Read eten ɛMacu 12 Bible Online

ɛMacu 12 - eten bible

ɛMacu 12

¹Kaa ne sɛ ɛTuk ne iWɛsɛ niYahodawa na, ɛYɛso gha nɛ ninɔn ne icwam ɛbhɛ na ne i hyel ndɔ ne ihwap ɛlikama. Ninɔn ne icwam ɛbhɛ na kaa ne so kpyak, nibhɛ ne yaa haa ɛlikama wo, nibhɛ re.

²Ne sɛ niFarisawa na kɛ yaang ɛlɛ wo, nibhɛ ne yaak ɛYɛso yegha, “Yaang, ninɔn ne icwam mo na mɔn ɛkɔn na ne ɛ so kyii ɛTuk ne iWɛsɛ gha.”

³ɛYɛso gha ne kyii nɛ ɛ yɔngɔ, “Ɛ kɛ ku shɛɛ tang tɔng ɛn ɛkɔn na ne ɛDoda gha kaa mɔn no nten de ne ɛbhɛ wo nɛ ninyi ɛbhɛ na kaa so kpyak ko naa?

⁴Ɛ kaa bhɛ lel ndɔ ne ijwee ɛTaanggbey, ɛbhɛ wo nɛ ninyi ɛbhɛ na ne ji re ibɛrɛdi de ne kɛ Haan ɛTaanggbey ye nɛ, iphɛ kaa ne so kyii nibhɛ re ibɛrɛdi yɛdee nggyɛ wo, nibo ɛTaanggbey zɔng ne kaa sim nibhɛ tɛ nibhɛ re.

⁵Hang ɛ kɛ shɛɛ tang tɔng ɛn ndɔ ɛShara ɛMuusaa gha, ɛli nɛ nibo ɛTaanggbey mɔn ɛtomɛ gha ndɔ ne iDeng ngge ɛTuk ne iWɛsɛ gha nibhɛ bees ikpii da, i kyii sang yɔng wu hang nibhɛ kɛ ben no naa?

⁶Nzi ne tɔng nyini ɛnyi gha ne ɛ phyin iDeng ngge ɛbhɛ ne ɛ so ɛbɛ wo.

⁷ɛWee ne iBol ɛTaanggbey yo bo, ‘Nzi sim irway ne san iyɔm, sɔng nzi sim hap itsanga nang.’ Sɛɛ yɔng ɛ yɛɛ ɛn ɛkɔn na ne ibol lɛdee wo i bol, sɔng ɛ sɛɛ ne yɔng ɛn wu ninyi na nɛ nibhɛ so cik ko kɛ ben no nang.

⁸ɛNgɔn ɛNyi gha ɛbhɛ bok igbɔm ɛTuk ne iWɛsɛ gha.”

⁹ɛYɛso gha ne tek ɛnggyɛ wo ɛbhɛ lel ndɔ ne ijwee ne itɔɔy yo.

¹⁰ɛDɛ ɛnyi gha kaa ne ɛ so ɛnggyɛ wo ne ɛ kɛ baghat iwɔ. Nidɛng niFarisawa kaa ne ma so ɛnggyɛ wo nɛ nibhɛ ku tɔk ɛkɔn na nɛ nibhɛ sɛɛ nibhɛ wum ɛYɛso yegha nɛ. Nibhɛ ne phom ɛbhɛ nibhɛ yɔngɔ, “ɛShara gha kɛ sim-mɛ wu te i te ɛnyi gha ɛken ɛTuk ne iWɛsɛ ghaa?”

¹¹ɛYɛso gha ne yaak nibhɛ, “Sɛɛ yɔng ɛdɛ mon sɛɛ bok ᐩigyol ntsabhak ne ihywɛ kɛ ho ndɔ ɛyek ɛTuk ne iWɛsɛ gha, ɛ sɛɛ shɛɛ tang bhɛ tul ihywɛ bɛ?

