Read eten ɛMacu 13 Bible Online

ɛMacu 13 - eten bible

ɛMacu 13

¹ɛTuk kɛghaa nggyɛ wo, ɛYɛso gha ne tek ijwee wo ɛ wuru ɛbhɛ soos ɛnu ɛrenes sa.

²iDira ninyi de nɛ nibhɛ kaa so ɛnggyɛ wo kaa ne kat gbom ɛli nɛ nibhɛ kaa te ɛYɛso yegha ɛ tɔm ndɔ ne ikparak ɛ soos nɛ, ninyi na ne ji kyinasek ɛnu ɛrenes.

³ɛYɛso gha ne ji tɔng nibhɛ ivol ne igɔrɔp ba gbom, ɛ bo: “ɛDɛ ɛnyi gha kaa wuru ɛ phɛɛs ne sanga ihywee ɛbhɛ.

⁴Kɛ ne sɛ ɛ so ne sanga da, idɛ ihywee de ne ho ne nkiinɛ, ninon ne yɛɛs nibhɛ tang.

⁵iZɛ́ng ne ho ne nkinkang, ɛlɔ gha ne hame ivel sonɛ gbom, ihywɛ ne shii wuru, daa ɛli sɔng ivel lɛ sonɛ gbom mo nang.

⁶Kɛ ne sɛ igbey kɛ ta, ifɛ ne hal ire de, ire de ne te yɔɔy iphɛ howo, daa ɛli ne sɔng ilwing ngɛ kaa tɔm kyukyum nang.

⁷iDɛ ihywee de ne ho ndɔ ne itsutsɔ, itsutsɔ da ne hɔn ifɛ nang ihywɛ ɛwil.

⁸iZɛng ne ji ho ne ivel nyɛnɛng, ihywɛ ne yɛk ibɔrɔk gbom: idɛ ibɔrɔk kɛ ne i so ikɔl idaan, idɛng ne i so nzuwubɔ ɛtaraa, idɛng ne ji i so nzuwubɔ icwat.

⁹Ɛnyi gha ne ɛ bok itoro ne tenes, te ne ɛ phok.”

¹⁰Ninɔn ne icwam ɛYɛso na ne yɛɛs ɛlɔ ɛbhɛ, nibhɛ ne yaak ɛbhɛ, “iKyee phɛ kɛ te ɛ bol nɛ ninyi na ndɔ ne ivol ne igɔrɔp baa?”

¹¹ɛYɛso gha ne kyii ne ɛ yaak nibhɛ, “Kɛ phaal nyini ɛduk ne igbɔm ɛTaanggbey da, sɔng kɛ ne ma phaal nibhɛ nɛ nang.

¹²ɛNyi gha ne ɛ bok ɛkɔn na, yaa ne hante ɛbhɛ nɛ te ɛ hante ne sɛ gbom. ɛHaa ne ɛ sang ɛkɔn na nang, yaa ne ma yung phɔt ɛkyiikyɔnɔ gha ne ɛ bok ko i tek ɛbhɛ buu.

¹³Ne ɛ ji yɔngɔ, ‘ɛKɔn na ne ɛ kɛ ne te nzi bol nɛ nibhɛ ndɔ ne igɔrɔp ba ne so ɛlɛ: Nibhɛ yaa i wɛɛ, sɔng nibhɛ yaang nang, nibhɛ yaa i tenes, sɔng nibhɛ seng nang.’

¹⁴iBol ɛnɛbi ɛShaa de kɛ shwaak ghe daa nibhɛ, ne iphɛ bo; ‘Ninyi yɛnaa wo yaa ku i tenes, sɔng nibhɛ ne kyii seng nang, nibhɛ ne ku i wɛɛ sɔng nibhɛ ne yaang nang, kɔɔ ncɛt.

¹⁵Daa ɛli ne irway nibhɛ da kɛ te nkpuy, itoro nibhɛ de kɛ ne babhay, irwisɛ nibhɛ da kɛ ne ta cwamas se. Tɛ nibhɛ ne sang i wɛɛ, itoro nibhɛ de sang phok, irway nibhɛ da sang seng, ɛli nɛ nibhɛ yaa hyereey ɛlɔ nge gha, mee ne ɛTaanggbey yo, n ji te nibhɛ niken.’

¹⁶“Ɛ so ɛn nyini ninaa ɛwɛng daa ɛli ne irwisɛ mon da i yaang, itoro mon de ta phok.

