Read ejagham Ndem~i jon, echî 9 Bible Online

Ndem~i jon, echî 9 - ejagham bible

Ndem~i jon, echî 9

¹Osúí énjel árôn, a fî abhukpoŋ amê. Nji a fíi, n yên írʉnândʉ mfi í dʉ̂ nnyi ósô, í gbô ka nsi. Á káre ḿfə́ne ogbógóró nnyo-mbá Ébhírí nji Ntə̂m Cháŋ.[1]

²Í rə́bhe nnyo-mbá Ébhírí nji Ntə̂m Cháŋ. Nji í rə́bhe, ndûm átʉ́k noŋ á dʉ̂ ka ekpatə́m erəmta-ngûn á róghe efábhám. Ejírim é gbô ka njúí na efébhe chénchén, ka obhô átʉ́k mma á dʉ̂ nná ka Ébhírí njí.

³Aguruguru-kpák-kpák á fâp ka átʉ́k mmá, á bhak ka ngun. Á káre ḿmáne ikom noŋ ikom ényaŋkíŋ.

⁴Á sə́re ḿmáne á kâ dî kpe njé yə́t ka ngun na kpe étí jə́t na kpe ejûm jə́t nji é kúa ka ngun. Sê á dí a ri ane mba á ká fon eriŋ Obhasi ka ńsáé-mbûk.

⁵Á mághe ḿmáne sê á káre ane oseŋe ka nnyam-ósô érôn kən á kâ yúi kpe nne yót. Oseŋe mbí ó nógha noŋ kpe enoghóm nji ényaŋkíŋ é yum nná nne.

⁶Ebhú áji é si, ane á kí wom ekʉ̂ kən á bhó yen. Á kí wom sê á kpó, kən ekʉ̂ a kí be ábho.

⁷Ó yen aguruguru-kpák-kpák mmá o kí to se a ri ofoŋ enok na ó tʉ́ri biji enok. Á fóne iyîm etat ka echî, ó yen se a ri ntam otúi mmi á yími na gûl. Ochî ábho noŋ mbi ane.

⁸Nnyʉ̂ ábho ka echî noŋ nnyi nne-nkáé. Amə̂ŋ ábho noŋ amə̂ŋ í nki.

⁹Akpághé ábho ka biji noŋ nkʉ̂-esené nnyi á kágha ka enok. Ebhú á kí fəbhé ejok afabhe ábho ó yuk sê ejok akpi-nsi etî-etî mma ofoŋ anyanyâ ó tʉ̂k, ó jî enok.

¹⁰Nkî ábho ń dî noŋ mmi ányaŋkíŋ, ń tak nne fə́ne. Ikom ábho mfi í kí ta ane ka nnyam-ósô érôn í rî ka nkî ábho.

¹¹Ntûfâm aguruguru-kpák-kpák mmá a ri énjel nnyo a fonê Ébhírí nji ntə̂m cháŋ. Mbiŋ i énjel nnyó ka eyum í Ibru a ri Abadon. Ka eyum í Grik a ri Aporiyon, nâ se Mbíbhá-bhíbhá.

¹²Ḿfa nâ ndaŋa-mbá achot. Á chiŋ, mma tat á kí kpo nyeré ábháe.

¹³Osúí énjel ka aságasá, a fî abhukpoŋ amê. Nji a fíi, n yûk eyum, é dʉ̂ ka abhaŋ ánî mma á rî ka eji ekəp etúbhúm nji á yími na gûl, é gyím ka ochî Obhasi.

¹⁴Eyum njí é kí səre énjel nnyó ka osúí aságasá nnyo a fiî nná abhukpoŋ mmá se, “Yighî baénjel ánî mba á fíni nná ka ekpatə́m aya Yufretes.”

¹⁵Á yíghi fə́ne baénjel mba obhô. Á fíi baénjel mbá á kî á chighá áwa mmá, ofú mbí, nnyam-ósô nnyí na eyâ njí, í sí, ábho á yúi ebhat ane ndə́m, ó kirí ka ngûm ésá.

¹⁶N yûk sê ane-enok mba á gyʉ́ri ofoŋ-anyanyâ á kə́ bha, á tî kpe-eji, ó bhó fan (200,000,000).

¹⁷Deê ń sə́ré ekpak nji n yéne ofoŋ anyanyâ mbí ka ndem amé. Ane mba á bhéna ofoŋ mbí á kághe nsené enok etat ka ngaŋ. Nnyi tat a bhík chuu noŋ ngûn, nnyi tat noŋ ényaghé, nnyi tat fə́ne ogok-ógôk. Bichî ofoŋ anyanyâ ábho í rî noŋ mbi oki. Ngûn na átʉ́k na atáé etat mma á bhíŋa sê sélfa í fabha ofoŋ mbí ka nnyo.

¹⁸Arûm oseŋe mmá ásá á yúi ebhat ane ngun ndə́m nji ó kirí ka ngûm ésá. A ri ngûn na átʉ́k na atáé sélfa mbi í fábha ábho ka nnyo nâ í yúi ane ka ekpak njí.

¹⁹Nan? Ikom ofoŋ mbí í dʉ̂ ka nnyo ábho na nkî ábho. Nkî ábho ń dî noŋ onyô, ḿ fôn achî. A ri na achî mmá nâ á kí yum ane.

²⁰Ane ngun mba ngá chénchén mba á ká kpo ka arûm oseŋe mmá ásá, á ká yoŋe ekpin ábho, á jak ochî, á jigha ojê na ajom, mma ebhú tat á yími na esené gûl, ebhú tat na nnyi sírbha na kpe ebhú tat na nnyi brôn. Mma tat á yími na atáé, mma tat na átí. Iyîm mbí í bhó yen mbá, í bhó yuk mbá, í bhó jen ejen.

²¹Nsôn á ka yim ábho á yóŋé ḿbə́ŋé á mághe obhí ábho, ka oyúá-ane, achot ajom, achot akôp enuŋúm na ane, na ejʉ̂.