Read ejagham Ndem~i jon, echî 19 Bible Online

Ndem~i jon, echî 19 - ejagham bible

Ndem~i jon, echî 19

¹Ńji é kpó chiŋ, n yûk ejok noŋ nji ekpatə́m ekam ane ka ósô, á kugha sê, “Areruya! Obhasi owəré nâ a fonê ejík na ikom chénchén. Yê nâ a kí yim nne a sém.

²Otáŋá-esup obhê ó ká fon kpe akôp, ó rî ka nnyen-i-mbá. A tâŋ ndûm i nne-nkáé akpara ányo nnyo a kóe achot akôp enuŋúm na ane, a bhíbhi ngun na obhí. Obhasi a yîm yê a fê ka agyʉ́ŋ ayimá-etûm abhê mma á gbóe ka nsi.”

³Á kpô kúk sê, “Areruya! Átʉ́k mma á rígha yê á kí ji ka ósô-ósô ka ótúm-ótúm.”

⁴Ane-akúí ane mba á rî nná áfo ábho esam na ánî na iyîm í mbít ábhi ínî, á gbô áfo ka nsi á káre ekûp na ejík mbâ Obhasi nnyo a kun ka ekumi otúi áji. Á chorá sê, “Areruya! Áno.”

⁵N yûk mân eyum é dʉ̂ ka eji ekumi otúi njí é kí chot sê, “Chénchén ên ayimá-etûm Obhasi, kpe ane ayúp, kpe ane chichi, ên mba ó fubhá ên Obhasi owəré, karê ên yê nkat!”

⁶N yûk mân ejok noŋ nji ekpatə́m ekam ane. Ó yuk se a ri ekpatə́m eyʉri-ayép na ekpatə́m í nsân. N yûk noŋ á kúgha sê, “Areruya! A ri Ńtâ Obhasi owəré ka ósô nâ a kun ka otúi.

⁷Deê é gyébhe ên ḿbə́ŋé é fî erom, é káre yê nkat, ka ebháé Mmon-i-njo-mbúi é si. Nkáé nnyo a kí ko ta a tʉ́ri biji.

⁸Obhasi a káre yê énoê ébháré-ḿfô kpóŋ a kâk.” Ébháré-ḿfô nnyí a gyími ka ntûm eno nnyi ane Obhasi á yíma.

⁹Énjel nnyó a sə́re ə̂m mân se, “Sêŋ achot mmá. Deê ogyebhá-ḿbə́ŋé ó jóe na ane mba á bhiŋ sê á bhá erom ebháé Mmon-i-njo-mbúi.” A kpô sə́ré ə̂m se, “Ḿfa a ri mfoné-mfoné nchot Obhasi.”

¹⁰Nji a sə́re ə̂m nchot nnyí, m gbô áfo ka ochî obhê, ń káre yê ekûp na ejík, kən a chôt se, “Ka gáe áji kpák. Mme ntem-nyima-etûm eróŋ noŋ we na atem-abhon-í-nnyen abhâ mba á gyíma ntî-isê Jisos. Jíghi a ri Obhasi.” Echî aŋ? Mfoné nchot Obhasi nnyi Jisos a tóŋe êt nâ á kaghá akará-otîp Obhasi ḿbə́ŋé á yîm etûm ábho.

¹¹N yên mân noŋ ósô ó rə́bhe. N yên ébháré mfoŋ-anyanyâ. Nne nnyo a kumî ka ńnyə́ne á kamá se Ḿbə́ŋé Ekíím na Nchot Echoróm ka Echî. Nne nnyó á taŋá nchot eye ka nnyen-i-mbá, enok ejê a ri ka mbá eróŋ.

¹²Amə̂t amê á rûk noŋ ngûn. Ntam-otúi etî-etî ń dî yê ka echî. Mbiŋ etat a ri nnyi á séŋe yê ka biji nnyi kpe nne etat á ka məŋé təm yê ḿfoné.

¹³Nkʉ̂ nnyi a kaghê, á bhíi ka agyʉ́ŋ. Mbiŋ nnyi á bhíŋa yê a ri Eyum Obhasi.

¹⁴Ane-enok mba ka ósô á kí top yê á jak. Á kághe énoê ébháré-ḿfô kpóŋ ka biji. Á kûn fə́ne ka ábháré ofoŋ.

¹⁵Akparanja etat á dʉ̂ yê ka nnyo, á gyema. A ri akparanja mmá nâ a kí tabhé érûm mbâ nték i ngun. A fî ábho na ochu noŋ ntûfâm. A kí gye ka eji ekpatə́m oyámá-ḿbə́ŋé Obhasi ósô, a gbût esup ábho noŋ nne a kí nyot nkap ka eyimím aməm.

¹⁶Ka atâ nne nnyó na ka nkʉ̂ eye, á séŋe mbiŋ etat sê “Ntûfâm atúi-ofâm, Ntûfâm nnyo a chîŋ ochíŋ.”

¹⁷N yên énjel a gyím ka njúí. Na ekpatə́m eyum eték a kí bhiŋ nnón chénchén mmi ḿ fə́bha ka ósô se, “Bá chə́me ên eji jə́t é dí ekpatə́m erom Obhasi.

¹⁸Bhák bhá dí ên biji atúi-ofâm na atúi-ofâm ane-enok na ane-enok, na mbi ofoŋ anyanyâ, na ane mba á bhéna ḿbə́ne. Bhá dí ên biji ane ngun chénchén kpe nsʉ́ŋ, kpe mfone nsi, kpe ane chichi, kpe ane efaŋ.”

¹⁹N yên mân nnyam-i-mbí ányi na atúi-ofâm í ngun na ane-enok ábho, á chə́me, á nôk enok na yê nnyo a kun nná ka mfoŋ é kpê na ane-enok abhê.

²⁰Á wúbhi nnyam-i-mbí nnyí. Á wúbhi fə́ne nkara-otîp áfúbhí nnyo a yimî iyîm okpógha-biji etî-etî ka echî nnyam nnyí. Iyîm mbí í ríri ane mba á káme á kâk ábho eriŋ í nnyam nnyí na mba á káre ejík mba efóŋé nnyam i nchane. Á tûp mkpak ane nnyí ébháe ka erəmta-ngûn nji é fáŋe noŋ aya, é rûk noŋ atáé sélfa.

²¹Nne nnyo a kun nná ka mfoŋ nnyí, a yúi mba ngá chénchén na akparanja mma á dʉ̂ nná yê ka nnyo. Nnón mmí chénchén ń dî biji ane mbá ta ń ket.