¹²Nzi ne shii bo ɛnyi gha ne phyin igyol ntsabhak ge! iPhɛ ɛlɛy, iphɛ kɛ ne jam te mɔn ɛkɔn ɛyɛnɛng nga ɛTuk ne iWɛsɛ gha.”

¹³ɛYɛso gha ne yaak ɛnyi gha ne kɛ baghat iwɔ wo, “Sinɛ iwɔ mo wo.” ɛNyi gha ne sinɛ iwɔ wo, ifɛ ne te ikpen gbik te ihoo ne ifaa yɛ.

¹⁴niFarisawa na ne wuru nibhɛ bhɛ bol ɛli nɛ nibhɛ yaa phoo ɛYɛso yegha.

¹⁵Ne sɛ ɛYɛso gha kɛ seng ɛlɛ wo, ne ɛ tek ɛlɔ yɛ. iDira ninyi de ne kungus ɛbhɛ, ne ɛ tes nishwa na niken gbik,

¹⁶ɛ ji kpɛng nibhɛ wu hang nibhɛ tɔng ɛnyi ibol lɛ.

¹⁷Ɛ kɛ mɔn ɛlɛ wo te sɛ ɛ shwaasek ɛkɔn na ɛnɛbi ɛShaa gha bol, ɛ bo:

¹⁸“ɛKpuru ngeghaa bɛ ne nggɛ kasa, nzi ne sim ɛbhɛ, nzi phok yɛnɛng ɛbhɛ. Naa sit ɛbhɛ ne ikabyik nge, aa ne tɔng ɛzay ya ibol ne iphɔrɔt de.

¹⁹Sɔng ɛ sɛ́ ne yaa ishamas ɛɛ rɛrɛ shwalala nang, sɔng ɛ sɛ́ ne i kyangase ɛ bol ne nkpiinɛ nang.

²⁰Sɔng ɛ sɛ́ ne tsemele iriraat ne iphɛ kɛ te gubhut nang. Sɔng ɛ sɛ́ ne rim igboo wo ne ifɛ kuusey yo nang. Ɛ sɛ́ maa i mɔn ɛlɛ wo phyii bhɛ hɔn nten ne shwaak ibol ne iphɔrɔt de.

²¹iGbagha wo gbik sɛ ne yɛk irway daa irywɛɛk ɛbhɛ.”

²²Kaa ne yɛɛs ɛYɛso yegha ne ɛdɛ ɛnyi gha ne ikabyik ibebhe so ndɔ ɛbhɛ ne iphɛ kɛ te ɛnyi gha ɛ yɛk iwil, ɛ ta te nkpɔy. ɛYɛso gha ne te ɛnyi gha ɛken, ɛnyi gha ne yaa wɛɛ, ɛ ta yaa bol.

²³Ninyi na gbik ne wum ɛnu zii, nibhɛ ne yaa phomos en nibhɛ bo, “Hang ɛbhɛ so ɛNgɔn ɛDoda naa?”

²⁴Ne sɛ niFarisawa na kɛ phok ɛlɛ wo, nibhɛ ne yɔngɔ, “ɛNyi yɛghaa wo tuul niphoo na daa ɛli ne ɛBɛlizɛbul, ne ɛ so ɛgɔm niphoo, ɛbhɛ kɛ nang ɛbhɛ ihwet tɛ.”

²⁵ɛYɛso gha ne seng icwas nibhɛ da, ne ɛ yaak nibhɛ, “Gbik igbɔm ba ne ifɛ hobhoset to ifɛ yaa ne ho; ɛgarang nga gbik ne ijwee wo nɛ ninyi yɛ kɛ ne hobhoset to, aa ne ho.

²⁶Wu ɛShɛtan na ne kyii tuul ɛShɛtan negha, iphɛ kɛ ne tɔɔrek wu ɛ hobhoset. iGbɔm ɛbhɛ da yaa ne ji kyinak ɛli?

²⁷Wu nzi ne tuul niphoo na ne ihwet ɛBɛlizɛbul da, ɛhay ɛbhɛ kɛ ne ma nang ninɔn mon na ihwet da nɛ nibhɛ tuul niphoo naa? Ninɔn mon na bhɛ sɛ ne bol nyini ɛshara.

