Read ejagham Ndem~i jon, echî 15 Bible Online

Ndem~i jon, echî 15 - ejagham bible

Ndem~i jon, echî 15

¹Ńji é kpó chiŋ, m kpô yén ekpatə́m ejûm efup etat ka ósô. N yên baénjel anígisá, kpe nnyón na ekpak emaŋé egyê. Ḿfa nâ ntə́ma-ndə́p bimaŋé, ka ḿbə́ne nâ í kí jeghé oyámá-ḿbə́ŋé Obhasi.

²N yên ejûm noŋ efe, meé noŋ aya, á nyóbhe na ngûn. N yên ane mba á nôk na nnyam-i-mbí nnyí na bifóŋé ibhê na nne nnyo á séŋe mbiŋ eye na mfan kən á fôn érûm. Ane mbá á gyími áfo ka mkpe ejûm njí noŋ efe. Á fî bagitá Obhasi ka obhô.

³Á róghe ekónóm nkôn i Mosis, nnyo a tʉ́ghi Obhasi, na ekôn í Mmon-i-njo-mbúi ányo. Á kóna sê, “Ńtâ Obhasi ka ósô, ntûm okpógha-biji nnyi ó yimá, a fâŋ a chîŋ. We nnyo ó yimá iyîm ka nnyen-i-mbá, áfúbhí cháŋ. Ekpatə́m í ntûfâm nnyo a fonê nték chénchén.

⁴Ńtâ Obhasi, énê nnyo á bhó fup mbiŋ eya? Nne nnyo á bhó jighi wâ nâ énê? We átíŋ nâ o ri ó ka fon ekpin akôp. Nték i ngun chénchén tîk á bhâ káre wâ ekûp na ejík, ka ane á yen sê oyima-ejûm obhâ ó rî ka nnyen-i-mbá.”

⁵Ḿ kpó kep, n yên ókʉ́rí achot Obhasi ó rî ndəbhə́m ka ósô. Ḿfa nâ etəm nji é rî nâ ntî-isê ńgyímí Obhasi na ane.

⁶Baénjel anígisá á fâp ka ókʉ́rí mbí na mkpak emaŋé enígisá. Kpe nnyón a kaghê ébháré-éfô etat, é bhara kpáŋ, á bhôp ekandá nji á yími na gûl ka agbaŋe.

⁷Ejûm í mbít jə́t ka mbi ínî mbi í rî nná áfo, a káre baénjel mbá anígisá afúsan anígisá mma á yími na gûl. A ri oyámá-ḿbə́ŋé Obhasi nnyo a ri ka ótúm-ótúm nâ ó súi afúsan mmá tə́p.

⁸Átʉ́k mma ejík na ikom Obhasi á súi ókʉ́rí mbí. Kpe nne nnyo a məŋê ogyé ókʉ́rí mbí cháŋ tata mkpak i bimaŋé nnyí enígisá nnyi baénjel mbá anígisá a mân.