Read ejagham Ndem~i jon, echî 5 Bible Online

Ndem~i jon, echî 5 - ejagham bible

Ndem~i jon, echî 5

¹N yên ekpak í nwet etat nji á fə́re ofə́t. Nne nnyo a kun ka ekumi otúi njí a fî nwet nnyí ka obhô-orûm. Á sêŋ iyîm njəm ekpághé nwet nnyí ébháe fép. Á kóe iyîm etat á yîm mbuí ekpak í nwet nnyí á fîn ka ngûm enígisá.

²N yên mân ndûm i énjel yót a fâp a kí bhəp na ndûm eyum se, “Énê nnyo a bhighî eyighím mbuí ekpághé nwet nnyí, a rəbhé ńnyə́ne?”

³Kən kpe nne yót ka ósô, kpe ka nsi, kpe ka eték akə́bha-nsi, nnyo a bhighî ekpághé nwet njí orəbhé a kép ńjə́ne, á ka fáp.

⁴M gbô ka ekʉ̂ n kí rʉri bəre á ká yen kpe nne yót nnyo a bhighî ekpághé nwet njí erəbhə́m a kép ńjə́ne.

⁵Kən nne-nkúí yót ka mba á rî nná áfo a chôt se, “Ka kpó rʉri. Ńgyê nne nnyo a ri nâ Nki ka ndə́p-i-njû Juda, ndûm eyábhé-mmon í Debhit, a nôk a kô érûm. Mfá-mfá a bhîk nji a kí wa ngûm enígisá nnyi á fíni nná ekpághé nwet njí, a rəbhé ńjə́ne.”

⁶Ka étíŋanti ekumi otúi njí n yên Mmon-i-njo-mbúi a fâp, a gyími. Iyîm í mbít mbí ínî na ane-akúí ane mbá, á rî á fáre yê. Mmon-i-njo-mbúi nnyó a ri noŋ kpe á yúi oyúí. A ri na abhaŋ anígisá, amə̂t anígisá. Amə̂t mmá a ri ńtʉgântʉ enígisá Obhasi nnyi a túmi ka ngun ndə́m.

⁷Mmon-i-njo-mbúi nnyó a jî kô ekpághé nwet njí ka obhô-orûm í nne nnyo a kun áno ka ekumi otúi njí.

⁸Nji a kóe ekpághé nwet njí, iyîm í mbít mbí ínî na ane-akúí ane mbá esam na ánî, á gbô áfo ka ochî Mmon-i-njo-mbúi nnyó. Chénchén ábho kpe énê a fî gitá na ékpáŋkpáŋ etat nji á yími na gûl. Ejûm énoê egyʉ etat é rî é súi ka ékpáŋkpáŋ njí. Ejûm énoê egyʉ njí nâ é rî agore ane Obhasi.

⁹Ane-akúí ane mbá na iyîm í mbít mbí ínî á róghe ekónóm ekôn efê sê, Ó bhik ka etʉri nji ó kok ekpághé nwet njí ó rə́bhe ngûm nnyi á fíni nná. Echî é rî sê á yúi wâ, o kô agyʉ́ŋ amâ o yîm ane á sém, á chə́bhe ane Obhasi. Ane mbá á dʉ ka ojû ka arə́p ka arə́p, ka mfâm ka nyum ka nyum, ka nték ka otúi ka otúi, na ka ane ka mkpak ka mkpak.

¹⁰Ó yim otúi ó kare ane mbá, ó yim ábho akará-agore se á tʉ̂k Obhasi owəré. Ikom í ngun í chəbhe mfi ábho.

¹¹Nji m kpô kép, n yûk ejok baénjel, ó bhó fan, á súi ngûm. Baénjel mbá á fáre eji ekumi otúi njí na eji iyîm í mbít mbí ínî í gyím na ane-akúí ane mbá.

¹²Á kí kuk sê, “Mmon-i-njo-mbúi nnyo á yui nná, a bhîk ka ekóóm ikom, na efaŋ na oməŋá-ejûm na érûm na ejík na ekûp na nkat.”

¹³N yûk mân kpe njə́n ejûm nji é fóne ekpin ka ósô oo, ka nsi oo, ka eték akə́bha-nsi oo, ka etím aya oo, kpe ka fan-fan, á kí kon sê, “Deê nkat na ejík na ekûp na ikom í jóe í káre yê nnyo a kun ka ekumi otúi na Mmon-i-njo-mbúi nnyó ka ótúm-ótúm.”

¹⁴Iyîm í mbít mbí ínî mbi í rî nná áfo í chôt fə́ne sê, “Áno.” Ane-akúí ane mbá fə́ne á gbô áfo ka nsi á kí karé ekûp na ejík.