²⁸Wu ɛTaanggbey ɛbhɛ kɛ ne nang me ito ne tuul niphoo na, iphɛ kɛ ne tɔɔrek wu igbɔm ɛTaanggbey da ku so ndɔ mon.

²⁹“Sɔng ɛnyi yɛɛ ne lel ndɔ ne ijwee ɛhaa ne ihwet to ɛ kpuusi nikɔn ɛbhɛ tang ɛ kɛ kyi tsa ɛ wum ɛhaa ne ihwet ta nang. Ɛɛ tsa ɛ rop ɛbhɛ nyɛɛn, ne ɛ ji kpuusi nikɔn ɛbhɛ na.

³⁰“ɛNyi gha ne ɛ sang so ne mee wo, ne ɛ so ɛhaa ne iphup nge. ɛNyi gha ne ɛ sang phyik me ne tumɛ nikɔn nge na, ɛɛ ne sanga nibhɛ.

³¹iPhɛ ɛlɛy, nzi ne bok nyini sɛ han ninyi ne ɛfɔt gbik ivol ne bɛɛs ikabyik ge nɛ nibhɛ kɛ mɔn no. Wu ɛnyi gha ne ɛ kɛ ne bɛɛs iKabyik ɛTaanggbey de, sɔng sɛ ne hana ɛbhɛ nɛ nang.

³²Gbik ɛnyi gha ne ɛ kɛ bol ivol ne bɛɛs ɛNgɔn ɛNyi gha nɛ wo, sɛ ne hana ɛbhɛ nɛ. Wu ɛnyi gha kɛ ne bol ivol ne bɛɛs iKabyik ɛTaanggbey de, sɔng yaa ne hana ɛbhɛ nɛ ɛzay yɛghaa wo, ne ɛzay ya ne ɛ yaaso wo nang.”

³³“ɛHon ɛyɛnɛng nga i yɛk ikpam iywɛnɛng, ɛhon ɛbebhe gha ne ma yɛk ikpam ivebhe. I seng ɛhon na daa ihywee ne ikpam ɛbhɛ.

³⁴Nyinɛn no ne ɛ so ɛn te izɔ igywebhe de! Aa mɔn ɛn ɛli ɛ bol ɛn ivol iywɛnɛng ngga nɛ so ɛn nibebhe ninyi naa? Nzi shii bo ɛnu gha ɛbhɛ bol ɛkɔn na ne ɛ so ndɔ ne irway da.

³⁵ɛNyi ɛyɛnɛng nga i wuusik nikɔn niyɛnɛng ne ɛ kɛ tuma ndɔ ne irway ɛbhɛ, ɛnyi ɛbebhe gha ne wuusek nikɔn nibebhe ne kɛ tuma ndɔ ne irway ɛbhɛ.”

³⁶“Nzi tɔng nyini sɛ ne sɛ ɛtuk ɛshara gha, sɛ ne phom ninyi na ibol daa nibyibyol nikpɛɛ na nɛ nibhɛ kɛ bol lo.

³⁷Daa ɛli ne ivol mon da ifɛ sɛ ne i phɔt nyini, ifɛ ifɛ ne ta te i rop nyini.”

³⁸Nidɛng Ninaa ne Kpɛl ɛShara gha nɛ niFarisawa na ne yaak ɛYɛso yegha, “ɛKyɛɛ ne iCwam, njwi sim te njwi sɛɛ yaang nyu ɛkɔn ne kparat ɛlɔ mo.”

³⁹ɛYɛso gha ne kyii nibhɛ nɛ ne ɛ yɔngɔ, “Ninyi izam mɛnaa wo so nibebhe, nibhɛ bok ngguk, nibhɛ ne ji sim tɛ nibhɛ sɛɛ yaang nyu ɛkɔn ne kparat. Sɔng yaa ne tɔɔrek nibhɛ idɛ nyu ɛkɔn ne kparat de kang ne idee ɛnɛbi ɛYunana de nang.

