén ane mba á rî ágo, gyebhê ên mân ḿbə́ŋé. Kən ngun na ayép chénchén, é bhip ên, ka Satan a bhə̂t a bhâ ágo na oyámá-ḿbə́ŋé, ka a mə́ŋe se ebhú ejê é ká kpo rap.”

¹³Ndûm i nnyam achî anígisá nnyí, a kpo yén se á bhim yê a bhá ka ngun, a róghe ewómóm nne-nkáé nnyo a jíi nná mmon i ndûm ányo.

¹⁴Kən á káre nne-nkáé nnyó afabhe ekpatə́m ébhêk ábháe sê a fəbhé a bé a ji ka eji á kíi yê ka etəm. Tîk á gyée yê ágo ka nyâ ésá na ebhat. Ndûm i nnyam nnyí, á bhó yim yê kpe ejûm.

¹⁵Ndûm i nnyam nnyí a tûm mân ayép mma á fabhe ka nnyo imê, noŋ aya, á móbhe nne-nkáé nnyó.

¹⁶Kən nsi a bhâ nyáŋe nne-nkáé nnyó, a rə́bhe, ayép mma á dʉ̂ ka nnyo ndûm i nnyam nnyí, á gyê chénchén.

¹⁷Ḿbə́ŋé a yâm ndûm i nnyam nnyí na nne-nkáé nnyó kpe-eji, a mághe yê a jí yəm enok na abhon í nne-nkáé ányo mba ngá na ane mba á kîk ebhín Obhasi mba á gyíma ntî-isê Jisos.