Read eten ɛMacu 11 Bible Online

ɛMacu 11 - eten bible

ɛMacu 11

¹Kɛ ne sɛ ɛYɛso gha kɛ taal ivol lɛdaa wo nɛ ninɔn ne icwam ɛbhɛ ɛnduwubɔ nɛ nibhɛ ifaa na, ne ɛ tek ɛlɔ yɛghaa nggyɛ wo, ɛ phɛ ndɔ nigarang nga nɛ nibhɛ so cɛcɛk ɛnggyɛ ɛbhɛ mɛmɛ ninyi na nɛ, ɛ ta sanga ibol iyɛnɛng ngge.

²Nten nɛdee nggyɛ wo, ɛYohana ne Yaak ne iBatisima gha kaa ne so ne ijwee ne nyang, ne ɛ phok nikɔn na ne ɛKiriti gha mɔn no, ne ɛ tom ninɔn ne icwam ɛbhɛ na ɛlɔ ɛKiriti gha,

³wu tɛ nibhɛ bhɛ yaak ɛbhɛ, “iGyɛ ɛ soye ɛnyi gha ne kaa yaak njwii wu ɛ sɛ yɛɛs so, hang njwi hyep ɛhak?”

⁴ɛYɛso gha ne kyii nɛ, ne ɛ yaak nibhɛ, “Kyii ɛn te ɛbhɛ tɔng ɛn ɛYohana yegha ɛkɔn na ne ɛ kɛ phok ɛn ɛ ta yaang ɛn no.

⁵Ɛ kɛ yaang ɛ ɛli nɛ niwil la kɛ yaa wɛɛ, nigyamil la kɛ yaa hyel tsik, nikparong nga kɛ tes wɛwɛy, nirwan na kɛ yaa tenes ivol, ikpom ba ta semese, ne ta tɔng nihala na iBol iYɛnɛng ngge.

⁶ɛHaa ɛwɛng ngaa nggyɛy ne ɛ say ibol nge de ɛ sang to irway ba.”

⁷Ne sɛ nibhɛ kɛ kyii, ɛYɛso gha ne ji yaa bol ne idira ninyi de daa ne ito ɛYohana de ɛ bo, “ɛLi ne ɛ kaa phɛ ɛn ɛlɔ ɛYohana gha ndɔ ɛhay ya, ɛya ɛkɔn ne ɛ kaa tas ɛn aa bhɛ yaang ɛn lɛɛ? Inzang ne igbil i bɛm naa?

⁸iKyee ne ɛ kaa phɛɛs ne yaang ɛn lɛɛ? ɛNyi ne ɛ bok itsura ne izel naa? Kwa! Ninyi ne yaak ne itsura ne izel da sos ne idee nigɔm.

⁹Ne so iKyee ne ɛ kaa jung phɛɛs ne yaang ɛn lɛɛ? ɛNɛbi yee? Ɛɛy, nzi ne tɔng nyini, ɛnyi gha ne ɛ phyin ɛnɛbi gha.

¹⁰Ɛbhɛ ɛ so ɛnyi gha ne kɛ haa ibol ɛbhɛ de ndɔ ne ɛWee ne iBol ɛTaanggbey yo i bo; ‘Naa tom ɛngɔn ne tom nge ɛ ho ɛyisɛ mo, ɛbhɛ aa bhɛ ryɔng ngɛ ɛnkiinɛ mo wo nyɛɛn.’

¹¹“Nzi tɔng nyini itin nɛ, gbik ɛnyi gha ne ɛkuk kɛ yɛk ɛbhɛ, ɛYohana ne Yaak ne iBatisima gha ne phyin ɛbhɛ. Gbik ne iphɛ ɛlɛy, ɛnyi gha ne ɛ kɛ ne taasek gbom ndɔ igbɔm ɛTaanggbey, ne ɛ phyin ɛbhɛ.

¹²Kaa ne ku nten ɛYohana ne Yaak ne iBatisima de i phyii hɔn izenge wo, igbɔm ɛTaanggbey da i ne sɔ nggbang, ninaa ne baasek nggbang ngga nibhɛ bhɛ tɔk tɛ nibhɛ sɛɛ phɔt igbɔm ɛTaanggbey da ne ihwet.

¹³Ninabawa na gbik ne iMɛmɛ ɛMuusaa da kaa tɔng bol igbɔm ɛTaanggbey de nyɛɛn ɛYohana gha kyi yɛɛs.

¹⁴Wu ɛ kɛ ne sim ibol nibhɛ de, ɛYohana gha ɛbhɛ ne ɛ soye ɛnyi gha ne kaa mɔng ibol ɛbhɛ de wu ɛLiya gha sɛ yɛɛs so.

¹⁵ɛNyi gha ne ɛ bok itoro ne phok, te ne ɛ phok.

