Read ejagham Ndem~i jon, echî 2 Bible Online

Ndem~i jon, echî 2 - ejagham bible

Ndem~i jon, echî 2

¹A chorê se, “Sêŋ karê énjel nnyo á bhabha echəme atóbhá abhámé ka Efesus a sə́ré ábho se, ‘Ḿfa nâ nchot nnyi a dʉ ka nnyo nne nnyo a fiî ńdʉnândʉ-ósô nnígisá ka obhô-orûm obhê, yê nnyo á jená ka ekam í bijighi-eyâŋ í gûl inígisá.’ ”

²A chorê na ábho ka Efesus se, “Ḿ məŋe ntûm nnyi o yimî ên, ḿ məŋe oseŋe mbi o yéne ên na ḿbə́ŋé nnyi o kə́bhe ên. Ḿ məŋe ekpak ó bhó kam ên ane abhí bhúghí-bhúghí ka ekam ejə́né. Ó gae ên fə́ne ane mba á bhíŋa biji ábho sê ágbán í Jisos nji kpe ábho ágbán asík, ó yen ên fə́ne sê á sə́ra áfúbhí.

³Ḿ məŋe bəre a ri ka obhô obhámé nâ ó yena ên áno oseŋe mbí, o kə́bhá ên ḿbə́ŋé, ó bhó ket ên.

⁴“Kən ejûm ebhí jə́t é rî nji ó yimá ên, mme ń sə́ré ên. Okot mbi o korê ên ə̂m ndaŋa-mbá, ó maghe ên ḿbə́ne.

⁵Tit ên okot obhə́né ebhú áji kən ó gbo ên ka ekpak njí! Yóŋe ên ḿbə́ŋé, maghê ên obhí obhə́né, chəbhê ên njəm o yimá ên ka ekpak ó yimá ên ndaŋa-mbá. Áno asík, n kə́ bha ḿ bá yíghi ejighi-eyâŋ nji é rî ka mbiŋ eyəné, ka eji é gyím.

⁶Ejûm é rî fə́ne nji ó yimá ên é nobhá. Ó bhó kot ên ekpin atóbhá Nikorayi, ekpak nji mme fə́ne ḿ bó kot.

⁷“Nne nnyo á fon otûŋ, deê a yúk nchot nnyi Ntʉgantʉ Obhasi á chorá mbâ bichəme atóbhá abhámé. “Nne nnyo á kəp ḿbə́ŋé ta a fôn érûm ka achot mmá chénchén, n kí karé yê ikom bəre a dí nkap étí nnyi á kará ekpin. Ńnyə́ne ányi nâ a ri áno ka Eték Obhasi.”

⁸A chorê se, “Sêŋ karê énjel nnyo á bhabha echəme atóbhá abhámé ka Simena a sə́ré ábho se, ‘Ḿfa nâ nchot nnyi a dʉ ka nnyo nne nnyo a ri Ochî, a ri Njəm. Yê nnyo a kpóe, a chə́bhe njəm ka ekpin.’ ”

⁹A chorê na ábho ka Simena se, “Ḿ məŋe oseŋe obhə́né, ḿ məŋe okpák mbi ó ri ên ka ḿbə́ne. Kən ka etʉri ó fon ên efaŋ. Ḿ məŋe achot abhí mma ane á chóra á kpek na ên. Ntʉ́ghi ane mbá nâ á sə́ra sê ábho a ri ane Jus. Áfúbhí! Satan a yîm ábho nâ óchâm obhê.

¹⁰Ka fôn ên efup ka oseŋe mbi o kə́ bha oyén ên. Ńgyê Satan a kə́ bha okak etʉ̂ ên ka ókúmí, á gáe ên. O kí yen ên oseŋe ka mfín ófó. Kən kpe o yéne ên oseŋe nan, ka yíghi ên ḿbə́ŋé na mme kpe o kí kpo ên okpó. Ó ro yighí ên ḿbə́ŋé, tîk n káre ên ekpin ótúm-ótúm noŋ itam érûm ifə́né.

¹¹“Nne nnyo á fon otûŋ, deê a yúk nchot nnyi Ntʉgantʉ Obhasi á chorá mbâ bichəme atóbhá abhámé. “Nne nnyo á ko érûm tîk a sêm ka ekʉ̂ nji é kí kpo bha nná.”

¹²A chorê se, “Sêŋ karê énjel nnyo á bhabha echəme atóbhá abhámé ka Pegamom a sə́ré ábho se, ‘Ḿfa nâ nchot nnyi a dʉ mbâ nne nnyo a ri na akparanja njəm-i-ngyêm ébháe.’ ”

¹³A chorê se, “Ḿ məŋe nték ekumi eyəné. Ńnyə́ne nâ a ri mfoné-mfoné eji ekumi otúi Satan. Kən kpe noŋ é rî áno, ó fi ên ka mbiŋ amé, ó ka chaghé ên ache. Ó ka taŋé ên ḿbə́ŋé ekíím na mme kpe ebhú á yúi Antipas nnyo ntî-isê omé. Yê á ka maghé otî-isê obhê bhúghí-bhúghí. Á yúi yê ka eték ejə́né nji é rî nâ eji ekumi Satan.

