Read eten ɛMacu 16 Bible Online

ɛMacu 16 - eten bible

ɛMacu 16

¹niFarisawa na nɛ niSadukyawa na ne yɛɛs ɛlɔ ɛYɛso gha te nibhɛ phɔwɔ ɛbhɛ, iphɛ ɛlɛy, nibhɛ yaak ɛbhɛ wu te ɛ tɔɔl nyu ɛdɛ ɛkɔn ne kparat de ne iphɛ yaa tɔɔrek wu ɛTaanggbey ɛbhɛ kɛ tom ɛbhɛ ɛtsak.

²ɛYɛso gha ne kyii nɛ ɛ yaak nibhɛ, “I sɛ irywa wo kɛ seng nten ne irwirywɛ ne ɛ yɔng ɛn, ɛlɔ yɛ sɛ jam.

³I ne sɛ irywa wo kɛ seng, ifɛ sii ne ihwɛlɛ, ne ɛ yɔng ɛn wu inɛn yaa reey izenge wo. ˆƐ yɛɛ ne wɛɛ ɛn inɔp ˆɛ seng ɛn nyu nikɔn nɛ nibhɛ yaa tes, sɔng ˆɛ kɛ ne yɛɛ ne seng ɛn nyu nikɔn nɛ nibhɛ tes ne izam mɛdee wo nang.

⁴Ninyi ne izam mɛnaa wo so nibebhe, nibhɛ bok nggyuk. Nibhɛ sim tɛ nibhɛ sɛɛ yaang nyu ɛkɔn ne kparat, sɔng yaa ne tɔɔl nibhɛ idɛ nyu ɛkɔn ne kparat ta kang ne ibol ɛYunana de nang. ɛYɛso gha ne tek nibhɛ ɛ hyel.”

⁵Kaa ne sɛ Ninɔn ne icwam ma kɛ bere ne idɛ ikpang ɛling ngo nibhɛ ne seng wu nibhɛ kɛ te bap tang boos ibɛrɛdi.

⁶ɛYɛso gha ne yaak nibhɛ, “Wɛɛ ɛn nyini yɛnɛng, ryɔng nyini ɛlɔ ne iyis niFarisawa de ne idee niSadukyawa de.”

⁷Ninɔn ne icwam ma ne yaa bol ndɔ nibhɛ, nibhɛ bo, “Hang yung so ibol de ne njwɛɛn kɛ shɛɛ tang boos ibɛrɛdi de bɛ?”

⁸ɛYɛso gha ne seng ɛkɔn na nɛ nibhɛ bol lo, nɛ phom nibhɛ ɛ yɔngɔ, “Nyinɛn no ne ìnang ne itin mon de kɛ taasek ko, ikyee phɛ kɛ te ɛ bol ɛn ndɔ mon no, ɛlɔ ne hame ɛ bok ɛn ibɛrɛdi dee?

⁹ˆƐ maa tɔ tang seng ɛn naa? Ɛ kɛ te ɛn bab ɛli ne nggaa bo ivɛrɛdi iwii da n re nɛ ninyi ninom iwii na naa? Ɛ kaa ne tang ɛn ɛbyin nɛ ne isap maaghe woo?

¹⁰iVɛrɛdi ɛniitaa da ne kaa re nɛ ninyi ninom nwaas da lɛɛ? Ɛ kaa ne tang ɛn ɛbyin nɛ ɛ yɛk ɛn ne isap maaghe woo?

¹¹iKyee phɛ kɛ ne te ɛ sang seng ɛn wu hang ibol ne ibɛrɛdi de ne nzi bol loo? Nzi bo ryɔng ɛn nyini ɛlɔ ne iyis niFarisawa de, ne idee niSadukyawa de.”

¹²Ninɔn ne icwam ma ne ji seng, sɔng ɛYɛso gha kaa bo wu tɛ nibhɛ ryɔng no ɛlɔ ne iyis ne i yɛk ne ibɛrɛdi nang, ɛ kaa yang i bo wu tɛ nibhɛ ryɔng en ɛlɔ ne imɛmɛ niFarisawa nɛ niSadukyawa.

¹³Kɛ ne sɛ ɛYɛso gha kɛ phɛ ne ivel iKɛsɛriya ne iFilibi, ne ɛ ji phom ninɔn ne icwam ɛbhɛ na ɛ yaak nibhɛ, “Ninyi na jung bok wu ɛNgɔn ɛNyi gha so ɛhay lɛɛ?”

¹⁴Nibhɛ ne kyii nɛ nibhɛ yɔngɔ, “Nidɛng i bo wu ɛ soyɛ ɛYohana ne Yaak ne iBatisima, nidɛng ne yɔngɔ wu ɛLiya, nidɛng ne yɔngɔ wu ɛRimiya, nidɛng ne yɔngɔ wu ɛ soyɛ ɛdɛ ɛnɛbi gha.”