¹⁷Nzi tɔng nyini itin nɛ, ninabawa na gbom nɛ ninyi ɛTaanggbey ya gbom kɛ sim ɛli nɛ nibhɛ yaa yaang ɛkɔn na ne ɛ yaang ɛn no, sɔng nibhɛ kɛ yaang nang. Nibhɛ ne ta sim ɛli nɛ nibhɛ yaa phok ɛkɔn na ne ɛ phok ɛn no, sɔng nibhɛ kɛ ne phok kang.”

¹⁸“Phok ɛn ɛkɔn na ne ibol ne igɔrɔp ɛhaa ne sanga ihywee de i bo.

¹⁹Nidɛng ninyi na sonɛ ne i sɛ nɛ nibhɛ kɛ phok ibol ne igbɔm ɛTaanggbey de sɔng nibhɛ ne seng iphɛ nang, ɛShɛtan na ne yɛɛs ɛ phɔt ɛkɔn na ne kɛ tup ndɔ ne irway nibhɛ da. Nibhɛ bhɛ ne so te ihywee de ne ihywɛ kɛ ho nkiinɛ wo.

²⁰iHywee de ne ihywɛ kɛ ne ho nkinkang ngge ne so tɛ ninyi na nɛ nibhɛ kɛ phok ibol ɛTaanggbey de nibhɛ ne shii say iphɛ ne irway ihwala.

²¹Sɔng iphɛ ne lel ndɔ nibhɛ kyukyum nang, sɔng iphɛ ne ma phyɔngɔle ndɔ nibhɛ wo nang, yaa sɛ ishishim, ne nggbang kɛ yɛɛs nibhɛ, lenɛ ne ibol ɛTaanggbey de, nibhɛ ne shii hana iphɛ.

²²iHywee de ne ihywɛ kɛ ne ho ndɔ ne itsutsɔ da ne so te ninyi na ne i sɛ nibhɛ kɛ phok ibol ɛTaanggbey de nang, icwas nikɔn ɛzay, ne tɔk iryat ne cwaal nibhɛ, iphɛ ring ibol de ne hɔn ndɔ ne irway nibhɛ da, sɔng iphɛ ne tang yɛk ɛkɔn nang.

²³iHywee de ne ihywɛ kɛ ne ho ne ivel nyɛnɛng ngga, ne so te ninyi na nɛ nibhɛ kɛ phok ibol ɛTaanggbey de nibhɛ ne seng iphɛ. Nibhɛ ne ji yɛk ibɔrɔk; izɛng so ikɔl idaan, izɛng ne so nzuwubɔ ɛtaraa, izɛng ne so nzuwubɔ icwat.”

²⁴ɛYɛso gha ne ta tɔng nibhɛ idɛ ibol ne igɔrɔp be dɔng, ɛ yɔngɔ: “Yaa ten igbɔm ɛdaa ne irywa da ne ɛdɛ ɛnyi gha ne ɛ kaa tubhus ɛlikama ɛbhɛ ɛyɛnɛng ngɛ ne ihwap ɛbhɛ.

²⁵Kɛ ne sɛ nyini na so nwa, ɛhaa ne iphup ɛnyi gha ne bhɛ sanga ihywee ne idik ndɔ ne ɛlikama wo ne ɛ kyii ɛ hyili.

²⁶Kɛ ne sɛ ɛlikama wo kɛ yaa tuul itso, idik ge ne ma ji tɔɔrek ghe.

²⁷“Nikpuru ɛhaa ne ihwap pa ne yɛɛs nibhɛ yaak ɛbhɛ, ‘ɛKyɛɛ ne ijwee, njwii maa bo ihywee izɛnɛng ne ɛ kaa tubhus ne ihwap mo da nang? Kɛ ne mɔn ɛlii idik ge kyii wuru nɛ woo?’

²⁸“Ɛnyi gha ne yaak nikpuru ɛbhɛ na, ‘ɛHaa ne iphup nge ɛbhɛ kɛ mɔn ɛkɔn nɛghaa nggyɛ wo.’ “Nikpuru na ne yaak ɛbhɛ, ‘Ɛ ne sim ta njwi sɛ bhɛ sɛs idik gee?’

²⁹“Ɛnyi gha ne yaak nikpuru ɛbhɛ na, ‘Kwa, aa yung bhɛ sɛs ɛn ɛ bying ɛn ne ɛlikama wo.

³⁰Tek ɛn te iphɛ hɔn gbik, sɛ ne sɛ nten ne pha yɛ, ne mɔng ninaa ne pha na, nibhɛ ne tsa nibhɛ sɛs idik ge nibhɛ robhos ikpɔng ngɛ nibhɛ ne wɔɔ, nibhɛ ne ji pha ɛlikama gha nibhɛ bhɛ sit me nɛ ne igban.’ ”

³¹ɛYɛso gha ne kyi ta tɔng nibhɛ idɛ ibol ne igɔrɔp be dɔng, ɛ yɔngɔ: “Yaa ten igbɔm ɛdaa ne irywa da ne itsara imɔsita ne ɛnyi kɛ bo ɛ tup ne ihwap ɛbhɛ.

