Read ejagham Ndem~i jon, echî 4 Bible Online

Ndem~i jon, echî 4 - ejagham bible

Ndem~i jon, echî 4

¹Ńji é kpó chiŋ, n kêp áfo mbá-ochî obhámé, n yên mbá nnyi o kí chiŋ kən o gyê ósô, a ri fóŋ. Ndaŋa-mbá eyum nji n yúghi nná, é chorá na mme, ejok noŋ abhukpoŋ. Eyum njí é kpô chot sê, “Bhák kpíri ngá, n di ń tóŋé wâ ejûm nji é kí fap ka ntə́ma-njəm ebhú.”

²Ka ngyím ányi Obhasi Ebhare Ntʉgantʉ a gyê ə̂m ka biji. N yên ekumi otúi ósô é fâp áfo ka ochî obhámé. Nne a kun ka ekumi njí.

³Nne nnyo a kun nná áfo, ochî obhê ó runá noŋ atáé etat mma á bhíŋa sê jaspa na kanériyan. Ibhaŋ í ngurobhú, í gaá nná enyaghám, í fáre ekumi otúi njí í kâk ka étíŋanti.

⁴Bikumi otúi etat esam na énî í rî, í fáre ekumi njí. Ane-akúí eték esam na ánî á kûn fə́ne ka bikumi mbí. Á kághe ábháré ḿfô ka biji, á kəbhe ntam otúi mmi á yími na gûl.

⁵Ka eji ekumi nji étíŋanti njí, nyaŋanya a róghe eyimím. Nsân a róghe fə́ne egboóm. Mbá-ochî ekumi njí, biyâŋ noŋ á nyóe ńsáé ń dî nnígisá. Ḿfa nâ ńtʉgântʉ enígisá nnyi Obhasi.

⁶Mbá-ochî ekumi njí eróŋ, ejûm etat é rî áfo ka nsi noŋ efe, meé noŋ aya. Ejûm njí é rî fə́ne jáé noŋ ayép. Ka étíŋanti, iyîm etat í rî mbít í gyími, ńji ka ejê eji, ngûm énî, í fáre ekumi otúi njí. Iyîm mbí í fone amə̂t etî-etî, etʉ̂ mbá-ochî, etʉ̂ mbá-njəm.

⁷Iyîm í mbít mbí, nji ndaŋa-mbá é rî noŋ nki, enyeré noŋ ndûm i mfoŋ. Nji tat é fóne ochî noŋ mbi nne, osúí ínî noŋ ébhêk é fəbhá ka ósô.

⁸Iyîm mbí ínî kpe njə́n é fóne afabhe aságasá. Kpe njə́n eji biji ábho amə̂t-ámə̂t, kpe na óséré afabhe ábho. Na atʉ́ oo, na efín oo, iyîm mbí í bhó re ekonóm sê, “Obhasi, we a ri Ntûfâm nnyo o chíŋi ochíŋ. We a ri Obhasi ejík na efaŋ na ekpin ka nnyen-i-mbá. Éməné we o ri, mfá-mfá o ri, we nâ o kə́ bha ka nsígha-njəm ebhú.”

⁹Kpe bhaghé ebhú nji iyîm mbí ínî í karé nkat na ekûp na ejík mbâ nne nnyo a kun áno ka ekumi otúi njí, yê nnyo ekpin ejê é ká fon ntə̂m,

¹⁰ane-akúí eték mbá esam na ánî á kí gbo áfo ka ochî nne nnyo a kun nná ka ekumi otúi njí, á káre yê ejík, yê nnyo ekpin ejê é ká fon ntə̂m. Á kí yighí ntam otúi ábho á kî áfo ka ochî ekumi otúi njí, á róghe ekónóm sê,

¹¹“Ńtâ Obhasi owəré. É nóbhe, é bhîk fə́ne sê ngun á káre wâ nkat na ejík, á yúbhi fə́ne ikom ifâ. Echî aŋ? We nâ o yimî nná chénchén ejûm. We fə́ne nâ o wóme ó yîm ḿbə́ne, kən ó yim. Iyîm chénchén í rî fə́ne, ka we ó kot se í jóe.”