¹⁵ɛYɛso gha ne phom nibhɛ ɛ yɔngɔ, “Nyinɛn no lɛɛ, ɛ bo ɛn wu nzo ɛhay?”

¹⁶ɛSimɔn ɛBiturus sa ne kyii nɛ ɛ yɔngɔ, “iGyɛ ɛ soyɛ ɛKiriti, ɛNgɔn ɛTaanggbey ne iken.”

¹⁷ɛYɛso gha ne kyii nɛ ɛ yaak ɛBiturus segha, “ɛSimɔn ne ɛ soyɛ ɛngɔn ɛYunana, ɛ soyɛ ɛhaa ɛwɛng! Sɔng ɛten ɛsii ɛbhɛ kɛ mɔng ngɛ ibol lɛdee wo nang, ɛKyɛɛ nge ne ɛ so daa ne irywa ɛbhɛ kɛ mɔng ngɛ.

¹⁸Nzi ne tɔng ngɛ igyɛ ne ɛ soyɛ ɛBiturus, ɛ soye ɛphang, daa ne ɛphang ngɛwoo wo ne nzɛ ne lɔl ne idira ninaa ne roos nge de. Sɔng iku sɛ ne phyin iphɛ ne ihwet tang.

¹⁹Na nang ngɛ niyaya ninunzuk ne igbɔm ɛTaanggbey ya, sɛ ne sɛ ɛkɔn na ne ɛ kɛ sim ɛzay ya, ne ma sim ɛbhɛ daa ne irywa wo ne mang, ɛhaa ne ɛ kɛ ne mbaray ndɔ ɛzay ya, ne ma mbaray ɛbhɛ daa ne irywa wo ne mang.”

²⁰ɛYɛso gha ne kpɛng ninɔn ne icwam ɛbhɛ na wu hang nibhɛ mɔng ɛnyi wu iyee i soye ɛKiriti gha.

²¹Ne lenɛ nten nɛdee nggyɛ wo, ɛYɛso gha ne yaa bol nɛ ninɔn ne icwam ɛbhɛ na wɛsɛrɛk, ɛ bok nibhɛ, “iPhɛ so nggbinggbing mbɛ ne iYɛrushɛlɛm mbɛ sɔ nggbang gbom ne iwɔ ne ndiinday niYahodawa na, nɛ nindiinday nibo na, gbik nɛ ninaa ne kpɛl ɛShara gha. Nibhɛ sɛ bhɛ phoo me ne nggyi ta yilitsik ɛtuk ne itwat tɛ.”

²²ɛBiturus sa ne hɔwɔ ɛYɛso yegha gɔɔ, ne ɛya nep ɛbhɛ, ɛ bo, “Te iRoy kyɛngɛ ɛDaray ɔɔy! Sɔng ɛkɔn nɛghaa wo yaa sɛ yɛ nang.”

²³ɛYɛso gha ne hyereey ne ɛ yaak ɛBiturus segha, “Cwi gɔɔ ɛbɛ wo ɛShɛtan ɔɔy! ˆƐ sim aa teyɛ ikɛɛ ne ɛkɔn ne kyibhɛ nge, sɔng icwas sɛdaa wo le ɛlɔ ɛTaanggbey yang, ifɛ le ɛlɔ ɛten ɛsii.”

²⁴ɛYɛso gha ne ji yaak ninɔn ne icwam ɛbhɛ na, “Gbik ɛnyi gha ne ɛ sim aa roos me wo, te ne ɛ mbaray ito ɛbhɛ, ɛ tɔɔk ihon ne gangat ɛbhɛ ɛ kungus me nɛ.

²⁵Daa ɛli ne ɛhiha ɛnyi ne ɛ sim te aa phɔt iken ɛbhɛ de, aa ne wɔs iphɛ, ɛhiha ne ɛ kɛ ne wɔs iken ɛbhɛ de ɛlɔ me wo ɛ sɛ ne sɛ iphɛ.

²⁶iPhɛ so ɛnyi gha ikyee ne aa sɛ ɛzay ya gbik ko ɛ ji wɔs iken ɛbhɛ dee? iKyee ne ɛnyi gha sɛ yɛɛ ne bo ɛ sunu ne iken ɛbhɛ dee?

²⁷ɛNgɔn ɛnyi gha sɛ ne yɛɛs ndɔ ne ito-ndiinday ɛKyɛɛ ɛbhɛ nɛ nimalɛka, ɛ mɔn ɛrɔngɔ iyɛnɛng daa ɛkɔn na ne ɛ kɛ mɔn.

²⁸Nzi tɔng nyini itin nɛ, ɛbyin mon so ɛbɛ wo ne hame nibhɛ sɛ kus nyɛɛn nibhɛ kyi yaang ɛNgɔn ɛNyi yaaso ndɔ ne igbɔm ɛbhɛ da.”