³²iTsara yɛdee nggyɛ wo ihywɛ ihywɛ kɛ taasek ihywɛ shɛs gbik ndɔ ne ihywee nikɔn de. I ne sɛ ihywɛ kɛ hɔn ihywɛ i ne phyin ɛbyin ne ivee gha gbik, ihywɛ teye ɛhon, ɛli nɛ ninon yaa yɛɛset nibhɛ ryɔng niryee nɛ ne ilaak kɛ.”

³³Ne ɛ kyii ta boote nɛ nibhɛ ndɔ ne igɔrɔp ɛ yɔngɔ, “iGbɔm ɛdaa ne irywa da so te iyis ne ɛkuk kɛ hyoke nɛ ncɛt, ɛ yɛk ndɔ inuk ne mpɛ so gbom ɛ subhus mpɛ. iYis de ne te inuk ga wara gbom.”

³⁴ɛYɛso gha kaa tɔng ninyi na nikɔn nɛnaa wo ndɔ ivol ne igɔrɔp, sɔng ɛ kaa tɔng nibhɛ idɛ bol tang ne igɔrɔp ba nang.

³⁵Ɛ kaa mɔn ɛlɛ wo te sɛ shwaak ɛkɔn na ne ɛnɛbi ɛShaa gha kaa boote wo ɛ yɔngɔ, “Naa bol nɛ nibhɛ ndɔ ne igɔrɔp, naa phaal nibhɛ nikɔn nɛ nibhɛ so gying nten de ne kaa tum ɛzay ya.”

³⁶ɛYɛso gha ne tek idira ninyi de ɛbhɛ lel le ndɔ ne ijwee. Ninɔn ne icwam ɛbhɛ na ne bhɛ sɛ ɛbhɛ, nibhɛ ne yaak ɛbhɛ, “Tɔng njwi ɛkɔn na ne ibol ne igɔrɔp ne idik ge ne iphɛ kɛ wuru ndɔ ihwap ba i bol.”

³⁷ɛYɛso gha ne kyii nibhɛ nɛ, ne ɛ yɔngɔ, “ɛNyi gha ne ɛ kɛ tubhus ihywee izɛnɛng ngge ɛbhɛ so ɛNgɔn ɛNyi gha.

³⁸iHwap ba ifɛ soye ɛzay ya, ihywee izɛnɛng ngge ihywɛ ne soye ninyi na nɛ nibhɛ ne so ndɔ ne igbɔm ɛTaanggbey da, idik ge phɛ ne ji soye ninyi ɛShɛtan na.

³⁹ɛHaa ne iphup pa ne ɛ kɛɛ sanga idik ge, ɛbhɛ so ɛShɛtan na, nten ne pha de iphɛ phɛ ne so nten ne taal ɛzay de, ninaa ne pha na nibhɛ ne ji so nimalɛka ɛTaanggbey.

⁴⁰“ɛLi ne i sɛs idik ge i tumɛ i ji wɔɔ wo, ɛlɛy ne iphɛ sɛ ne te nten ne taal ɛzay de.

⁴¹ɛNgɔn ɛNyi gha sɛ tom nimalɛka ɛbhɛ, nibhɛ sɛ ne bhɛ tumɛ ninyi na nɛ nibhɛ tes ninyi ɛbhɛ na mɔn ɛfɔt to, gbik nɛ ninaa nɛ nibhɛ kɛ mɔn ibebhe, nibhɛ tuul nibhɛ ndɔ ne igbɔm ɛbhɛ da.

⁴²Nibhɛ cwaak nibhɛ ndɔ ne ɛgbaang ne igboo, ɛlɔ gha nɛ nibhɛ sɛɛ san nɛ nibhɛ re izinɛ.

⁴³Ninyi ne icik ka sɛ ne jii tol te iroy ndɔ ne igbɔm ɛKyɛɛ nibhɛ da. ɛNyi gha ne ɛ bok itoro ne tenes te ne ɛ phok.

⁴⁴“Yaa ten igbɔm ɛdaa ne irywa da ne iryat ne kɛ rɛɛ ndɔ ne ihwap, ɛdɛ ɛnyi gha ne bhɛ sɛ ihywɛ ɛ kyii hante ne rɛɛ yɛ yɛnɛnng. iRway ihwala yɛ ne ji te ɛbhɛ ɛ lɛbhɛl nikɔn na ne ɛ bok gbik, ɛ bo ijam mɛ ɛ say ne ihwap pɛdaa nggyɛ wo.”