¹⁴“Kən akpât obhí a ri mma o yimî ên. Etʉ̂ ên o ri ên mba o nyə́ne o tóbhá ên okpígha-ejûm í Beram nnyo a kpíi Barak a chóe abhon Isrel á yîm obhí. A yîm ábho á dí édî nji á jóme á káre njom. A yîm fə́ne ábho á gyé ka achot akôp enuŋúm na ane.

¹⁵Ka ekpak njí jə́t, ó fon ên etʉ̂ ane mba á tóbha okpígha-ejûm í Nikorayi.

¹⁶Nâ deê ó yóŋé ên ḿbə́ŋé á mághe ên iyîm mbí. Áno asík, n kə́ bha mbâ eyəné mkpât ebhú. Ebhú ḿ ba, n kí ko akparanja mma á rî ə̂m ka nnyo, n nôk na ane ntʉ́ghi mbá.

¹⁷“Nne nnyo á fon otûŋ, deê a yúk nchot nnyi Ntʉgantʉ Obhasi a chorê mbâ bichəme atóbhá abhámé. “Nne nnyo á fon érûm ka achot mmá, n kí karé yê édî Obhasi nji é rî áno ka ebhə̂t. N kí karé yê fə́ne ébháré ntáé na mbiŋ i mfê nnyi á séŋe ka ntáé nnyí. Nne nnyo a kí məŋé mbiŋ nnyí cháŋ təm nne nnyo á káre yê ńnyə́ne.”

¹⁸A chorê se, “Sêŋ karê énjel nnyo á bhabha echəme atóbhá abhámé ka Tayatira a sə́ré ábho se, ‘Ḿfa nâ nchot nnyi a dʉ ka nnyo Mmon Obhasi, nnyo amə̂t amê á bhîk noŋ erəmta-ngûn, akát amê á rúna noŋ esené.’ ”

¹⁹A chorê se, “Ḿ məŋe ntûm nnyi o yimî ên, ḿ məŋe okot mbi o tóŋe ên, ḿ məŋe ḿbə́ŋé nnyi o kíi ên na mme, o yimá ên ntûm amé. Ḿ məŋe ekpak nji o kə́bhe ên ḿbə́ŋé ka oseŋe obhə́né. Ḿ məŋe bəre ntûm nnyi ó yimá ên mfá-mfá, a chíŋi nnyi eróghá-ndə́p.

²⁰“Kən ejûm ebhí é rî jə́t nji ó yimá ên. O kí ko ên ka tebhe na nne-nkáé nnyó sê Jesebel. Jesebel ń səra se yê a ri nkara-otîp Obhasi. Kən a kí kpighâ ane abhámé, a rirá ábho á gyé ka achot akôp enuŋúm na ane, á dí fə́ne édî nji á jom á kare njom.

²¹N káre nne-nkáé nnyó ebhú bəre a yóŋé ḿbə́ŋé a maghé obhí obhê, kən á bhó kam.

²²N kí tup mân nne-nkáé nnyó emaŋé. Ane fə́ne mba á nuŋí na yê, á ká yoŋe ḿbə́ŋé á mághe obhí ábho, n kí karé ábho ekpatə́m oseŋe.

²³N kí yui atóbhá abhê. Ka ekpak njí, atóbhá abhámé chénchén ka bichəme ka ngûm ka ngûm, tîk á mə́ŋe mân sê mme a ri yê nnyo á məŋá nji nne á kera ka echî na nji é rî nne ka ḿbə́ŋé. N kí karé fə́ne kpe énê ka ekpak etûm nji nne a yimî.

²⁴“Kən ên fép mba ngá ka Tayatira, ó ka tóp ên okpígha-ejûm í nne-nkáé nnyó, ó ka tóp ên achot mma ane mba ngá á bhíŋa sê mfoné esə́n í nchot i Satan. Ka obhô mbí, etûm etat n kí kpo karé ên cháŋ.

²⁵Kən n kí səre ên bəre ó fî ên ka nji ó fon ên mfá-mfá, chik ên ə̂m ta m bák.

²⁶“Nne nnyo a kí fon érûm ka achot mmá ta a sî ntə̂m, n kí karé yê otúi nték i ngun.

²⁷‘Eték í ngun kpe njə́n é rî ka óséré otúi obhê. A kí bhibhi ábho á mân oman noŋ nne á bhibhi nná ebhí nji á yími na otop.’ A ri ka ekpak njí Ńsé omé a karê ə̂m ikom, nâ noŋ fə́ne n kí karé ên.

²⁸“Nne nnyo á fon érûm ka achot mmá, n kí karé yê fə́ne írʉnândʉ ofú.

²⁹“Nne nnyo á fon otûŋ, deê a yúk ejûm nji Ntʉgantʉ Obhasi a chorê mbâ bichəme atóbhá abhámé.”