Read ejagham Ndem~i jon, echî 8 Bible Online

Ndem~i jon, echî 8 - ejagham bible

Ndem~i jon, echî 8

¹Nji Mmon-i-njo-mbúi nnyó a kpô rəbhé osúí ngûm enígisá nnyi á fíni nwet nnyí, ngûm a nâ chák ka ósô, kpe ejok. Áwa á mân kpe ebhat.

²N yên mân noŋ á káre baénjel anígisá mba á gyíma ka ochî Obhasi abhukpoŋ anígisá.

³Énjel nnyo tat a bhâ gyími ka eji á túbha ekəp mbâ Obhasi, a fî ejûm nji á yôk ejûm énoê egyʉ ka obhô. Á yími ejûm njí na gûl. Á káre yê ejûm énoê egyʉ etat etî-etî, sê a chəm na agore ane Obhasi chénchén a karé. Sê a karé áfo ka eji agore ekarám nji á yími na gûl. Eji njí é gyím ka ochî ekumi otúi.

⁴Nji a karê, átʉ́k ejûm énoê egyʉ njí na agore ane Obhasi mbá á mághe abhô énjel nnyo a gyím nná ka ochî Obhasi, á gyʉ̂t ka ósô.

⁵Énjel nnyó a kô mân ejûm nji á rígha nná ejûm nji énoê egyʉ a kô ngun ka eji ekəp etúbhúm njí, a kâk ń súi. A tûp ka ngun. Nji a túbhi, nsân a bhə̂t, nyum a kí kuk, nyaŋanya a kí nyaŋé, nsi a nyiŋá.

⁶Baénjel anígisá mba á rî nná na abhukpoŋ mmá anígisá, á tʉ́ri biji, á fí.

⁷Ndaŋa-mbá énjel a fî amê, atáé-ngurobhú á tôp, ngûn mmi á nyóbhe na agyʉ́ŋ, ń tôp. Iyîm mbí í gbô ka ngun. Nji í gbóe nná, ngun ndə́m, ó kirí ka ngûm ésá, eji jə́t é rîk é mân oman. Átí ngun ndə́m, ó kirí fə́ne ka ngûm ésá, eji jə́t é rîk é mân oman. Ájé afê chénchén ka ngun á rîk.

⁸Osúí énjel ábháe a fî amê abhukpoŋ. Ejûm etat noŋ ekpatə́m egúí nji ngûn ń dûk ka ńjə́ne, é yə̂p fúp, é gbô ka aya. Aya ndə́p, ó kirí ka ngûm ésá, eji jə́t é kpíghi agyʉ́ŋ.

⁹Onyam-aya fép, ó kirí ka ngûm ésá, ebhat jə́t é kpô chénchén. Ásughîkaŋ chénchén ka aya, ó kirí ka ngûm ésá, ebhat jə́t é bhîp é mân oman.

¹⁰Osúí énjel ásá a fî amê abhukpoŋ. Ekpatə́m írʉnândʉ-ósô í rôt nnyi ósô, í gbô, í rûk noŋ ngûn. Í gbóe ka ebhat aya jə́t na ebhat abhon ayép jə́t nji ó kirí iyîm mbí ka ngûm ésá.

¹¹Á bhíŋa írʉnândʉ mfí sê Nyui-étí. Nji írʉnândʉ mfí í gbóe nná ebhat ayép njí jə́t é kə̂t é yua chík. Ane etî-etî á kpô nji á gwóe ayép mmá á yúa oyuí.

¹²Énjel nnyo osúí ánî, a fî amê abhukpoŋ, ikom ejok abhukpoŋ í gbô ka ebhat í njúí jə́t na ebhat í nnyam-ósô jə́t na ebhat í ńdʉnândʉ jə́t, ekirím iyîm mbí ka ngûm ésá. Nji í gbóe áno, ebhát ábho é tân. Ebhát ekiri jə́t nji ofú na ebhát ekiri jə́t nji atʉ́ é tân.

¹³N kêp, n yên ébhêk é fə́bha é chiŋa ka ngurobhú. N yûk ńjə́ne, é gyʉ́a na ndûm eyum sê, “A bhâ oo, a bhâ oo, a bhâ oo. Nchot a bhâ nnyi a bháe mbâ ane mba á kí joé ka ngun nji baénjel mba ngá ásá á fi abhukpoŋ ábho.”