Read eten ɛMacu 14 Bible Online

ɛMacu 14 - eten bible

ɛMacu 14

¹Nten nɛdee nggyɛ wo, ɛHyiridus sa ne ɛ kaa so ɛgɔm ne iGalili gha, ne phok ngka ɛYɛso de,

²ne ɛ yaak ninaa ɛtomɛ ɛbhɛ na, “Ma so ɛYohana ne Yaak ne iBatisima ghaa wo ne i kɛ yilitsik ɛbhɛ ndɔ ne ikpuu, iphɛ phɛ ɛ te ɛ mɔn ihywee nikɔn ne kparat tɛnaa wo.”

³Daa ɛli ne ɛHyiridus sa kaa wum ɛYohana yegha ɛbhɛ rop ɛbhɛ ne ijwee ne nyang daa ne igboo ɛHyirɔdiya ne ɛ kaa so ɛkuk ɛgwaa ɛbhɛ ɛFilibus.

⁴ɛYohana gha kaa ku i tɔng ɛbhɛ ɛ yaak ɛbhɛ, “Sɔng ɛShara gha kɛ sim-mɛ ɛ bo ɛkuk ɛgwaa mo gha ne ɛ tɔ ɛken na nang.”

⁵ɛHyiridus sa ne sim ɛli ne aa phoo ɛYohana yegha, ne ɛ phok ɛnik ninyi wo daa ɛli nɛ ninyi na kaa ku bo wu ɛYohana gha soye ɛnɛbi.

⁶Kaa ne sɛ ɛtuk ne ijɔwɔ ne tas ne ɛtuk ne iyɛk ɛHyiridus segha kɛ tuu, ɛlap ɛHyirɔdiya gha ne yel isham ne ihywɛ kɛ jam ɛHyiridus segha,

⁷isham be ne te ɛHyiridus segha ɛ sim-mɛ ɛbhɛ nɛ, ɛ ne lɛlɛm ihywa, wu yaa nang ɛbhɛ gbik ɛkɔn na ne ɛ kɛ phom ɛbhɛ.

⁸ɛNgɔn na ne roos ibol ɛgyinɛ ɛ yaak ɛgɔm ma, “Nang me ito ɛYohana ne Yaak ne iBatisima ɛlyilyɛghaa wo ndɔ ne ikpɛɛt.”

⁹iBol lɛ ne kyii nang ɛgɔm ma irway ishwii, ne ma so ibol de ne ɛ kɛ ku sim-mɛ ɛnu ɛyisɛ ne igbaang ninyi ɛbhɛ, ne ɛ yɛk ngɛ yɔng wu te nang ɛlap pa ɛkɔn na ne ɛ kɛ phom mo.

¹⁰Ne ɛ ji yɛk ngɛ i phɛ ndɔ ne ijwee ne nyang ngo bhɛ tul ito ɛYohana de.

¹¹Ne i cwaak ito de ndɔ ne ɛkpɛɛt, i nang ɛngɔn na, ɛngɔn na ne ma ji bhɛ nang ɛgyinɛ ɛbhɛ gha.

¹²Ninɔn ne icwam ɛYohana na ne yɛɛs nibhɛ bo ɛkpit ne ibek ɛYohana de nibhɛ bhɛ rɛɛ, nibhɛ ne ji phɛ nibhɛ bhɛ tɔng ɛYɛso yegha.

¹³Kɛ ne sɛ ɛYɛso gha kɛ phok ɛkɔn na ne ɛ kɛ te ne ɛYohana gha, ne ɛ tek ɛlɔ yɛghaa nggyɛ wo, ɛ lel ndɔ ne ikparak, ɛ phɛ ɛlɔ gha ne hame ɛnyi sonɛ, ɛbhɛ shɛɛ nɛ nggenggerey. Ne sɛ ninyi na kɛ phok ɛlɛ wo, nibhɛ tek nigarang nibhɛ na, nibhɛ kungus ɛYɛso yegha ne ita.

¹⁴Kɛ ne sɛ ɛYɛso gha kɛ wuru ndɔ ne ikparak ko ne ɛ yaang idira ninyi de gbom. ɛYɛso gha ne san iyɔm nibhɛ, ne ɛ tes nishwa nibhɛ na niken.

¹⁵Kɛ ne sɛ ɛlɔ yɛ kɛ te ywii, ninɔn ne icwam ɛbhɛ na ne yɛɛs, nibhɛ ne yaak ɛbhɛ, “ɛLɔ yɛghaa wo so kyakyak, ɛlɔ yɛ kɛ ne ta te ywii, yɛk ninyi na nkiinɛ tɛ nibhɛ phɛ ndɔ nigyigyaarang nga nɛ nibhɛ so cɛcɛk ɛbɛ wo, nibhɛ bhɛ tɔk ire.”

¹⁶ɛYɛso gha ne kyii nɛ ɛ yɔngɔ, “Sɔng iphɛ so nggbinggbing nibhɛ tek ɛbɛ wo nang, nyinɛn no yang nang ɛn nibhɛ ɛkɔn na nɛ nibhɛ yaa re.”

¹⁷Nibhɛ ne kyii nɛ, nibhɛ yaak ɛYɛso yegha, “Njwi bok ivɛrɛdi ifɛ iwii ne izing ihywɛ ihywaa zɔng.”

