Read ejagham Ndem~i jon, echî 7 Bible Online

Ndem~i jon, echî 7 - ejagham bible

Ndem~i jon, echî 7

¹Ńji é kpó chiŋ, n yên baénjel ánî á gyím ka nkûk énî nnyi ngun á fî mfêp énî nnyi ngun sê a kâ nôk ka ngun na kpe ka aya na kpe ka étí.

²N yên énjel nnyo tat a dʉ ebhat í njúí á fabha. A fî na eriŋ í mfoné-mfoné Obhasi ka obhô. Na ndûm eyum, a bhîŋ baénjel mba ngá ánî mba á kare ábho ikom sê á némé iyîm í ngun na mbi aya.

³A sə́re ábho se, “Ka némé ên ngun, kpe aya, kpe átí ta é kâk ayimá-etûm Ńtâ Obhasi owəré eriŋ ka ńsáé-mbûk.”

⁴N yûk sê ane mba á kí kak ábho eriŋ í ńsáé-mbûk njí á kí joé ntem-esam, nsam ekû na ésá (144,000). Ane mbá á dʉ̂ ka ndə́p-i-njû ófó na ébháe nnyi abhon Isrel.

⁵Mba á kághe eriŋ ka ndə́p-i-njû Juda á rî ntem-esam, nsam ekû (12,000). Mba ndə́p-i-njû Ruben, ntem-esam, nsam ekû. Mba ndə́p-i-njû Gat, ntem-esam, nsam ekû.

⁶Ndə́p-i-njû Ase, ntem-esam, nsam ekû. Ndə́p-i-njû Natari, ntem-esam, nsam ekû. Ndə́p-i-njû Manase, ntem-esam, nsam ekû.

⁷Ndə́p-i-njû Simiyon, ntem-esam, nsam ekû. Ndə́p-i-njû Libhayi, ntem-esam, nsam ekû. Ndə́p-i-njû Isaka, ntem-esam, nsam ekû.

⁸Ndə́p-i-njû Seburun, ntem-esam, nsam ekû. Ndə́p-i-njû Jusep, ntem-esam, nsam ekû. Ndə́p-i-njû Benjamen ntem-esam, nsam ekû.

⁹Ńji é kpó chiŋ, ń yéna ekpatə́m ekam ane, kpe mfan cháŋ, á gyím áfo ka ochî ekumi otúi njí na ka ochî Mmon-i-njo-mbúi nnyó. Ane mbá á dʉ̂ ka ane ka mkpak ka mkpak, ka ojû ka arə́p ka arə́p, ka nték ka otúi ka otúi, na ka mfâm ka nyum ka nyum. Á kághe ábháré ḿfô, á fî mmâŋ ka abhô.

¹⁰Ane mbá á kí kuk ka ndûm eyum sê, “A ri Obhasi owəré nnyo a ri ka ekumi otúi na Mmon-i-njo-mbúi nnyó nâ á fóne ikom á yîm ane á sêm.”

¹¹Chénchén baénjel á gyími á fáre ekumi otúi njí na ane-akúí ane mbá na iyîm í mbít mbí ínî. Á tə̂p mbûk ábho áfo ka nsi ka ochî Obhasi, á káre yê ekûp na ejík.

¹²Á chorá sê, “Áno! Deê nkat na efaŋ na oməŋá-ejûm na ekûp na ejík na ikom na érûm í jóe í káre Obhasi owəré, ka ótúm-ótúm. Áno!”

¹³Nne-nkúí yót áfo a bhə̂p ə̂m se, “Bhaghé ane nná na ábháré ḿfô ka biji? Á dʉ̂ fan á bhak?”

¹⁴N sə́re yê bəre, “Ńsé, we ó məŋe.” A chôt mân se, “Ane mbá nâ mba á dʉ̂ nná ka ekpatə́m oseŋe. Á su ḿfô ábho na agyʉ́ŋ í Mmon-i-njo-mbúi nnyó, á chəbhe á bhara kpáŋ.

¹⁵Nâ ńjə́ne á rî áno ka ochî ekumi otúi Obhasi, á yimá etûm ejê atʉ́ na efín ka etím ókʉ́rí obhê. Yê fə́ne nnyo a kun áno ka ekumi otúi njí a kí bhuí ábho ka nji a ri na ábho.

¹⁶Njaé a rô yám ábho, ekot-ayép á ro kpó fon. Njúí a rô kpó nok ábho, efû é ro gbo ábho.

¹⁷Echî aŋ? Mmon-i-njo-mbúi ányo nnyo a ri áno ka eji ekumi otúi njí nâ a kí bhabhe ábho. A kí ko ábho a jak ka ńchí ayép, eji ayép mma á kára ekpin á fə́ma. Obhasi tîk a fôn mân chénchén obhə́bhe ka amə̂t ábho, kpe ékáré jə́t á bhó maghé.”