⁴⁰ɛLi ne ɛYunana gha kaa bhɛ shɛɛ ndɔ ne ibuu ne izing ngge nituk itwat ta, ɛlɛy ne ɛNgɔn ɛNyi gha sɛ ne ma bhɛ shɛɛ ndɔ ɛta ne ivel la nituk itwat.

⁴¹ɛTuk ɛShara, ninyi ne iNɛnɛvi na sɛ ne yilitsik nibhɛ nep nyini, daa ɛli nɛ nibhɛ kaa san ɛbɔk nten de ne ɛYunana na kaa kpɛng nibhɛ wo. ɛNyi gha ne ɛ phyin ɛYunana yegha ne so ɛbɛ wo.

⁴²ɛTuk ɛShara gha, ɛkuk ɛgɔm ne ivel ne iShɛɛba da sɛ ne yilitsik ɛ nep nyini, daa ɛli ɛ kaa le ne ivel ɛbhɛ kyakyak, ɛ yɛɛs ɛ tenes ntsɛntsɛng ɛ ɛgɔm ɛSɔlɔmɔn de. ɛNyi gha ne ɛ phyin ɛSɔlɔmɔn negha ne so ɛbɛ wo.”

⁴³“Yaa sɛ ikabyik ɛphoo de kɛ wuru ndɔ ɛnyi gha, iphɛ yaa ne bhɛ kaan nilɔ nihowo iphɛ tɔk ɛlɔ gha ne iphɛ yaa shɛɛ nɛ, yaa ne sɛ iphɛ kɛ sang bhɛ sɛ ɛlɔ.

⁴⁴iPhɛ ne ji yɔngɔ, ‘Na kyii mbɛ ne ijwee wo ne nggaa tek ko.’ Yaa ne sɛ iphɛ kɛ tuu, iphɛ ne sɛ ijwee wo buu, iwɛwɛy kɛ ryɔng byirik.

⁴⁵iPhɛ ne ji phɛ iphɛ bhɛ bo ihwak ikpabyik ɛniitaa ne ifɛ phyin iphɛ ne ibebhe nibhɛ ji bhɛ lel ɛnggyɛ wo, nibhɛ shɛɛ nɛ. ɛTsim mɛ gbik ishwɛɛ ɛnyi yɛdaa nggyɛ wo yaa bees se ifɛ phyin ɛli ne ɛ kaa so ɛyisɛ gha. Ɛlɛy ne phɛ sɛ ne te nɛ nibebhe ninyi ne izam nɛnaa wo.”

⁴⁶ɛYɛso gha kɛ ne tɔ bol nɛ ninyi na, ɛgyinɛ, nɛ nigwaa ɛbhɛ, niras sɛ ne i tuu, nibhɛ kyinak ne izay, nibhɛ sim ɛli nɛ nibhɛ yaa boote ne ɛbhɛ.

⁴⁷Ɛdɛng ndɔ ninyi na ne yaak ɛYɛso yegha, “ɛGyinɛ mo nɛ nigwaa mo so gɔɔ ne izay, nibhɛ sim tɛ nibhɛ sɛɛ boote ne igyɛ.”

⁴⁸ɛYɛso gha ne kyii nɛ ɛ yaak ɛbhɛ, “Ɛhay ɛbhɛ so ɛgyinɛ nge gha, nɛ nigwaa nge naa?”

⁴⁹ɛYɛso gha ne ji tɔɔrek ninɔn ne icwam ɛbhɛ na ne iwɔ, ne ɛ yɔngɔ, “Yaang ɛn, ɛgyinɛ ngeghaa, nigwaa yɛnaa bɛ.

⁵⁰Daa ɛli ne ɛhiha ɛnyi ne ɛ mɔn ɛkɔn na ne ɛKyɛɛ nge ɛdaa ne irywa gha sim mo, ɛbhɛ ne ɛ so ɛgwaa nge ɛras sa, ne ɛgwaa nge ɛkuk ka, ne ɛgyinɛ nge gha.”