Read ejagham Ndem~i jon, echî 13 Bible Online

Ndem~i jon, echî 13 - ejagham bible

Ndem~i jon, echî 13

¹Nnyam achî anígisá nnyí a bhâ gyími ka ésébhe mkpe aya. N yên mân nnyam-i-mbí etat a kí fap ka aya. Nnyam nnyí a ri na abhaŋ ófó na achî anígisá. Echî kpe njə́n é fôn etû mbâ Obhasi.

²Nnyam nnyi n yéne nná a ri noŋ mgbe, akát amê noŋ ekpak í nnyam ochu etat, nnyo noŋ nki. Ndûm i nnyam achî anígisá nnyí a kíri ikom ifê na otúi obhê chénchén na nnyam-i-mbí nnyí.

³Echî nnyam nnyí jə́t é rî noŋ a fonê ekpatə́m efú nji é chíŋi abhô ka ńjə́ne. Kən á yim efú njí é kpo. É mân ngun ndə́m biji, á róghe etóbhóm nnyam-i-mbí nnyí.

⁴Ane á róghe ejík ekarám mbâ ndûm i nnyam achî anígisá nnyí, ka a káre otúi obhê mbâ nnyam-i-mbí nnyí. Á róghe fə́ne ejík ekarám mbâ nnyam-i-mbí nnyí, á chorá sê, “Énê a síi nnyam-i-mbí nnyí? Énê kə́n a gyími enok na ńnyə́ne?”

⁵Á káre nnyam-i-mbí nnyí ekpatə́m í nnyo a yim na Obhasi. Á mághe ńnyə́ne sê a fî otúi ka nsam i nnyam-ósô ébháe njəm nnyam-ósô ébháe.

⁶Nnyam-i-mbí nnyí a róghe fə́ne Obhasi etúúm, a túk mbiŋ eye, a túk eji ekumi ejê, na ane chénchén mba á rî na Obhasi ka ósô.

⁷Á mághe ńnyə́ne sê a nok na ane Obhasi a fon érûm. Á káre yê ikom se a fon ojû ka arə́p ka arə́p, nték ka otúi ka otúi, mfâm ka nyum ka nyum, ane ka mkpak ka mkpak.

⁸Sê chénchén ane mba á rî ka ngun á kí jighi yê, é ká chiŋi ane mba á séŋe mbiŋ ábho ta ka eróghá-ndə́p í ngun ka nwet ekpin. Mmon-i-njo-mbúi nnyo á yúi nná a ri mfoné nwet nnyí.

⁹Nne kpe nnyón nnyo á fon otûŋ, deê a yúk.

¹⁰Nne kpe nnyón nnyo é joé sê á fóne ka efiím yê, á rî á fî yê fə́ne. Nne kpe nnyón nnyo á fóne ka eyúúm yê na akparanja, ekʉ̂ akparanja fə́ne nâ yê a kí kpo. Nchot nnyí á səra áno ane Obhasi á kə́p ḿbə́ŋé, á kik ḿbə́ŋé na Obhasi.

¹¹M kpô yén nnyam-i-mbí nnyi tat, a dʉ ka ngun. Ńnyi a ri na abhaŋ ábháe noŋ mmon i mbúi kən á yimá nnyo kpe-eji.

¹²A kóe ikom mbâ nnyam i ndaŋa-mbá ányi. Ka ochî nnyi ndaŋa-mbá nnyí, a yîm chénchén ane ka ngun á jíghí ńnyə́ne, nnyi a fonê nná ekpatə́m efú kən é kpo.

¹³Nnyi osúí ébháe nnyí, á yimá ekpatə́m í ntûm okpógha-biji. A yimá kpe ndûm erəmta-ngûn é dʉk nnyi ósô, é bhərá é bhak ka ngun, ane chénchén á yena.

¹⁴Á káre nná nnyam nnyí sê a yim ntûm okpógha-biji nnyí, a karé nnyam i ndaŋa-mbá. Ka obhô ntûm okpógha-biji nnyí, a kí rirâ ane mba á rî ka ngun. A kí yimâ ábho á tʉrá efóŋé nnyi ndaŋa-mbá nnyi á kághe nná efú na akparanja, kən á ka kpó.

¹⁵Á káre nnyam nnyi osúí ébháe nnyí ikom mfi a kí fi efébhe, a kâk efóŋé njí ekpin. Efóŋé njí é kí bhik nchot echoróm, é yúi fə́ne ane mba á bhó jighi yê.

¹⁶A yîm fə́ne se kpe énê, na ó fáp mbiŋ na o kâ fâp, kpe o ri mkpák, kpe o ri mfona-ntí, kpe nsʉ́ŋ, kpe mfone nsi, o kí fon eriŋ ka obhô-orûm na kpe ebhú tat ka nsáé-mbûk.

¹⁷Ó ro fon fə́ne eriŋ njí, ejûm ó bhó gurí na kpe enamám, se ó nâm. Eriŋ njí a ri mbiŋ i nnyam í ndaŋa-mbá na kpe ebhú tat mfan nnyi a gyími ka mbiŋ eye.

¹⁸Ńgyê nchot nná nnyi nne a ri a fon oməŋá-ejûm. Deê nne nnyo a fon aron, a dáŋ a məŋé echî mfan nnyi nnyam i ndaŋa-mbá. Echî aŋ? Mfan nnyí a gyím áno ka mbiŋ i nne. Mfan i nchane a ri eságasá, eságasá na eságasá (666).