Read ejagham Ndem~i jon, echî 21 Bible Online

Ndem~i jon, echî 21 - ejagham bible

Ndem~i jon, echî 21

¹N yên mân ósô na nsi mbi fê, ka ósô na nsi mbi ndaŋa-mbá í chiŋ. Ń ka kpó yen aya.

²N yên Eték Obhasi, áfo nâ Jerusarem nnyi fê, eték nji é dʉ̂ mbâ Obhasi, é kí bhət é bhak nnyi ósô. Á sóbhe ńjə́ne noŋ kpe nsop i nne-nkáé nnyo á jak ndûm okó.

³N yûk ekpatə́m eyum é dʉ̂ ka eji ekumi otúi njí, é kí chot sê, “Ńgyê ên, eték Obhasi é chə́bhe na ane. Obhasi tîk a kúmi na ane, ane mbá á chə́bhe abhê. Obhasi yê ḿfoné a kí joé na ábho, a jóe Obhasi ábho.

⁴A kí fon obhə́bhe ábho ka amə̂t, kpe mkpât á bhó kət. Ekʉ̂ é ro kpó joé. Nne a rô kpó gye ekə́t, ekʉ̂ nne a rô kpó rʉri. Ejûm kpe jə́t é ro nok nne. Echî é rî sê iyîm í ndaŋa-mbá chénchén í chiŋ.”

⁵Nne nnyo a kun ka ekumi otúi a chôt se, “Ńgyê, ń yim iyîm chénchén í chəbhe mbi fê.” A sə́re ə̂m fə́ne se, “Sêŋ nchot nnyí, ka a ri nchot nnyi nne a fonê ekamám, nchot nchane fə́ne a ri ka echî.”

⁶A chôt se, “Á yim á jeghe. Mme nâ n di Ndaŋa-mbá, mme nâ n di Ntə́ma-njəm. Mme nâ n di Eróghá-ndə́p, mme nâ n di Ejeghé. Ane mba á rî ka ekot-ayép, n kí karé ábho á gwó noŋ ayép mma á kóe ka ńchí, eji ayép á fə́ma. Ḿ bó bhəp kpe ejûm.

⁷Nne nnyo a kí nok ta a fôn érûm a kí fon nji n kíi yê. Mme n kí joé Ńtâ Obhasi owe, yê fə́ne a kí joé mmon omé.

⁸Kən ane mba tat á rî. Ábho á rî na efup, ḿbə́ŋé á bhó ki na Obhasi, á yíma achot akôp, á yúa ane, á núŋa atem ka mbá akôp, á yíma achot ojê, á tóbha ajom, á sə́ra áfúbhí. Ane mbá chénchén, tîk á tûp ábho ka erəmta-ngûn nji é fáŋe noŋ aya, é fúbha noŋ atáé sélfa. Ḿfa nâ ekʉ̂ nji osúi ntə̂m ébháe.”

⁹Énjel yót ka mba anígisá mba á fíi nná afúsan anígisá, a bhák. Afúsan mmá nâ á rî nná esúi kpúk na mkpak oseŋe enígisá. Énjel nnyó a chôt se, “Bhák, tîk n tóŋe wâ Nne-nkáé nnyo a ri nkáé Mmon-i-njo-mbúi Obhasi.”

¹⁰Ntʉgantʉ Obhasi a gyê ə̂m ka biji, énjel nnyó a kə̂n ə̂m a jak ka ndûm ekpatə́m egúí etat. A tóŋe ə̂m Eték Obhasi, Jerusarem. Eték nji é kí bhət é bhak nnyi ósô mbâ Obhasi.

¹¹É fôn ebhát ejík Obhasi. É runá noŋ ntáé jásapa, é rî jáé noŋ ayép.

¹²É fóne ndûm ekpatə́m ébhághé-njû. Nnyo-mbá ń dî ófó na ḿbáe, kpe mmə́n na énjel. Nâ chénchén baénjel ófó na ábháe. Á sêŋ fə́ne obhiŋ ndə́p-i-njû ófó na ébháe nnyi abhon Isrel ka onyo-mbá mbí.

¹³Mbá-njəm, nnyo-mbá ńsá; mbá-ochî, ńsá; obhô-orûm, ńsá; obhô-okáé, ńsá.