⁴⁵“Yaa ne ta ten igbɔm ɛdaa ne irywa da ne ɛhaa ne lɛbhɛl nikɔn ne ɛ tɔk ikpɛɛ ne ifɛ bok ijam gbom.

⁴⁶Yaa ne sɛ ɛ kɛ bhɛ sɛ idɛ ikɛɛ de ne iphɛ bok ijam, ne ɛ kyii ɛbhɛ lɛbhɛl nikɔn na ne ɛ bok, ɛ ji bok ijam mɛ ɛbhɛ say ne ikɛɛ yɛdee nggyɛ wo.”

⁴⁷“Yaa ne ta ten igbɔm ɛdaa ne irywa da ne ɛKara ne kɛ cwaak ndɔ ɛrenes, izing ngge ne leesel ihywee-ihywee.

⁴⁸Ne sɛ ihywɛ kɛ yɛɛnɛ, ninyi na ne ji bhɛ hɔ ɛbhɛ gɔɔ ne itaa, nibhɛ soos nibhɛ kasa izing izɛnɛng ngge nibhɛ cwaasek ndɔ ne isap nibhɛ ne ji lok izing igywebhe de gɔɔ.

⁴⁹ɛLɛy ne iphɛ sɛ ne te nten ne taal ɛzay de, nimalɛka ɛTaanggbey ya sɛ yɛɛs nibhɛ kasa ninyi nibebhe na ndɔ ninyi ne cik ka.

⁵⁰Nibhɛ cwaasek ninyi ne bebhe na ndɔ ne ɛgbaang ne igboo, ɛlɔ gha nɛ nibhɛ sɛɛ bhɛ san nɛ nibhɛ i re izinɛ.”

⁵¹ɛYɛso gha ne phom ninɔn ne icwam ɛbhɛ na ɛ yɔngɔ, “Ɛ kɛ seng ɛn nikɔn nɛnaa wo gbik ghee?” Nibhɛ ne yɔngɔ, “Ɛɛy.”

⁵²Ne ɛ ji yaak nibhɛ, “iPhɛ ɛlɛy, gbik ɛnyi ne kpɛl ɛShara gha ne ɛ kɛ teye ɛngɔn ne icwam ne igbɔm ɛdaa ne irywa gha ne so te ɛnyi ne ijwee gha ne ɛ kɛ tuul nikɔn niphas nɛ nitɛl lɛ ndɔ ne ɛgban ɛbhɛ.”

⁵³Ne sɛ ɛYɛso gha kɛ taal tɔng ivol ne igɔrɔp pɛdaa wo, ne ɛ hyel ɛ tek ɛlɔ yɛ,

⁵⁴ɛ phɛ ɛgarang ɛbhɛ. Ɛya bhɛ mɛmɛ ninyi na nɛ ndɔ ne idee ne itsɔɔy nibhɛ, ninyi na ne wum ɛnu zii daa ne imɛmɛ ɛbhɛ da, nibhɛ ne yɔngɔ, “ɛNyi yɛghaa wo bhɛ le ne ntsɛntsɛng ngɛdee wo ɛbii? Ɛ ta lenɛ nikɔn ne kparat tɛ na wo ɛbii?

⁵⁵Sɔng ɛbhɛ ɛ so ɛngɔn ɛhaa ne gangat nikɔn ta nang nge? Sɔng i bok ɛgyinɛ gha ɛMɛri nang? Sɔng ne ɛ so ɛgwaa ɛYakub, ne ɛYisifu, ne ɛSimɔn gbik ne ɛYahuza nang nge?

⁵⁶Nzo nigwaa ɛbhɛ nikuk ka nɛ ne njwɛɛn so ɛbɛ wo nɛ nibhɛ wo nang? Ne ɛ ji bhɛ lenɛ nikɔn nɛ naa wo ɛbii?”

⁵⁷Nibhɛ ne te njenjek ne ɛYɛso gha. ɛYɛso gha ne yaak nibhɛ, “I naas ɛnɛbi gha ne ndiinday de nigarang nga gbik, kang ne ɛgarang ɛbhɛ ne ijwee ɛbhɛ.”

⁵⁸Sɔng ɛYɛso gha ne mɔn nikɔn ne kparat ta gbom ɛgarang ɛbhɛ gha nang, daa ɛli ne hame nibhɛ kɛ nang ne itin nɛ ne ɛbhɛ wo.