¹⁶“Naa ten ninyi ne izam mɛnaa wo ne ikyee daa mɛɛ? Nibhɛ so tɛ ninɔn nɛ nibhɛ kɛ sooset ɛtungga nibhɛ yeres en nibhɛ bo:

¹⁷‘Njwi kɛ wurus ɛmandɛɛng, sɔng ne ˆɛ yel ɛn isham mɛ nang, njwi kɛ ne yɛk nyini ne ɛhuhɔɔ, sɔng ɛ ne say ɛn njwii nɛ nang.’

¹⁸“Daa ɛli ne ɛYohana gha kaa yɛɛs ɛɛ mbaray tang sɔ inɛn ɛnap, ɛ kuma, ne ɛ yaa bo ɛn wu ɛ bok niphoo.

¹⁹ɛNgɔn ɛNyi gha kɛ ne yɛɛs, ɛ re ɛ ta i sɔ, ninyi na kɛ ne yaa bo wu ɛ bok idɔ ɛphiri, wu ɛ so ɛtaay ninaa ne saasel ijam ne ivel gbik nɛ ninaa ne ɛfɔt. Gbik ne iphɛ ɛlɛy, i ne seng ntsɛntsɛng ɛTaanggbey de so itin nɛ ɛlɔ ninyi na nɛ nibhɛ bok ko lenɛ ne nitomɛ na nɛ nibhɛ mɔn.”

²⁰Sɔng ninyi nigarang nga ne ɛYɛso kaa mɔn ne iday nikɔn ne kparat ɛbhɛ de ne nang ne san ɛbɔk nang, ɛYɛso gha ne boote nɛ nibhɛ ne irway njɛt ɛ yɔngɔ,

²¹“ɛKɔn ne ɛnik nyinɛn ninaa ɛgarang ne iKɔrazi! ɛKɔn ne ɛnik nyinɛn ninaa ɛgarang ne iBasɛda! Daa ɛli ne sɛɛ yɔng kɛ mɔn ninaa ɛgarang ne iTaya gbik ne iSidɔn ihywee nikɔn ne kparat ta ne kɛ mɔn ndɔ mon no, nibhɛ sɛɛ ne ku sɔsɔɔy itsura ne ishwin, nibhɛ bungaay ne ntsong te iphɛ tɔɔrek wu nibhɛ kɛ san ɛbɔk.

²²Nzi ne tɔng nyini, ɛTaanggbey ya sɛ ne bo ɛbɔk nɛ ninyi ne iTaya gbik ninaa ne iSidɔn ɛtuk ɛshara gha ɛ phyin nyini.

²³iGyɛ wo lɛɛ? iKafanahum, ɛ ji wɛɛ te sɛ tɔɔk kɛ daa ne irywa naa? Kwa! Sɛ yang cwaak kɛ ndɔ ɛtata ɛlɔ ne ikpom ma. Sɛɛ yɔng kɛ mɔn ihywee nikɔn ne kparat de ne kɛ mɔn ndɔ ne igyɛ ɛgarang ne iSɔdɔm, ninaa ne iSɔdɔm na saa ne shɛɛ nɛ ɛbhɛ hɔn izenge.

²⁴Nzi ne tɔng nyini, ɛTaanggbey ya se ne bo ɛbɔk ne iSɔdɔm be ɛtuk ɛshara gha ɛ phyin nyini.”

²⁵Nten nɛ de nggyɛ wo, ɛYɛso gha kaa boote ɛ yɔngɔ, “ɛTaa, ɛDaray ɛdaa ne irywa ne ɛzay gbik, n bok irway ihwala ne igyɛ, daa ɛli ne ɛ kɛ rɛɛ ninaa ne ntsɛntsɛng nga, nɛ ninaa ishweng nga ibol mo de, ɛ ji tɔɔrek ninɔn mo iphɛ.

²⁶Ɛɛy ɛlɛy ne iphɛ kɛ jam mɛ nɛ ɛTaa yɔɔy.

²⁷“ɛKyɛɛ nge gha kɛ nang me nikɔn na gbik. Sɔng ɛnyi ne yɛɛ ɛNgɔn na kang ne ɛKyɛɛ gha nang, sɔng ɛnyi ne yɛɛ ɛKyɛɛ gha kang ne ɛNgɔn na gbik nɛ ninaa ne ɛbhɛ ɛNgɔn na kɛ kasa aa phaal nibhɛ wo nang.

²⁸“Yɛɛs ɛn ɛlɔ nge, nyinɛn no ne ɛ sɔ ɛn nggbang ngga nɛ nikɔn nɛ nibhɛ kɛ yɛbhɛsek nyini wo, naa ne nang nyini ifɔng.

²⁹Nang ito mon ndɔ ne ikpii nge da tɛ nɛ mɛmɛ ɛn nɛ ne mee. Nzo lyaak, ne n da so hywɛɛ, aa ne sɛ ɛn ifɔng ndɔ ne irway mon.

³⁰Daa ɛli ne ikpii nge da so phyonka, nikɔn na ne naa tɔɔk nyini wo ne so yaay.”