Read ejagham Ndem~i jon, echî 20 Bible Online

Ndem~i jon, echî 20 - ejagham bible

Ndem~i jon, echî 20

¹N yên énjel a kí bhət a bhák nnyi ósô. A fiî ogbógóró Ébhírí nji Ntə̂m Cháŋ na ndûm i mkpokobhé ka obhô.

²Nji a bhərê a bhák, a fî nnyam achî anígisá ányi, á fî yê ka nyâ ntem-esam ébháe njəm nsam i nyâ ófó. Nnyam ányi nâ nnyô nnyi ta éməné ányi. Á bhíŋa yê sê Ndûm i Nne-mbí, na kpe ebhú tat sê Satan.

³A tûp ńnyə́ne ka Ébhírí nji Ntə̂m Cháŋ a bhúi ńjə́ne, a fîn nnyen efíním se a kâ kpô rirí ane bhúghí-bhúghí ta nyâ ntem-esam ébháe na nsam i nyâ ófó nnyi á kúmi yê a chîŋ. Ebhú nji é kpo chiŋ, á kí nyaŋé yê obhô ka mkpât ebhú.

⁴N yên mân ngûm ekumi otúi. Ane á kûn ka ńnyə́ne, á káre ábho ikom sê á táŋ achot. N yên ńtʉgântʉ chénchén ane mba á yúi ábho ka nchot á gyími ntî-isê Jisos na nchot Obhasi. Ḿba mfá nâ á ká jighi nnyam-i-mbí ányi na kpe efóŋé ejê. Á ká fon fə́ne eriŋ ejê ka ńsáé-mbûk ábho na abhô ábho. Ane mbá á chə́bhe njəm ka ekpin á bhâ kúmi na Krayis noŋ atúi-ofâm ka nyâ ntem-esam ébháe na nsam i nyâ ófó (1,000).

⁵Ane mba ngá mba á kpóe á ká chəbhé njəm ka ekpin ta nyâ ntem-esam nnyí ébháe njəm i nsam i nyâ ófó (1,000) a sî. Ḿfa nâ ndaŋa-mbá enyəmə́m ka ekʉ̂.

⁶Ogyebhá-ḿbə́ŋé na enare Obhasi í kí joé na nne nnyo a chəmê ka ndaŋa-mbá enyəmə́m ka ekʉ̂ njí. Ekʉ̂ nji osúí ntə̂m ébháe é ká fon ikom na ane ntʉ́ghi mbá. Á kí chəbhé akará-agore Obhasi na Jisos Krayis. Á kí joé fə́ne ka otúi na yê ka nyâ ntem-esam ébháe njəm i nsam i nyâ ófó (1,000).

⁷Ntem-esam i nyâ nnyí ébháe njəm nsam i nyâ ófó (1,000) á kpo chiŋ, á kí yighí Satan ka mkpokobhé.

⁸A kí fap a bhá rirí nték i ngun chénchén ka ikóé kpe mfə́n ka ngun. Á bhíŋa nték nnyí sê Gok na Magok. A kí chəmé ábho chénchén ka enok. Ábho á ti á chiŋi mfan osí ka aya.

⁹Á bhak á súi eték í Isrel. Á jî fáre eji nji ane Obhasi á rî na eték nji Obhasi a korê. Kən ngûn ḿ bak nnyi ósô, ḿ bâ ríghi ábho.

¹⁰Á tûp Satan nnyo a rirî ábho ka erəmta-ngûn nji é fáŋe noŋ aya, é fúbha noŋ atáé sélfa. A ri ngûn mmí mə́t nâ nnyam-i-mbí ányi na nkara-otîp áfúbhí á rî nná. Á kí karé ábho oseŋe atʉ́ na efín ta ka ótúm-ótúm.

¹¹N yên mân ekpatə́m ekumi otúi etat, é bhara obhát, nne a kun ka ńjə́ne. Ka eji yê a ri, ósô na nsi á bê, ane á ká kpo yen ábho.

¹²N yên ane mba ta á kpo, ane efaŋ oo, ane chichi oo, á gyím áfo ka ochî eji ekumi otúi njí. Á rə́bhe mân onwet. Á kpô rəbhé nnyi tat. Nnyi mfá a ri nwet ekpin. Á róghe mân ane mbá chénchén etaŋám ka ekpak ejûm nji á séŋe ka nwet nnyí á tobha ekpak ejûm nji ábho á yími ka ngun.

¹³Ane mba á kpóe ka aya, aya a kô ábho a káre. Ekʉ̂ na eték akə́bha-nsi í yíghi ane mba á fíi í káre. Á tâŋ chénchén ane mbá ka ekpak ejûm nji á yími.

¹⁴Á tûp mân Ekʉ̂ na Eték Akə́bha-nsi ka ekpatə́m erəmta-ngûn nji é fáŋe noŋ aya. Ńjə́ne nâ é rî ekʉ̂ nji osúí ntə̂m ébháe.

¹⁵Nne kpe nnyón nnyo á ká seŋ mbiŋ eye ka nwet ekpin nnyí, á tûp yê ka erəmta-ngûn njí nji é fáŋe noŋ aya.