Read ejagham Ndem~i jon, echî 16 Bible Online

Ndem~i jon, echî 16 - ejagham bible

Ndem~i jon, echî 16

¹N yûk mân ndûm eyum ányi nná ka ókʉ́rí achot Obhasi a sə́re baénjel mbá anígisá se, “Kə̂n ên afúsan anígisá mma oyámá-ḿbə́ŋé Obhasi ó rî áno ka etím, choŋ ofúk ên ka ngun.”

²Ndaŋa-mbá énjel a jak a jî fûk amê afúsan ka ngun. Nji a fúghi, akpatə́m í birôk í bhak ane mba á fóne nná eriŋ í nnyam-i-mbí ányi, á jigha efóŋé ejê.

³Osúí énjel ábháe a bhâ fûk amê afúsan ka aya, aya á kpíghi agyʉ́ŋ-ágyʉ̂ŋ noŋ mma ékpoê nne. Kpe bhaghé ejûm í mbít ka aya é kpô.

⁴Osúí baénjel ásá a fûk amê afúsan ka aya na abhon ayép, ayép mmá á kpíghi agyʉ́ŋ.

⁵N yûk énjel nnyo á bhabha ayép a chôt se, “Obhasi, we nnyo ó ka fon kpe akôp, mfá-mfá we o ri, ebhú áji we o ri. Esup ejâ nji o gbúri a ri ka nnyen-i-mbá.

⁶Ka nan? Ane á yúi ane abhâ, á yúi akará-otîp abhâ. O karê fə́ne ábho agyʉ́ŋ á gwô. Nâ akpəre mma ane mbá á bhíghi efonóm.”

⁷N yûk eyum ka eji á túbha ekəp mbâ Obhasi é táme sê, “Ka etʉri, Ńtâ Obhasi Ósô, otáŋá-nchot obhâ ó rî ka nnyen-i-mbá, áfúbhí cháŋ.”

⁸Énjel nnyo osúí ánî a fûk amê ka njúí. Á mághe njúí nnyí sê a ríghí ane oríghí noŋ ngûn.

⁹Efû nji é dʉ̂ ka njúí nnyí é ríghi ane. Ane á chə́bhe á tuk Obhasi nnyo a fonê ikom na mkpak i bimaŋé mbí chénchén. Á ká yoŋe ḿbə́ŋé á mághe obhí ábho na kpe á káre ekûp na ejík mbâ Obhasi.

¹⁰Énjel nnyo osúí árôn a fûk amê ka eji ekumi otúi nnyam-i-mbí nnyí. Ejírim é gbô ka otúi obhê ndə́m, ane á chə́bhe á nyia amə̂ŋ ka echî, ka emaŋé nji é nógha ábho.

¹¹Á tuk Obhasi ósô ka enoghóm njí na arôk mma á rî ábho ka biji. Á ká yoŋe ḿbə́ŋé á mághe obhí ábho.

¹²Énjel nnyo osúí aságasá a fûk amê ka aya ayúp mma Yufretes. Ayép chénchén ka aya mmá á kût, á yîm mbá á kí mbâ atúi-ofâm mba á kə́ bha ebhat í njúí á fabha.

¹³N yên ajê ásá noŋ ésáŋ, á kí fap ka nnyo ndûm i nnyam achî anígisá nnyí, na nnyo nnyam-i-mbí nnyí, na nnyo akará-otîp áfúbhí.

¹⁴Ojê mbí ó dʉ̂ mbâ Satan. Ó fôn ikom mfi ó yíma ntûm okpógha-biji. Ó kí jen ó chuá atúi-ofâm í nsi nnyí á nôk enok ka ekpatə́m ofú Obhasi Ósô ábhi.

¹⁵Sê Ńtâ Jisos a chorê se, “Məŋê ên, n kə́ bha gbantə́m noŋ nyághá-ejʉ̂. Deê ogyebhá-ḿbə́ŋé ó jóe na nne nnyo á ka yáé, a kí bhabhe ḿfô eye, a kâ jên oyán ka éré, ane á yóe yê amə̂ŋ.”

¹⁶Á chə́me fə́ne atúi-ofâm mbá ka eji nji á bhíŋa ka eyum ane Ibru sê Amagadon.

¹⁷Énjel nnyo osúí anígisá a fûk amê afúsan ka ósô. Ndûm eyum a fâp ka ókʉ́rí achot Obhasi ka eji ekumi otúi njí, a chôt se, “Á jeghe oyim.”

¹⁸N yên mân nyaŋanya a nyaŋá, n yûk biyum, nsân a gbok, nsi a róghe enyiŋím ka ekpak á ka nok onyiŋí mbôp ane á rî ka nsi. Enyiŋím nsi njí é chíŋi abhô.

¹⁹Eték eyúp é yâ ka mbat ésá, nték nyúp ka ngun a gbô. Obhasi a tît eték eyúp í Babiron, a tóŋe oyámá-ḿbə́ŋé obhê chénchén ka ńjə́ne. A yîm ńjə́ne é gwô chénchén oyámá-ḿbə́ŋé obhê noŋ aməm.

²⁰Kpe mbə́n óráné-ngun mbi ayép á kághe ó tân. Agúí fép kpe jə́t, ń ka kpó yen.

²¹Akpatə́m arə́m-atáé á róghe egboóm noŋ mbúta. Á gbok ane ka biji. Ndə́m-atáé nnyi tat á yúbha noŋ ekpat-í-kúku. Ane á róghe Obhasi etúúm ka ntʉ́ghi oseŋe mbi ábho á yéna nná, ka oseŋe nchane ó fâŋ ó chîŋ ochíŋ.