Read ejagham Ndem~i jon, echî 14 Bible Online

Ndem~i jon, echî 14 - ejagham bible

Ndem~i jon, echî 14

¹Nji m kpô kép, n yên Mmon-i-njo-mbúi nnyó, a gyím ka egúí Sayon. Ane ntem-esam nsam ekû na ésá (144,000), á gyím fə́ne áfo na yê. Nâ ane mba á fóne mbiŋ eye na nnyi Ńsé owe ka ńsáé-mbûk.

²N yûk eyum ka ósô, ejok noŋ kpe ekpatə́m eyʉri-ayép na kpe ekpatə́m í nsân. Ejok njí é rî ə̂m bəre kpe asúmá-gitá nâ á chágha gitá ábho.

³Ane mba á fóne mbiŋ i Mmon-i-njo-mbúi nnyó á kí kon ekôn efê ka ochî yê nnyo á kumá ka ekumi otúi njí, na ka ochî iyîm í mbít mbí ínî na ane-akúí ane mbá á rî. Kpe nne nnyo a kí bhik eməŋə́m ekôn áji cháŋ təm mfan ane nnyi á yími nná ábho á sêm ka ngun, á ká kpo ka ngun.

⁴Ane mbá nâ á ká gye ka achot akôp enuŋúm na ane ka á fíi biji ábho. Ábho nâ á tóbha Mmon-i-njo-mbúi ányo, kpe a jiî fan. Á yighi mbá ka ane ngun, á sem. Á chəbhe noŋ ndaŋa-mbá ekəp nji á káre Obhasi na Mmon-i-njo-mbúi.

⁵Á ka nok osə́ré áfúbhí, ekpin akôp á ká fon bhúghí-bhúghí.

⁶N yên mân énjel nnyo tat a kí fəbhé ka ósô. A ri na otîp ogyebhá-ḿbə́ŋé mbi ótúm-ótúm, a kí səre mbâ ane mba á rî ka ngun. A kí səre ane ka mkpak ka mkpak, na ojû ka arə́p ka arə́p, na mfâm ka nyum ka nyum, na nték ka otúi ka otúi.

⁷Énjel nnyó a chôt ka ndûm eyum se, “Fup ên Obhasi, karê ên yê ejík ka ebhú ejê é si nji a kí taŋ ngun. Karê ên ekûp na ejík mbâ yê nnyo a yimî ósô na nsi. A yîm aya, a yîm abhon ayép.”

⁸Énjel nnyo tat a tôp nnyo ndaŋa-mbá nnyó a kí kuk se, “Ekpatə́m eték í Babiron, é gbo, é gbo. Ńjə́ne nji é yími nték i ngun chénchén á gwô aməm amê mma á gyími ka ekot achot akôp eyimím.”

⁹Osúí énjel ásá a tôp ábho a kí kuk ka ndûm eyum ányi nná se, “Nne kpe nnyón nnyo á kará ekûp na ejík mbâ nnyam-i-mbí na efóŋé ejê, kpe énê nnyo a fonê eriŋ ejê ka obhô na kpe ńsáé-mbûk eye,

¹⁰a ri a yén fə́ne oyámá-ḿbə́ŋé Obhasi. Oyámá-ḿbə́ŋé mbí ó kí joé noŋ aməm mma á kak ka nkôp oyámá-ḿbə́ŋé Obhasi ane á gwó. A kí toŋe oyámá-ḿbə́ŋé mbí, kpe ejûm á bhó maghé mbá-njəm. A kí karé yê oseŋe mbi ó kí yo yê noŋ ngun na atáé sélfa. Nchot nnyi a kí fap ka ochî baénjel mba á ká fon kpe akôp na ka ochî Mmon-i-njo-mbúi ányo.

¹¹Átʉ́k oseŋe ábho á kí kət ka ótúm-ótúm. Ane mba á bhó fon oyóá-biji, kpe atʉ́ na kpe efín. Nâ ane mba á kára ekûp na ejík mbâ nnyam-i-mbí ányi na efóŋé ejê, na chénchén ane mba á fóne eriŋ ejê.”

¹²Nchot nnyí a kí səre ane Obhasi chénchén na ane mba á kí top ebhín Obhasi, na mba á kíi ḿbə́ŋé na Jisos, sê á kə́p ḿbə́ŋé.

¹³N yûk mân eyum ka ósô é chorá sê, “Sêŋ njí. É róghé ka égyé, deê ogyebhá-ḿbə́ŋé ó jóe na ane mba á kí kpo ka á kí top Ńtâ Jisos.” Obhasi Ebhare Ntʉgantʉ se, “A ri ekpatə́m ogyebhá-ḿbə́ŋé ka etʉri, ka á kí yoé biji ka etûm ábho. Á yen fə́ne ekəp ka etûm ábho.”

¹⁴N kêp, ń yéna nâ ébháré átʉ́k í ngurobhú. Nne etat noŋ Mmon-i-ntem-nne a kun ka átʉ́k mmá. Itam otúi mfi á yími na gûl, í rî yê ka echî. Itəme-efʉ í gyema nnyen egyémém, í rî yê ka obhô.

¹⁵Énjel nnyo tat a fâp ka ókʉ́rí achot Obhasi a kí səre nne nnyo a kun nná na ekûk se, “Fî itəme ifâ róghé efʉ, ka ebhú efʉ é si. Iyîm mbi a kí fʉ ka ngun í kui nnyen ekúúm.”

¹⁶Nne ányo nnyo a kun áno ka átʉ́k mmá a mə̂t mân itəme-efʉ ifê ka ngun, a fʉ̂ fə́ne iyîm í ngun mbí chénchén.

¹⁷Énjel nnyo tat a kpô fáp ka ókʉ́rí achot Obhasi ka ósô, yê fə́ne a fiî itəme-efʉ mfi í gyema ogyém ka obhô.

¹⁸Énjel nnyo tat a fâp ka eji á túbha ekəp mbâ Obhasi. Ńnyo mfá nâ á bhabha erəmta-ngûn nji é rî ka eji áji. Nji a fábhe nná, a bhîŋ yê nnyo a ri nná na itəme mfi í gyéma ogyém ka obhô. A gyʉ́i na ndûm eyum se, “Fiî itəme-efʉ ifâ, gbût nkap ka étí nji é rî ka ngun, ka nkap nnyi a kabhê ka ngun ta a bhî.”

¹⁹Énjel nnyó a kô fə́ne itəme-efʉ ifê, a gbût nkap nnyí ntə̂m yə́t, a tûp ka ekpatə́m eji nji é tóŋe oyámá-ḿbə́ŋé Obhasi. Eji njí é rî noŋ kpe eji nji á káma nkap, á yîm aməm.

²⁰Á kâm nkap nnyí chénchén. Eji á káme é ká joé ka eték. Agyʉ́ŋ mma á sée ka eji njí, ora ó rî ejûm bəre nsam i ntáé ófó. Erəmə́m ejê é rî ejûm noŋ abhô ábháe.