¹⁴Ébhághé-njû eték njí é fóne ńgyímí ndéné ófó na ébháe. Ka ndéné nnyí á sêŋ obhiŋ ágbán ófó na ábháe mba Mmon-i-njo-mbúi Obhasi.

¹⁵Énjel nnyo á chorá áno na mme, a fonê ítí-egaé etat á yími na gûl mfi a kí ko a gaé ofaŋ eték njí na ébhághé-njû eték njí na onyo-mbá mbí.

¹⁶Ora na ofaŋ eték njí ó rî ekan. Énjel nnyó a gáe. Ora a ri ntáé ntem-esam eságasá, ofaŋ ntem-esam eságasá. Ngyím fə́ne a ri ka ekpak njí.

¹⁷A gáe fə́ne ofaŋ ébhághé-njû njí a fôn ka mfan i nne, nsam abhô enígisá njəm abhô ánî.

¹⁸Á kóe atáé mma á kamá sê jásapa á gbê ébhághé-njû kən eték njí ńjə́ne mfoné á gbée na mfoné-mfoné gûl. Gûl i nchane a ri jáé noŋ efe.

¹⁹Ka ndéné ébhághé-njû njí kpe énoê ntáé nji ó bhó yen cháŋ. Ndaŋa-mbá a ri jásapa, é rúna oruní. Enyeré á yimá noŋ á nyaghá onyak, á bhíŋa sê sáfi. Osúí ésá, a foné mkpak nnʉk etî-etî, á bhiŋá sê áget. Osúí énî a ri nná noŋ ájé ka nnʉk eye, á bhiŋá sê émera.

²⁰Osúí érôn a runá kpóŋ, á bhiŋá sê ónik. Ka eságasá á bhik obhí, á bhiŋá sê kaníriyan. Enígisá a ri ogok-ógôk, á bhiŋá sê gwât. Nnyi osúí eníganî a ri nná noŋ ájé, á bhiŋá sê béri. Nnyi osúí érôn-énî a sîk ojoé nná noŋ ogok kən a ri jáé ka amə̂t. Á bhíŋa nnyí sê tópe. Nnyi osúí ófó a sîk ogaé ebhárám, á bhíŋa sê chasedóniya. Osúí ófó na jə́t, ó yen se ngurobhú, á bhíŋa sê jásin. Nnyi osúí ófó na ébháe, á bhəmá obhəm, a bhík chuu, á bhíŋa nnyí mfá sê amétus.

²¹Onyo-mbá ébhághé-njû eték njí ófó na ébháe, á kóe énoê atáé etat ófó na ébháe mma á bhíŋa sê péren, á gbê. Obhá ka eték njí á yími na mfoné-mfoné gûl. Gûl i nchane a ri jáé noŋ efe.

²²Ń ka yén ókʉ́rí achot Obhasi ka eték njí, ka obhê ókʉ́rí a ri Ńtâ Obhasi Ósô, yê ḿfoné, na nne nnyo a ri nâ Mmon-i-njo-mbúi owe.

²³Kpe njúí, kpe nnyam-ósô á ka fon ka eyáám a karé ebhát ka eték njí. Echî aŋ? Ejík Obhasi nâ é rî ebhát, agûn amê a ri nne nnyo a ri nâ Mmon-i-njo-mbúi Obhasi.

²⁴Ane ngun á kí yen mbá á jên ka ebhát eték njí. Atúi-ofâm í ngun á kí ko ejík ábho á bhak ka ńjə́ne.

²⁵Á bhó bham onyo-mbá eték njí bhúghí-bhúghí na efín. Atʉ́ ka eték njí cháŋ.

²⁶Eyúp na efaŋ nji nték i ngun chénchén, á kí ko á bhá ka eték njí.

²⁷Kpe ejûm jə́t na akôp, é bhó gye eték njí. Nne fə́ne kpe nnyón nnyo á yimá achot abhí, a yimá áfúbhí, á bhó gye. Ane mba á kí gye a ri ábho mba á séŋe mbiŋ ábho ka nwet ekpin nnyi Mmon-i-njo-mbúi Obhasi.