Read ejagham Ndem~i jon, echî 3 Bible Online

Ndem~i jon, echî 3 - ejagham bible

Ndem~i jon, echî 3

¹A chorê se, “Sêŋ karê énjel nnyo á bhabha echəme atóbhá abhámé ka Sadis a sə́ré ábho se, ‘Ḿfa nâ nchot nnyi a dʉ ka nnyo nne nnyo a fonê ńtʉgântʉ enígisá nnyi Obhasi, é kpê na ńdʉnândʉ nnígisá.’ ” A chorê se, “Ḿ məŋe ntûm eyəné. Ane á chóra sê ên nâ o ri ka ekpin, kən áfúbhí. Ó kpo ên.

²Nâ duî ên mân ngyím! Fiî ên mô ekpin nnyo a kə́re ên áno ka ikom, o kâ jéghe ên okpó. Ka nan? Ntûm eyəné á ka tʉrí obhik ka ochî Obhasi omé.

³Nâ tirâ ên mân ejûm nji á kpíi ên, ên fə́ne o kâm ên. Yûk ên ńjə́ne! Ó yóŋé ḿbə́ŋé ó mághe obhí obhə́né. Ájoé ó bhó nyəmé, ó yóŋé ên ekpin, n kə́ bha ka ebhə̂t noŋ nyághá-ejʉ̂. Ó bhó məŋé ên ebhú nji n kə́ bha oyim ên ejûm.

⁴“Kən kpe noŋ é rî áno, etʉ̂ obhiŋ ó rî ka eték í Sadis. Ane mbá nâ á ká nyobhé biji ábho. Ḿba tîk á kâk ábho oguŋi ejík á jên na mme, ka ń yen ábho bəre á bhik.

⁵“Nne nnyo á fon érûm ka achot mmá, á kí kak yê oguŋi ejík noŋ ábho. Tîk ḿ bó yighí mbiŋ eye ka nwet nnyi á séŋe obhiŋ ane mba á fon ekpin ótúm-ótúm. N kí gyimi ntî-isê nne ányo ka ochî Ńsé omé na baénjel abhê bəre a ri nne omé.

⁶“Nne nnyo á fon otûŋ, deê a yúk ejûm nji Ntʉgantʉ Obhasi a chorê mbâ bichəme atóbhá abhámé.”

⁷A chorê se, “Sêŋ karê énjel nnyo á bhabha echəme atóbhá abhámé ka Firadefiya a sə́ré ábho se, ‘Ḿfa nâ nchot nnyi a dʉ ka nnyo nne nnyo a ri mfoné-mfoné Obhô-orûm Obhasi. Yê nâ a fiî ogbógóró Debhit. Á rəbhé, mbámá cháŋ. Á fin, ndəbhá cháŋ.’ ”

⁸A chorê se, “Ḿ məŋe ntûm eyəné nnyi ó yimá ên. Ńgyê, ń dəbhe itə̂m ḿ maghe fóŋ, mbámá cháŋ. Ḿ məŋe bəre ńgyímí eyəné ka eték á ka son, kən ó fi ên ka nji á kpíi ên, ó ka taŋé ên ə̂m.

⁹Ane mba Satan a yîm ábho óchâm obhê, ane áfúbhí mba á sə́ra sê ábho ane Jus, kən áno asík, tîk n yîm ábho á bhá təm arúŋ ka ochî obhə́né, á kâm sê mme n korê ên okot.

¹⁰Ka eji ó yuk ên nchot nnyi n sə́re ên bəre kpe ó yena ên oseŋe, kə̂p ên ḿbə́ŋé, n kí yighí ên ka achot mma a kə́ bha ka ngun ndə́m. Achot mmá á kí gaé chénchén ane ka ngun.

¹¹“N kə́ bha mkpât ebhú. Fiî ên ka nji á kpíi ên, ka chághe ên ache, nne a kâ bhâ otabhé itam érûm ejə́né.

¹²“Nne nnyo á fon érûm ka achot mmá, n kí yim yê nâ ego nji é fíi ókʉ́rí achot Obhasi. Nne nnyo a kí kpo yighí yê ka ókʉ́rí mbí cháŋ. N kí seŋ mbiŋ Obhasi omé ka biji nne ntʉ́ghi nnyó. N kí seŋ fə́ne mbiŋ eték Obhasi omé. Eték í nchane nâ Jerusarem nnyi fê nnyi a dʉ mbâ Obhasi omé ka ósô. Tîk n sêŋ fə́ne mbiŋ i mfê amé ka biji ibhê.

¹³“Nne nnyo á fon otûŋ, deê a yúk ejûm nji Ntʉgantʉ Obhasi a chorê mbâ bichəme atóbhá abhámé.”

¹⁴A chorê se, “Sêŋ sə́re énjel nnyo á bhabha echəme atóbhá abhámé ka Layodisiya a sə́ré ábho se, ‘Ḿfa nâ nchot nnyi a dʉ ka nnyo nne nnyo á bhíŋa nná sê A ri Áno. Yê a ri mfoné-mfoné ntî-isê nnyo á bhó yoŋe eyum. Yê a ri Ntûfâm iyîm chénchén mbi Obhasi a yimî.’ ”

¹⁵A chorê se, “Ḿ məŋe ntûm eyəné. Ên ó bhó kak ên biji ka achot amámé kpe-eji, ó bhó tʉ ên njəm eróŋ kpe-eji. Kə́n n wôm ofi ên ka jə́t.

¹⁶Ka nne á bhó məŋé osə́ré ngyím eyəné ka achot amámé, ó bhó kak ên biji kpe-eji, ó bhó tʉ ên fə́ne njəm kpe-eji, n kí bhum ên ńgô noŋ nne a fə́me oson ka nsi.

¹⁷Ó sumá ên obhô-ngaŋ sê, ‘Mme nne ntí, ń chəbhe nne-nyúp, kpe nji m kpô wóm cháŋ.’ Ó bhó məŋé ên ngá sê kpe ejûm ó ka fon ên, nne á yen ên nsôn a yîm yê. Ên a ri akpák, o ri ên noŋ atáná-amə̂t, o ri ên oyán.

¹⁸“N kí ta ên mân etí bəre, ó nâm ên gûl mbâ amé nnyi á yóe na ngûn, tîk o gbô ên efaŋ. Kó ên mfô ejík mbâ amé nnyi a kí bhuí oyán obhə́né, a yíghi ên oyúbhá-echî. Kó ên fə́ne njân mbâ amé o kâk ka amə̂t á rə́bhe, o kpô yén ên mbá.

¹⁹A ri ane mba ń kot nâ ń toŋa áno obhí ábho, m kpərá ábho bəre á yóŋé ḿbə́ŋé ka etʉri, á mághe obhí ábho.

²⁰Ńgyê mme, n gyím ka itə̂m, n súmá njû. Kpe nnyón nne nnyo á yuk eyum ejámé, a bhâ rə́bhe njû, n kí gye n di édî na yê, yê fə́ne a dî na mme.

²¹“Nne nnyo á fon érûm ka achot mmá, tîk n kâm yê a kúmi na mme ka ekumi otúi ejámé. Nâ ekpak fə́ne nji mme ḿfoné m fonê érûm, n kúmi na Ńsé omé ka ekumi otúi ejê.

²²“Nne nnyo á fon otûŋ, deê yê a yúk ejûm nji Ntʉgantʉ Obhasi a chorê mbâ bichəme atóbhá abhámé.”