Read ejagham Ndem~i jon, echî 22 Bible Online

Ndem~i jon, echî 22 - ejagham bible

Ndem~i jon, echî 22

¹Énjel nnyó a kô ə̂m mân a jî tóŋe aya mma ayép ekpin, á bhara kpe ekpak. Ayép mmá á sek ka eji ekumi otúi Obhasi na nne nnyo a ri nâ Mmon-i-njo-mbúi owe.

²Á chíŋi ka étíŋanti mbá eték njí. Njəm aya nnyí ébháe étí-ekpin nâ é gyím. É kára nkap kpe bhaghé nnyam-ósô, ntə̂m ófó na ébháe ka eyâ. Ájé étí mmá nâ á kí ko á yimá ane ngun á soná.

³Kpe bhaghé ejûm nji Obhasi a sə́re se é bhîp ńjə́ne, é bhó joé ka eték njí. Ekumi otúi nji Obhasi na Mmon-i-njo-mbúi nâ é kí joé ka eték njí. Ágbán abhê tîk á jigha yê.

⁴Tîk á yên ochî obhê, mbiŋ eye fə́ne a jóe ka ńsáé-mbûk ábho.

⁵Atʉ́ á ro kpó joé. Á bhó wom ebhát kpe jə́t nji ngûn na njúí, ka Ńtâ Obhasi nâ a kí joé ebhát ábho. Tîk á kúmi fə́ne noŋ atúi-ofâm ka ótúm-ótúm.

⁶A chôt se, “Nne a fonê ekamám nchot nnyí. Nchot i nchane a ri ka echî. Ńtâ Obhasi nnyo á kará Ntʉgantʉ owe mbâ akará-otîp abhê, a túmi énjel owe se a bhá toŋe ayimá-etûm abhê achot mma á rî á fáp mkpât ebhú.”

⁷Jisos se, “Ńgyê, mme n kə́ bha mkpât ebhú. Deê ogyebhá-ḿbə́ŋé ó jóe na ane mba á kí top achot mma á séŋe ka nwet nnyí sê tîk á fâp ka nsígha-njəm ebhú.”

⁸Mme Jon nâ n yéne, n yûk iyîm mbí chénchén. Ebhú n yúghi ḿbə́ne, n yên ḿbə́ne, m gbô fə́ne ka ochî énjel nnyo a tóŋe ə̂m achot mmá chénchén, bəre ń káre yê ekûp na ejík.

⁹Kən a sə́re ə̂m se, “Kpák, ka gáe. Mme a ri ntem-ḿgbán eróŋ noŋ we, na atem-abhon-í-nnyen abhâ mba á rî akará-otîp Obhasi, na chénchén ane mba á kí top achot mma á rî ka nwet Obhasi nnyí. Karê ekûp na ejík a ri mbâ Obhasi.”

¹⁰A kpô sə́ré ə̂m se, “Ka bhə́t achot mma á sə́re nná ka nwet nnyí sê tîk á fâp, ka ebhú é kpiri.

¹¹Deê nyima-obhí a kə́t ka obhí obhê eyimím, nne akôp a kə́t ka achot akôp amê. Deê nne nnyo á yimá iyîm ka nnyen-i-mbá a kə́t ka ono eyimím. Nne nnyo ekpin ejê akôp cháŋ, a kə́t fə́ne a kâ fôn akôp.”

¹²Jisos a chôt se, “Ńgyê, n kə́ bha mkpât ebhú na bikəp ibhámé. Ḿ ba, n kí kəp kpe bhaghé énê ka ekpak etûm nji a yimî.

¹³Mme nâ n di Ndaŋá-mbá, mme nâ n di Ntə́ma-njəm. Mme nâ n gyím Ochî, mme nâ n gyím Njəm. Mme nâ n di Eróghá-ndə́p, mme n di Ejeghé.

¹⁴“Deê ogyebhá-ḿbə́ŋé ó jóe na ane mba á su ḿfô ábho sê á káre ábho ikom á dí nkap étí nnyi á kará ekpin, sê á chíŋ ka nnyo mbá á gyé fə́ne eték Obhasi.

¹⁵Ane mba njəm éré eték njí nâ ane abhí na ajê na ane mba á yíma achot akôp na mba á yúa ane na mba á kóra achot ajom na chénchén ane mba á sə́ra áfúbhí, á yíma fə́ne iyîm áfúbhí.

¹⁶“Mme, Jisos, ń tum énjel omé mbâ eya noŋ ntî-isê a bhá səre nchot nnyí mbâ bichəme atóbhá abhámé. Mme nâ n di noŋ Irʉk, mme a ri Eyábhé-mmon í Debhit, mme a ri Írʉnândʉ Echî-ofú mfi í yâk kpe ekpak.”

¹⁷Obhasi Ebhare Ntʉgantʉ na Nkáé mfê Mmon-i-njo-mbúi Obhasi, á kí bhiŋ sê, “Bhák.” Kpe énê nnyo á yuk, a ri a chot se, “Bhák.” Kpe énê nnyo a ri ka ekot-ayép, deê yê a bhá. Ka okot obhê, deê a kô ayép ekpin, kpe ejûm á bhó karé.

¹⁸Kpe bhaghé énê nnyo a yúghi achot mma á séŋe ka nwet nnyí, mme Jon, n kí tʉ yê obhô ka otûŋ, bəre nne nnyo á kpe mma tat egyê, é chíŋi mma á rî ka nwet nnyí, Obhasi a kí kpe ka ekpərə́m ejê chénchén bimaŋé mbi á sə́re ka nwet nnyí.

¹⁹Nne nnyo á yighí kpe ejûm jə́t ka achot mma á séŋe ka nwet nnyí, Obhasi a kí yighí fə́ne eye nkiri ka nkap étí nji é kára ekpin. A kí yighí fə́ne eye nkiri ka eték Obhasi nji á sə́re nná ka nwet nnyí.

²⁰Jisos nnyo a kí gyimi ntî-isê ka achot mmá a chorê se, “Mme n kə́ bha mkpât ebhú.” Áno. Ńtâ Jisos, bhák!

²¹Deê onobhá-eji Ńtâ Jisos ó jóe na chénchén ane Obhasi. Áno.