¹⁸ɛYɛso gha ne yɔngɔ, “Yɛɛs ɛn nɛ ɛbɛ.”

¹⁹ɛYɛso gha ne yɛk ngɛ ninyi na sooset ne idik, ne ɛ ji bo ivɛrɛdi ifɛ iwii da, ne izing ihywɛ ihywaa de, ɛ yɛɛn ɛdaa ne irywa, ɛ tɔɔrek ɛTaanggbey ye irway ihwala, ɛ ji kpɛl ivɛrɛdi da, ɛ ji naas ninɔn ne icwam ɛbhɛ na, nibhɛ ma ji bhɛ naas ninyi na.

²⁰Gbik ninyi na ne re nibhɛ sighisiy, ninɔn ne icwam ɛbhɛ na ne tumɛ ɛbyin nɛ, iphɛ ne yɛɛs ne isap ɛnduwubɔ ne iphɛ iphaa hyɔrɔ.

²¹Niras sa nɛ nibhɛ gha ne re ire yɛdee nggyɛ wo kaa hɔn ninom iwii, kang nɛ nikuk gbik nɛ ninɔn.

²²Kɛ ne sɛ nibhɛ taasel, ɛYɛso gha ne yɛk ninɔn ne icwam ɛbhɛ na nɛ nibhɛ lel ndɔ ne ikparak, nibhɛ ho ɛyisɛ ɛbhɛ, nibhɛ phɛ gɔɔ ne idɛ ikpang ɛrenes so, ɛbhɛ wo ne ji kyinak ɛ yɛk idira ninyi de nkiinɛ nyɛɛn.

²³Kɛ ne sɛ ɛ kɛ yɛk ninyi na nkiinɛ wo, ne ɛ phɛ dak ne ɛwarang nggenggerey, te ɛbhɛ roo ne ɛTaanggbey. Ɛlɔ yɛ ne te ywii, ɛYɛso gha ne ma bhɛ tɔ dak ne ɛwarang ngo nggenggerey yo.

²⁴Nten nɛdee nggyɛ wo, ɛkparak ko ku bhɛ yek ɛceree ɛrenes sa, igbugbung inɛn jung ring nibhɛ ne ihywel, daa ɛli ne igbil lo nɛ nibhɛ kɛ nang igbil lo ɛyisɛ.

²⁵Kɛ ne sɛ ɛlɔ yɛ yungaa teye ihwɛlɛ, ɛYɛso gha ne ji yaa hyel daa inɛn da ɛ phɛɛs ɛlɔ ninɔn ne icwam ɛbhɛ na.

²⁶Ne sɛ ninɔn ne icwam ma kɛ yaang ɛbhɛ ɛ hyel da inɛn ɛrenes da, nibhɛ ne wum ɛnik, nibhɛ yɔngɔ, “iYuwa!” Nibhɛ ne ta ikun ɛlɔ ne ɛnik ko.

²⁷ɛYɛso gha ne shii boote nɛ nibhɛ, ɛ yɔngɔ, “Laasek ɛn irway mon, mee yɔɔy, sɔng ɛ phok ɛn ɛnik ko kang.”

²⁸ɛBiturus sa ne kyii nɛ, ɛ yaak ɛYɛso yegha, “ɛDaray, wu igyɛ, ne ɛ yɛk ngɛ n yɛɛs n sɛ yɛdaa inɛn da.”

²⁹ɛYɛso gha ne yaak ɛBiturus segha, “Yɛɛs.” ɛBiturus sa ne wuru ndɔ ne ikparak ko ɛ hyel daa inɛn da ɛ phɛɛs ɛlɔ ɛYɛso yegha.

³⁰Ne sɛ ɛBiturus sa kɛ yaang ɛli ne igbil lo bɛm ne ihwet da, ne ɛ wum ɛnik ɛ yaa renes se, ne ɛ ta ikun, ɛ yɔngɔ, “ɛDaray, phɔt me!”

³¹Nɛ nten nɛ ɛYɛso gha ne shii tɔɔl iwɔ ɛ wum ɛbhɛ, ne ɛ yaak ɛbhɛ, “Nyinɛn no ne ìnang ne itin mon de kɛ taasek ko, ikyee phɛ kɛ te ɛ yaa to irway daa?”

³²Kɛ ne sɛ nibhɛ kɛ lel ndɔ ne ikparak ko igbil lo ne kɔɔng nge.

³³Ninaa nɛ nibhɛ so ndɔ ne ikparak ko, ne re ɛYɛso yegha ntsong, nibhɛ bo: “iTin nɛ, igyɛ soyɛ ɛNgɔn ɛTaanggbey ya.”

³⁴Kɛ ne sɛ nibhɛ kɛ berey ɛrenes sa, nibhɛ ne tek nikɔn ne ivel ne iJɛnasarɛt.

³⁵Ninaa ɛgarang ngɛ ne seng ɛYɛso yegha, nibhɛ ne tomos nɛ nigarang ne ivel lɛdaa nggyɛ wo gbik, ne yɛɛset ɛYɛso yegha nɛ nishwa na gbik.

³⁶Nibhɛ ne roo ɛYɛso yegha wu te ɛ tek ninaa ne ishwa darat iwusang ne ɛtura ɛbhɛ zɔng, ne ɛ sim ɛlɛy, gbik ɛhaa ne ɛ kɛ ne dat iwusang ne ɛtura ɛYɛso da ne ɛ te ɛken.