Read ejagham Ndem~i jon, echî 6 Bible Online

Ndem~i jon, echî 6 - ejagham bible

Ndem~i jon, echî 6

¹M bâ yên mân Mmon-i-njo-mbúi nnyó noŋ a rəbhê ndaŋa-mbá eji nji á fíni ekpághé nwet njí. Nji a rəbhê, n yûk ejûm í mbít jə́t noŋ é chóre na ndûm eyum noŋ nsân se, “Bhák.”

²Nji a chorê áno, ń yéna ébháré mfoŋ anyanyâ é fap. Nne nnyo á bhena ńnyə́ne a fôn eyek ka obhô. Á kô itam érûm á káre nne nnyó. Nne nnyó a mághe a jak enok, a fon érûm.

³Nji Mmon-i-njo-mbúi nnyó a rəbhê osúí ngûm ébháe, n yûk ejûm í mbít nji tat nâ osúí íbháe fə́ne é chôt sê, “Bhák.”

⁴Mfoŋ anyanyâ a bhík chuu a fâp fə́ne a bhák. Á káre mbéná ńnyə́ne ikom sê a yighí ekone ka ngun, ane á yúi atem. Á káre yê fə́ne ekpatə́m akparanja áma nná.

⁵Ebhú Mmon-i-njo-mbúi nnyó a rəbhê osúí ngûm ésá, n yûk ejûm í mbít nji osúí ísá fə́ne é chôt sê, “Bhák.” Nji a chorê, n yên ényaghê mfoŋ anyanyâ é fâp. Mbéná-bhéná a fî egaé iyîm ka obhô.

⁶N yûk mân ejok noŋ ndûm eyum mba iyîm í mbít mbí ínî sê, “Ńkôp érési a kí kpo ntí etûm ofú bhə́t. Ńkôp ekpak édî etat fə́ne ésá a kí kpo ntí etûm ofú bhə́t. Kən á ká bhibhi akʉ́ órif na aməm.”

⁷Mmon-i-njo-mbúi nnyó a kpô rəbhé osúí ngûm énî, n yûk eyum ejûm í mbít nji ntə̂m-a-ndə́p, é chôt sê, “Bhák.”

⁸N yên mfoŋ anyanyâ a fâp, ńna noŋ ogok. Mbiŋ í nne nnyo á bhena ńnyə́ne á kamá se Ekʉ̂, nnyo á kamá se Eték Akə́bha-nsi a bhák yê mbá-njəm. Á kíri ngun ndə́m ka ngûm énî, á káre ábho ikom ka ebhat jə́t sê á kó akparanja na njaé na emaŋé, á yúí ane, a yîm fə́ne onyam obhí ó yúí ábho.

⁹Nji Mmon-i-njo-mbúi a rəbhê osúí ngûm érôn, n yên ńtʉgântʉ ane mba á yúi ka obhô nchot Obhasi ka esə́n eji nji á túbha ekəp mbâ Obhasi. Á yúi fə́ne ane mbá ka ntî-isê nnyi á gyími njəm i Jisos.

¹⁰N yûk noŋ ane mbá á kúghi sê, “Ńtâ Obhasi Ósô, mfoné-mfoné Ntûfâm nnyo akôp bhúghí-bhúghí á ka fon, é kí kət nan kən ó táŋ ngun, ó yîm ane mba á yúi êt, ó fé?”

¹¹Á káre mân ane mbá, kpe nnyón, ébháré nkʉ̂. Á sə́re ábho sê á yóe biji ka mkpât ebhú, á chîk ta mfan ábho noŋ ayimá-etûm Obhasi na atem-abhon-í-nnyen a bhik. Nâ atem mba á kí yui fə́ne noŋ á yúi ábho.

¹²M kpô yén Mmon-i-njo-mbúi nnyó a kpô rəbhé osúí ngûm eságasá. Ngun á nyiŋá ekpatə́m enyiŋím. Njúí a kpíghi ényaghê noŋ ényaghê éfô. Nnyam-ósô a chə́bhe noŋ agyʉ́ŋ.

¹³Ńdʉnândʉ-ósô ḿ gbô ka nsi noŋ kpe nkap étí fîk nnyi mfêp oyum a wûk a tûp ka nsi.

¹⁴Ngurobhú a tân noŋ kpe ekpághé-nwet nji á fə̂t á yighí. Kpe njə́n egúí na eji óráné-ngun mbi ayép á kághe, í yóŋe ngûm.

¹⁵Iyîm mbí í kpô yóŋe nná ekpak njí, atúi-ofâm í ngun na ane ayúp, na atúi-ofâm ane-enok, na ane efaŋ, na afoná-nkom, chénchén ane, asʉ́ŋ na abhon, á bê á bhə̂t biji ka otáé na eyam kpe njə́n ka agúí.

¹⁶Á gyʉá sê, “Agúí na atáé, gbo êt, e kâ yên ochî nne nnyo a kun áno ka ekumi otúi, e kâ yên oyámá-ḿbə́ŋé Mmon-i-njo-mbúi.

¹⁷Ekpatə́m ofú oyámá-ḿbə́ŋé mbí ábho ó bha. Énê nnyo a kí gbʉi ḿbə́ne?”